10
Tatavolien usil meatin koa losil kat revi sipsip keil osen
1 Iesu viteni min Farasi keil vit, “Anatin eli naviteni min kami, meatin keil ekek asuval sipsip keil osen Ahi. Ka koakeil armaitei en yad one avaka en meteau kati, ka amul uvut laui vieh teni, keil avi tarhena keil ka lariken keil. 2 Ka kei koa va neim en yad ka en meteau teni, kei vi meatin kati koa mul losil kat sipsip keil osen. 3 Navong mai, meatin koa mul lei kokoe en yad lei kilea eni ka sehen meteau veni. Ka navong kei vise retai en sipsip osen keil en ise kati, sipsip keil along kilea ren, ka kei mulamun keil uva hae. 4 Ka navong lah lat osen keil vasi uva hae, kei mual mulamu en keil. Sipsip keil osen amusil kati veni along kilea ren.✡Sion 10:27 5 Keil asakras avousil meatin sav tai. Anatin, ilohosai rani veni arlong kileatei ren.” 6 Farasi keil along tatavolien koa Iesu viteni min keil, ka areingeingen aneite teni.✡Sion 16:25
7 Sakini, Iesu vit kilea min keil vit, “Anatin eli naviteni min kami, inau navi meteau koa sipsip keil uva neim ien. 8 Meatin keil koa umai mulamu enau, keil vasi avi tarhena ka lariken keil. Ka sipsip keil arlong kattei keil.✡Ser 23:1-2; Esek 34:2-3 9-10 Tarhena keil umai keke avahenan tounah, avou vini sipsip keil, ka avapurun tounah keil. Ka inau navi meteau ten yad. Ka koakeil umai neim ka uva hae aka enau, Ahi houtut moulien one, ka ihotin oumunai koa hetahos. Anatin, numai keke nakilea masan moulien min meatin keil, moulien tai koa vilelau en tahosien.✡Sam 118:20; Sion 14:6
11 “Ka inau navi more meatin talosilkatien onen sipsip keil emun. Ka inau nasak mesei keke mamae lat moulien onak ka mamat vahinat sipsip keil osak.✡Sam 23:1; Aes 40:11; Esek 34:15; Hib 13:20; Rev 7:17; Sion 15:13; 1Sion 3:16 12 Munak meatin toumien enges mul losil kat sipsip keil les huli rendan tai mai, kei hemetau ka helohosai ran sipsip keil veni arvitei osen kati. Hesakini, huli rendan enek hemai heat vini tei en sipsip keil ka helikat rasilin teisav keil.✡Umen 20:29 13 Anatin, meatin toumien mul lohosai veni kei losil kat keil keke vakur ui umen teni enges, ka envatien onen romultei en sipsip keil. 14-15 Ka inau navi more meatin talosilkatien onen sipsip keil. En vati sakien koa Tata onak kilea enau ka inau nakilea eni, inau nakilea en sipsip keil osak ka keil akilea enau. Ka nasak mesei keke mamae lat moulien onak mamat vahinat keil.✡Sion 10:27; 2Tim 2:19; Mat 11:27; Sion 15:13; 3:16
16 “Sipsip sav keil osak amul koa ateisav en sipsip keil koa amul en yad koanek.*Vahesa Iesu mul selus usil koakeil amusili koa arvitei Siu. Mal keke niha nilah keil emun imai. Keil ilong rek, ka imai ilah ruai hetal min sipsip keil ekek. Hemukonek, imai ihi vangi sipsip hetas, ka inau tas nihi meatin talosilkatien one.✡Aes 56:8; Sion 11:52; 1Pit 2:25; Esek 34:23; 37:24 17 Tata onak, envatien onen mul enau veni nasak mesei masa lat moulien onak en usite one. Ka hekatau, nakilea makur risi.✡Plp 2:8-9 18 Meatin tovuol vakulat moulien onak ranau. Ka naling rendemien onak keke masa lati. Inau nakur keihoen keke masa lat moulien onak, ka nakur keihoen keke makur risi. Koanik vi asa koa Tata onak meng kat inau keke moumoni.”✡Sion 14:31; 15:10
19 Navong meatin keil along selusien keil onen, Siu keil akur rendemien elu usil Iesu.✡Sion 7:43; 9:16 20 Keil houlu amul aviteni avit, “!Ninin tisa tai mul ien ka sakini selus vau! ?Vensa varei kami mimul milong selusien keil onen?”✡Mak 3:21-22; Sion 7:20
21 Ka keil koa mun amul aviteni avit, “Selusien onen rosuvaltei selusien onen meatin tai koa ninin tisa tai mul ien. Ka meatin koa ninin tisa mul ien sakras voumon metovar tai valele vasuval koa Iesu mumoni.”
