1 Evus, nalesi keke teilang nesa ka out netan koa luvi heite hau lukikistal. Teilang nesa ka out netan telamu luvupuol, ka atas tovuol emun. ✡Aes 65:17; 66:22; 2Pit 3:13 2 Nales taon ten out Serusalem koa vi heite hau, kei mun kistal. Anatin, Taon Votut onen Ahi mul mita netan ran out nesa ven Ahi. Nalesi keke taon enek tahos imok suval ahin koa musin revi kei ven tetaliheien onen keke vaha vales meatin onen. ✡Aes 52:1; Rev 3:12; Aes 61:10; Hib 11:10,16 3 Evus, nalong rea takeih tai selus ka vesesal en mari vulin ten keihoen onen Ahi vit,

5 Evus, tai koa rondan en mari vulin ten keihoen viteni vit, “?Milesi? !Kosa, namumon tounah vasi mai vi heite hau!” Evus, kei viteni mun minau vit, “Kitis selusien koanik, veni selusien keil enek vi anatin ka meatin kilea valing desien onen eni.” ✡1Ki 22:19; 2Kron 18:18; Sam 47:8; Aes 6:1; Esek 1:26-27; Rev 4:2,9; 5:1,7,13; 6:16; 7:10,15; 19:4; 2Kor 5:17 6 Ka kei viteni vit, “!Vus tuai, namum vasin asa koa ek vati moumoni! En tounah vasi keil koa mul, inau naro mulamu eni ka nito hekatau eni. Anatin, nasakini mul ka nisakini hevuol. Min etai koa maroro kati, inau nisa maen oai hemuni koa ka en vulioai koa san moulien ten lisenges. ✡Rev 1:8; 22:13; Aes 44:6; 48:12; Rev 1:17; 22:13; Aes 55:1; Sion 7:37; Rev 22:17; Sam 36:9; Ser 2:13 7 Koakeil ihatimal hekeih en vaeen ten demkatien, keil ikur tounah keil vasi enek ranau keke hehi one ten lisenges. Inau nihi Ahi one, ka keil ihi titak keil. ✡2Saml 7:14 8 Ka en usite onen koakeil ulie metau, koakeil aviles ran Iesu, koakeil amusil kat sakien keil ten out netan, koakeil amu vini meatin, koakeil amumon sakien ten hoeasoen, koakeil amumon eimas, koakeil uva netan min nana keil, ka koakeil taluvosien; koakeil vasi amukonek, keil iha en vuli ahang koa suval vuli ahang ten vane. Koanik vi matien koa elu ten lisenges.” ✡Aes 30:33; Mat 25:41; Rev 19:20; 20:10,15; Sen 19:24; Sam 11:6; Esek 38:22; Rev 19:20

9 Tai en angelo koa oulu (7) koa akur pesin oulu (7) vilelau en mahien ekor, kei emai venau ka vit, “Amai, ka nitie minuk ahin koa hetetalihe hetal min kei koa suval sipsip.” 10 Evus, Ninin onen Ahi sienau ka angelo kur nau melvina nesa en mari hou tai. Ekonek, kei rie Serusalem Hau koa vi Taon Votut minau, ka nalesi mul mita netan ran out nesa ven Ahi. ✡Esek 40:2 11 Kei vihil ral min muohien onen Ahi. Anatin, nalesi vilahil suval ahat koa tahos imok, suval saspa koa mekaikai suval kilas. ✡Aes 60:1,2,19 12 Vieh ten taon mariso ka taveah vina nesa. Meteau teni teindan elu (12) ka angelo teindan elu (12) alei kokoe en meteau keil enek. Nesa en meteau keil enek, amutis isen mari vatiamal teindan elu (12) onen me-Isrel keil. ✡Eks 28:21; Esek 48:30-35 13 Meteau etel amul en usite vasi keil; etel en usite koa ist, etel en usite koa saot, etel en usite koa not, ka etel en usite koa wes. 14 Vieh ten taon enek, vatte teni vi mari ahat teindan elu (12), koa amutis isen eiloheh teindan elu (12) onen kei koa suval sipsip mul ien.

