1 Katau en tounah keil enek, nales angelo ehat (4) amulomal en usite ehat (4) ten out netan. Keitel telring kat angu ehat (4) keke anou lintei tounah keil en out netan, vuo en atas vuo en vatiai etai. ✡Ser 49:36; Esek 37:9; Dan 7:2; Sak 6:5; Mat 24:31 2 Ka nales angelo tateisav tamun mea ran out ist, vuli kat siil koa isen Ahi koa moul mul ien. Kei viso keih va min angelo keil ehat koa Ahi san keihoen min keil avapurun out netan ka atas vit, 3 “Minapuruntei out netan, atas, vuo vatiai keil hetokol avong meheling metai en veinan eiloheh keil koa avi onen Ahi orer hetal min siil onen.” ✡Esek 9:4; Rev 9:4

4 Ka nakur longlongien ten hulhulien onen koakeil akur metai onen Ahi rokol taosen heite handred tai hanumau elu ka ehat mun (144,000). Koakeil enek aka en mari vatiamal teindan elu (12) ten out Isrel: ✡Rev 14:1,3 5-8 Taosen heite teindan elu (12,000) aka retai en vatiamal vasi keil: Sudah, Ruben, Kat, Aser, Navtali, Manase,*Manase, isen sav vi Dan (Sen 35:26). Simeon, Livae, Isekar, Sebiulon, Siosep ka Bensamin.

9 Evus, nalele ka nales vangi meatin keil avi houlu vis avi houlu mok, meatin sakras vahul vasin keil. Vangite keil aka en meatin tateisav vasi keil, en vatiamal vasi keil, en kantri vasi keil, ka en selusien vasi keil. Keil vasi umai amulomal en meten kei koa mul en mari vulin ten keihoen ka en meten kei koa suval sipsip. Amusin en eisin tamuoh, ✡Rev 3:5,18; 4:4; 6:11; 7:13; 19:14 avuli kat oumeil en he 10 ka avisohiso keih min keilu avit, “!Memasmas Ahi onomai koa mul rondan en mari vulin ten keihoen ka kei koa suval sipsip ten sanien votut, veni keilu lumutut moulien onomai!” ✡1Ki 22:19; 2Kron 18:18; Sam 47:8; Aes 6:1; Esek 1:26-27; Rev 4:2,9; 5:1,7,13; 6:16; 7:15; 19:4; 21:5

11 Navong aviteni mukonek, angelo vasi keil koa amul rahit mari vulin ten keihoen, elda keil, ka tounah ehat (4) koa amoul, keil umot avita netan min kei koa mul rondan ien, nae rokol atan, ka amasmasi. 12 Ka navong angelo keil enek amasmasi, avit,

13 Evus, tai en elda keil vis nau vit, “?Meatin keil ekek koa amusin en eisin tamuoh, kokilea keil aka kave?” ✡Rev 3:5,18; 4:4; 6:11; 7:9; 19:14

14 Ka navit kesi mini vit, “Hetetamen, inau nareingeingeni, ka keik kokilea.” ✡Dan 12:1; Mat 24:21; Mak 13:19

Sakini kei viteni minau vit, “Meatin keil ekek, keil amulomal keih rokol keite ten mari sakvisien takeih en out netan. Keil akas eisin ome en ran kei koa suval sipsip ka eisin keil ome mai muoh. 15 Ven koanek, keil amulomal en meten Ahi koa mul en mari vulin ten keihoen onen, ka vongien ka meneai aros ral mini en Eim Votut onen ka uva netan mini. Kei koa rondan en mari vulin ten keihoen helei kokoe en keil. ✡1Ki 22:19; 2Kron 18:18; Sam 47:8; Aes 6:1; Esek 1:26-27; Rev 4:2,9; 5:1,7,13; 6:16; 7:10; 19:4; 21:5 16 Amai ka maroro herkattei mun keil ka meteiai sisil herkantei mun keil ka saloh herpuruntei keil, ✡Aes 49:10 17 veni kei koa suval sipsip koa mulomal en mari vulin ten keihoen helei kat revi keil. Helamun keil suval meatin mulamun sipsip keil, ka hetie sise min keil iha en vulioai ten moulien. Ka siamet ten mahien keil one, Ahi houul lati ran mete.” ✡Sam 23:1; Esek 34:23; Sion 10:11,14; Sam 23:2; Aes 49:10; Ser 2:13; Aes 25:8; Rev 21:4