Hetetamen keil onen Siu keil asesein Iesu
22 Avati elu muli va, ka vi Disemba, avong mal keke avoumon Ale ten Tokolkatien†En sua 168 BC (sua keil mulamu en avong koa Iesu avasi) me-Siria keil uvae lin koakeil aro en out Serusalem. En avong enek, asuv houlu one Antiokus Epifanis sakin Eim Votut onen Ahi mai vi eim votut onen ahi sav tai koa avise en Sius. Ka muas vuas tai ien mini koa vi tounah tai koa tisa vis tisa revi mok en meten Siu keil. Ka sua etel koa katau eni, Siu tai, isen Sudas Makabias, mai ka vae lin keil esuk. Keil akas motein Eim Votut onen Ahi ka pris keil arokol kat risi. Sakini, en Disemba vasi keil, Siu keil amumon Ale ten Tokolkatien en out Serusalem keke avandem kat avong enek. en out Serusalem. 23 Iesu emai ka mul mual en teahu ten Eim Votut, out tai koa avise en veranda onen Solomon.✡Umen 3:11; 5:12 24 Navong Siu keil alesi, akarahiti ka avisi avit, “?Nengeis varei kihit luvati min komai keke kovi isei varei? Munak kovi Mesaea anatin koa Ahi vat kati vit hesani hemai, kihit leini.”✡Luk 22:67
25 Ka Iesu vit kesi vit, “Navit leini tuai min kami. Ka kami mirkurtei anatin eni. Tounah keil koa namumoni en keihoen onen Tata onak arie lati keke navi isei.✡Sion 5:36; 10:38 26 Ka avaseini, kami mirkurtei anatin enau veni mirvitei sipsip keil osak.✡Sion 6:64; 8:45 27 Veni sipsip keil osak along kilea rek. Inau nakilea en keil, ka keil amusil inau.✡Sion 8:47; 10:3 28 Min keil, namul nasan moulien ten lisenges ka irvuoltei en avong etai. Ka meatin tovuol kilea vasav lat keil ran hek.✡Sion 17:2; 3:16; 6:39; 17:12; 18:9 29 Tata onak san keil minau, ka kei marite mok mulin tounah vasi. Sakini, meatin tovuol kilea vasav lat keil ran hen Tata. 30 Ka Tata onak ka inau meltas.”✡Sion 17:21
31 Navong along selusien one, Siu keil alah ahat keil keke avov vini.✡Sion 8:59
32 Ka Iesu viteni min keil vit, “Inau namumon mormore tounah keil houlu en metomi koa Tata onak san keihoen minau moumoni mormore tounah keil houlu. ?More umen sa varei keke miheov vini inau veni?”
33 Avit kesi avit, “!Komai emai rovattei mevov vinik ven more umen tai, ka mevit meheov vinik veni komul koselus kekar va kat Ahi varei! !Keik kovi meatin kuren tai ten out netan enges, ka koselus suval keik kovinvin ral min Ahi!”✡Lev 24:16; Mat 26:65; Mak 14:64; Sion 5:18
34 Iesu vit kesi vit, “Amutisi en mengkatien keil onami avit, ‘Kami mivi ahi keil.’ Sam keil 82:6 35 Rokilea keke selusien onen Ahi rovilestei. Sakini, munak Tus Votut vise meatin keil ekek en ahi keil,✡Mat 5:18; Luk 16:17 36 anatin imok en inau. Veni inau navi kei koa Tata rie lat inau ka sila inau namita en out netan. Sakini, narselus kekartei vaha kat Ahi navong naviteni keke navi Natnali.✡Sion 5:17-20
37 “Munak narmumontei merikel keil koa Tata onak sani minau moumoni, mal keke mirkurtei anatin enau. 38 Ka munak namul namumon merikel keil, avaseini mirkurtei anatin enau, mal keke mihekur anatin en tounah koa namul namumoni. Hemukonek, miheilea keke Tata mul kapil vituai ral minau, ka inau namul nakapil vituai ral mini.”✡Sion 14:10-11; 17:21 39 Hatte tamun, asak visi avahuli kat Iesu, ka kei mea ran he.✡Sion 7:30; 8:20; Luk 4:30; Sion 7:30
40 Evus, Iesu va en Oaisal Sodan ka mu kotehei va en usite. Iesu ka meatin keil onen aro ekonek, en out koa, mulamu, Sion vi baptaes en meatin keil ien.✡Sion 1:28 41 Meatin houlu umai keke avalesi. Ka amul aviteni min keil eris avit, “Avaseini keke Sion romumon etai merikel, tounah vasi koa kei viteni usil meatin enek mai vi anatin.”✡Sion 1:26-34; 3:27-28 42 Ka meatin keil houlu ekonek akur anatin keke Iesu vi Mesaea koa Ahi vat kati vit hesani hemai.✡Sion 2:23; 7:31; 11:45; 12:11,42
✡10:8: Ser 23:1-2; Esek 34:2-3
✡10:9-10: Sam 118:20; Sion 14:6
✡10:11: Sam 23:1; Aes 40:11; Esek 34:15; Hib 13:20; Rev 7:17; Sion 15:13; 1Sion 3:16
✡10:14-15: Sion 10:27; 2Tim 2:19; Mat 11:27; Sion 15:13; 3:16
*10:16: Vahesa Iesu mul selus usil koakeil amusili koa arvitei Siu.
✡10:16: Aes 56:8; Sion 11:52; 1Pit 2:25; Esek 34:23; 37:24
✡10:20: Mak 3:21-22; Sion 7:20
†10:22: En sua 168 BC (sua keil mulamu en avong koa Iesu avasi) me-Siria keil uvae lin koakeil aro en out Serusalem. En avong enek, asuv houlu one Antiokus Epifanis sakin Eim Votut onen Ahi mai vi eim votut onen ahi sav tai koa avise en Sius. Ka muas vuas tai ien mini koa vi tounah tai koa tisa vis tisa revi mok en meten Siu keil. Ka sua etel koa katau eni, Siu tai, isen Sudas Makabias, mai ka vae lin keil esuk. Keil akas motein Eim Votut onen Ahi ka pris keil arokol kat risi. Sakini, en Disemba vasi keil, Siu keil amumon Ale ten Tokolkatien en out Serusalem keke avandem kat avong enek.
✡10:28: Sion 17:2; 3:16; 6:39; 17:12; 18:9
✡10:33: Lev 24:16; Mat 26:65; Mak 14:64; Sion 5:18
✡10:39: Sion 7:30; 8:20; Luk 4:30; Sion 7:30
✡10:42: Sion 2:23; 7:31; 11:45; 12:11,42