15 Angelo koa selus minau kur ai tai koa vi gol koa akur mita eni. Nalesi navong vuli mita keil ten taon, ten meteau keil, ka ten vieh keil emun teni. ✡Esek 40:3,5 16 Taon enek, usite vasi keil teni ral min taveah teni vatte tas. Navong angelo vuli, votini keke taveah teni vi stadia*Stadia tai suval out ten futbol koa marite. Ka 12,000 stadia vinvin en 2,400 kilomita. taosen teindan elu (12,000). ✡Esek 48:16,17 17 Evus, angelo kur hulhulien ten vieh teni, votini keke matetel teni rokol kiubit handred tai hanumau elu ka ahat emun (144).†Kiubit tai suval taveah ten urulin meatin rokol kalihen. Ka 144 kiubit vinvin en 60 mita. Navong angelo kur hulhulien ten tounah keil enek, kei musil sakien ten hulhulien onen meatin keil ten out netan. 18 Vieh amumoni en ahat koa merentas koa avise en saspa. Ka taon enek, amumoni en gol koa mutolas ka vilahil suval navong meteiai ritin en kilas. 19 Ahat keil koa avi vatte ten vieh ten taon, keil amosan en keil en mormore ahat keil. Koanik ahat keil koa alingi ihi vatte teni: koa mulamu (1) vi saspa, koa elu (2) en keil vi safaea, ka koa etel (3) en keil vi akat. Ka nesa eni, koa ehat (4) en keil vi emeral, ✡Aes 54:11-12 20 koa elim (5) en keil vi onikis, ka koa ahetai (6) en keil vi kanilian. Evus, koa oulu (7) en keil vi krisolaet, koa outel (8) en keil vi beril, ka koa ouhat (9) en keil vi topas. Ka nesa eni, koa halualim (10) en keil vi krisopres, koa teindan tai (11) vi takois, ka koa teindan elu (12) vi ametis. 21 Meteau teindan elu (12) keil enek avi veimesau keil tetahos; tetai en meteau keil enek amumoni en mari veimesau tas. Sise keil ten taon vi gol koa mutolas imok, koa vilahil suval kilas koa mekaikai.

22 En taon enek, narlestei Eim Votut tai val ien, veni Ahi Asuv ten Keihoen ka kei koa suval sipsip mul en mesai ka meatin keil akilea avaha netan min keilu en out vasi. ✡Amos 3:13; 4:13; Rev 1:8; 4:8; 11:17; 15:3; 16:7,14; 19:6,15 23 Taon enek, muohien onen Ahi enges ritin eni, ka kei koa suval sipsip vi meneai teni. Sakini meatin keil teni armundem ramat entei meteiai vuo avati. ✡Aes 60:19-20; Rev 22:5 24 Meatin keil ten out netan ual en meneai teni, ka asuv houlu keil emun ilah mormore tounah keil one iha eni keke isani min Ahi ka min kei koa suval sipsip. ✡Aes 60:3,5 25 Meteau keil ten taon enek itah lises. Irkotehtei en keil avong etai, veni vongien hetovuol en out enek. ✡Aes 60:11; Sak 14:7; Rev 22:5 26 Meatin keil ten out netan ilah mormore tounah keil one heha en taon keke isani min Ahi ka min kei koa suval sipsip. ✡Sam 72:10-11 27 En taon enek, meatin koa sak kalkali, vuo koa mumon tounah tatisaso, vuo koa mul luvos, vulie hetovuol ien. Ka koakeil enges ise amutisi en Tus ten Moulien onen kei koa suval sipsip, keil enges akilea iha ka ito en taon enek. ✡Aes 52:1; 1Kor 6:9-10; 2Pit 3:13; Rev 22:15; Eks 32:32,33; Sam 69:28; Dan 12:1; Plp 4:3; Rev 3:5; 13:8; 17:8; 20:12,15