Selusien koa helamu ten
Revelesen
?Isei mutis selusien koanik?
Meatin koa mutis selusien koanik, isen Sion Rev 1:1,4,9; 22:8 koa vi eiloheh tai onen Iesu Kristo. Kei vi Sion Sepeti koa mutis Sion, ka 1, 2 ka 3 Sion emun. En avong koanek, vesesal en sua 95 AD (sua keil koa katau en avong Iesu avasi), kavmen ten out Rom ling Sion en titi aelan tai koa avisi en Patmos. Ka aviteni mini keke uasi hemat munak hesak visi valohosai rani.
?Isei vuli selusien koanik mulamu?
Sion mutis selusien enek va min Kristin keil en mari sios oulu (7) en provins ten out Esia (koa kosa avise en Turkey), ka min Kristin sav keil en out vasi. Suval Sion, Kristin keil en out vasi amul avisu en avong takeih keil en out vasi en hen asuv houlu etel ten out Rom: Nero (sua 54-68 AD), Vespasian (sua 69-79 AD), ka Domisian (sua 81-96 AD). Sakini, Iesu san leisanien tai mini keke vahit mesein min Kristin keil vahati lat rendemien one ka vasel kat keil avahatimal vakeih en vaeen ten demkatien koa amul ien.
?Sion mutis selusien koanik vensa?
Iesu Kristo meng kat Sion keke vatis leta enek vakataun demkatien onen meatin keil onen – Iesu Kristo kistal min Sion en leisanien tai ka meng kati vatis kat tounah koa kei vit luvati mini keke vahit meseini min Kristin keil. Rev 1:11,19; 22:6
Sion en vati vasel kat Kristin keil en out Esia keke demkatien one namandiltei – Veni sua houlu mai muli, Kristin keil houlu amul amandil en demkatien one. Rev 2:4,14,20; 3:2,15 Sakini, Sion mutis retai en selkatien keil ekek va min mari sios oulu (7) en provins ten out Esia. Rev 2:1–3:22
Sion en vati keke Kristin keil availea en hetetamenien onen Ahi – Kristin keil houlu amul alonge tisa ven avong keil takeih koa amul avisu eni en hen kavmen, en hen meatin sav keil, ka en hen tue keil emun. Rev 2:7,9-10,13,19,26; 3:5,21 Sakini Sion vit luvati keke tounah vasi koa mul kur out mul musil kat asa koa Ahi ling kati keke vakur out mulamu en avong koa mumon out netan. Rev 1:8,17; 4:1–22:21
Sion en vati keke Kristin keil availea keke Iesu hemai ris ka hevae lin Temat ka tounah vasi koa tisa – Kristin keil houlu alesi suval amul arosin Iesu sua houlu tuai ka Kristin keil houlu ka eiloheh keil emun umat tuai ven demkatien one. Rev 1:9 Ka Sion vati lat rendemien one vit Iesu hemai ris anatin, ka navong hemai ris hevae lin Temat ka tounah vasi koa tisa, ka heling revi tounah vasi keil hemai hetahos. Rev 1:10-20; 19:11-21
Sion en vati vasel kat Kristin keil keke avalomal vakeih en demkatien one keke anamemoutei en avong koa Iesu hemai ris eni – Tei en Kristin keil alesi keke tounah koa avisu eni keih ramat. Rev 6:9-11 Sakini Sion sel kat keil keke avalomal vakeih en demkatien one ka anamaentei desien one en Ahi namot. Rev 2:7,11,17,26; 3:5,12,21; 7:14; 12:11; 15:2 Kei sel kat keil keke anoumontei tounah koa nasakin keil anamemou en avong koa Iesu hemai ris eni ka helei rahit usite onen meatin keil eni. Rev 3:18; 12:11; 16:15
Sion en vati vahati lat rendemien onen Kristin keil hetal min selusien usil navong Ahi houm revi teilang nesa ka out netan luhemai luhehi heite hau – Tei en Kristin keil amundem houlu usil tounah keil ten out netan. Sakini Sion sel kat keil indem usil navong koa Ahi houmon teilang nesa ka out netan luhemai luhehi heite hau. Rev 21:1–22:5
Mari rendemien tai ten selusien koanik mul en Revelesen 1:10-11,19
En Sande, avong onen Asuv Iesu, Ninin onen Ahi sien nau ka naraengon rea tai en eisiluk koa keih suval amaru koa musel. Kei viteni minau vit, “!Kitis lat asa koa kilesi heha en tus tai, ka kisani heha min sios oulu (7) en taon keil ekek: Efeses, Samerna, Pergamam, Taeatira, Sartis, Piladelvia, ka Laodisia! …
Kitis lat tounah keil komul kolesi, asa koa hekur out en avong kosa ral min asa koa hemai hekistal en avong koa hemai veah.”
?Asa mul en selusien koanik?
1. “Tounah keil komul kolesi …” – Mukave Iesu Kristo selus min Sion ka en leisanien tai. (1:1-20)
2. “… asa koa hekur out en avong kosa …” – Selkatien keil va min sios oulu (7) ten provins ten out Esia. (2:1–3:22)
3. “… asa koa hemai hekistal en avong koa hemai veah.”
a. Tounah keil en out netan amasmas Ahi. (4:1-11)
b. Iesu vothot eni keke vi sipsip ten sanien votut koa vinvin vahuli selusien ten hothotien onen Ahi. (5:1-14)
c. Iesu kum vahas siil oulu (6) koa sakin mahien tateisav keil umai apurun meatin keil ten out netan. (6:1–8:1)
d. Angelo oulu (7) amuh retai en amaru one koa sakin mahien tateisav keil umai apurun meatin keil ten out netan (8:1–16:21)
e. Ahi san mahien min koakeil ten out Babilon. (17:1–19:5)
f. Iesu mai ris keke vavae lin Temat ka koakeil vasi amusili. (19:6-21)
g. Iesu ka koakeil amusili alosil kat out netan sua heite taosen tai. (20:1-6)
h. Ahi son Temat vita en Vuli Ahang. (20:7-10)
i. Ahi mumon Mari Kot onen ka lei rahit usite onen meatin vasi keil. (20:11-15)
j. Ahi mumon teilang nesa ka out netan lumai luvi heite hau. (21:1–22:5)
4. Selusien ekor. (22:6-21)
1
Hitkileaen onen Sion usil selusien koanik
Koanik vi hothotien koa Ahi sani min Iesu Kristo keke vatie lati min eiloheh keil onen asa koa hemai hekistal hervitei tuetin. Iesu Kristo sila angelo onen mita venau, koa navi eiloheh onen, keke vahit mesein selusien koanik minau. Isok Sion. Dan 2:28,29,45; Rev 1:19; 22:6 Ka tounah vasi koa nalesi ka naraengoni usil hothotien onen Ahi koa Iesu Kristo vit meseini minau vi anatin, kei varei namutis kati ekok. Rev 1:9; 6:9 Tokolkatien onen Ahi hel en meatin koa vuli tus koanik, ka tokolkatien hel en koakeil emun along selusien ten hothotien koanik ka along kat asa koa mul ien. Veni avong mai vesesal keke tounah keil ekek hekur out. Rev 22:7; 22:10
Selkatien keil koa va min sios oulu (7) koa amul en mari atan ten out Esia
Inau, Sion, namutis selusien koanik va min kami, sios oulu (7) ten provins ten out Esia.* Kosa avise out enek en Turkey. Eks 3:14; Rev 1:8; 4:8; 11:17; 16:5; Aes 41:4; Rev 3:1; 4:5; 5:6
Navisi keke more envatien ka tomat hel ven kami. Keilu luka ven Ahi koa mul kosa, mul mulamu, ka hel en avong koa hemai veah. Luka ven Ninin koa avi oulu (7) koa amul en meten Ahi koa rondan en vulin ten keihoen. Luka mun ven Iesu Kristo koa rokilea rovaling desien orer eni. Kei viten anatinien usil asa koa Ahi vothot eni mini. Kei vi moeite en koakeil imea ran matien, ka vi avat ten asuv keil vasi ten out netan. Rev 3:14; 19:11; Sam 89:27; Kol 1:18; Sam 89:27; Rev 19:16; Sam 130:8; Aes 40:2
Iesu en vat ir, ka ran koa mue en matien sakin ir romaluv ran mahien ten tisaen keil orer. Kei mumon ir romai rovi vangi meatin keil koa hiasuvien onen Ahi mul en moulien orer. Anatin, kei mumon ir rovi vangi pris keil koa romum ven Ahi Tamen. !Ven koanik, rovitehiteni keke hetetamenien ka keihoen mul en Iesu Kristo lises ka lisenges! Anatin. Eks 19:6; Aes 61:6; 1Pit 2:5,9; Rev 5:10; 20:6
!Mihetaengoni! Kei hemita en mahmah keil ka meatin vasi keil ilesi. Anatin, koakeil emun asal vini mulamu ilesi. Hesakin meatin keil en out netan imakul en metauen. Anatin, hemai hekistal hemukonek. Dan 7:13; Mat 24:30; Mak 13:26; Luk 21:27; 1Tes 4:17; Sak 12:10; Sion 19:34,37; Sak 12:10,12,14; Mat 24:30
Ahi Asuv ten Keihoen koa mul kosa, mul mulamu, ka hel en avong koa hemai veah viteni vit, “En tounah vasi keil koa mul, inau naro mulamu eni ka nito katau eni.” Rev 21:6; 22:13; Eks 3:14; Rev 1:4; 4:8; 11:17; 16:5,7,14; Aes 41:4; Amos 3:13; 4:13; Rev 15:3; 19:6,15; 21:22
Iesu Kristo mai ven Sion ka rie lat tounah houlu mini
Inau navi Sion, tuomi tai veni demkatien orer en Iesu Kristo vatte tas. Suval kami, namul nakur mahien ten sakvisien keil ral min rendemien koa taveah navong namul narosin hiasuvien onen Ahi vamai vakistal. Aling inau en eim takeih en titi aelan ten out Patmos veni namul navitehiten asa koa Ahi vothot eni minau ka anatinien usil Iesu min meatin keil. 10 En Sande, avong onen Asuv Iesu, Ninin onen Ahi sien nau ka naraengon rea tai en eisiluk koa keih suval amaru koa musel. 11 Kei viteni minau vit, “!Kitis lat asa koa kilesi heha en tus tai, ka kisani heha ven sios oulu (7) en taon keil ekek: Efeses, Samerna, Pergamam, Taeatira, Sartis, Piladelvia, ka Laodisia!”
12 Navong naviles males isei mul selus minau, nales laet oulu (7) koa avatimal en ai keil teni koa amumoni en gol. 13 Ka luhu en keil, nales meatin tai koa aven mul suval Natin Meatin. Kei musin suval mari meatin tai en eisin tetaveah rokol alen tanetan, ka muan kaliko koa kala teni suval gol mul koe veimasen. Dan 7:13; 10:5; Esek 9:2,11 14 Hilin muoh vis muoh, ka meten vihil keih imok suval ahang. Dan 10:6; Rev 2:18; 19:12; Dut 7:9 15 Alen tanetan vihil suval oai ten vane Selusien kati teni vit, “vihil suval aean brons koa alingi en ahang.” ka ren musel keih suval navong mari tahe mutarum en ahat keil. Esek 1:24; 43:2; Rev 14:2; 19:6 16 En hen matu, vuli kat hitu oulu (7), ka naef tai koa kan lualu kistal ka en ongon. Nan vihil keih imok suval meteiai koa ritin en taviai. Rev 1:20; 2:1; Aes 49:2; Rev 2:12,16; 19:15
17 Navong nalesi, numot navita netan en alen ka nasakras moumon etai tounah suval meatin koa mat. Evus, kei ling hen matu enau ka vit, “!Konametautei! En tounah vasi koa mul, inau nasakini mul ka nisakini hevuol eris. Aes 44:6; 48:12; Rev 2:8; 22:13 18 Inau navi kei koa moul. Avaseini numat, kosa kolesi keke namoul lises ka lisenges. Ka alingi en hek, ki Ki enek vi tatavolien koa vit Iesu kur keihoen keke valuvat meatin keil ran keihoen ten matien. keil ten matien ka ten out Hedis, out koa ninin onen meatin keil koa umat uva amul ien. 19 Kitis lat tounah keil komul kolesi, asa koa hekur out en avong kosa ral min asa koa hemai hekistal en avong koa hemai veah. Aes 48:6; Dan 2:28,29,45; Rev 1:1; 22:6 20 Aneite ten rendemien suai usil hitu oulu (7) koa kolesi amul en hek matu vi tatavolien usil sios oulu ten out Esia. Ka laet oulu ekek koa vi gol, keil avi tatavolien usil angelo oulu koa alei kokoe en sios keil enek.” Rev 1:16; 2:1; 3:1

^ Rev 1:1,4,9; 22:8

^ Rev 1:11,19; 22:6

^ Rev 2:4,14,20; 3:2,15

^ Rev 2:13:22

^ Rev 2:7,9-10,13,19,26; 3:5,21

^ Rev 1:8,17; 4:122:21

^ Rev 1:9

^ Rev 1:10-20; 19:11-21

^ Rev 6:9-11

^ Rev 2:7,11,17,26; 3:5,12,21; 7:14; 12:11; 15:2

^ Rev 3:18; 12:11; 16:15

^ Rev 21:122:5

1:1: Dan 2:28,29,45; Rev 1:19; 22:6

1:2: Rev 1:9; 6:9

1:3: Rev 22:7; 22:10

*1:4: Kosa avise out enek en Turkey.

1:4: Eks 3:14; Rev 1:8; 4:8; 11:17; 16:5; Aes 41:4; Rev 3:1; 4:5; 5:6

1:5: Rev 3:14; 19:11; Sam 89:27; Kol 1:18; Sam 89:27; Rev 19:16; Sam 130:8; Aes 40:2

1:6: Eks 19:6; Aes 61:6; 1Pit 2:5,9; Rev 5:10; 20:6

1:7: Dan 7:13; Mat 24:30; Mak 13:26; Luk 21:27; 1Tes 4:17; Sak 12:10; Sion 19:34,37; Sak 12:10,12,14; Mat 24:30

1:8: Rev 21:6; 22:13; Eks 3:14; Rev 1:4; 4:8; 11:17; 16:5,7,14; Aes 41:4; Amos 3:13; 4:13; Rev 15:3; 19:6,15; 21:22

1:13: Dan 7:13; 10:5; Esek 9:2,11

1:14: Dan 10:6; Rev 2:18; 19:12; Dut 7:9

1:15: Selusien kati teni vit, “vihil suval aean brons koa alingi en ahang.”

1:15: Esek 1:24; 43:2; Rev 14:2; 19:6

1:16: Rev 1:20; 2:1; Aes 49:2; Rev 2:12,16; 19:15

1:17: Aes 44:6; 48:12; Rev 2:8; 22:13

1:18: Ki enek vi tatavolien koa vit Iesu kur keihoen keke valuvat meatin keil ran keihoen ten matien.

1:19: Aes 48:6; Dan 2:28,29,45; Rev 1:1; 22:6

1:20: Rev 1:16; 2:1; 3:1