14
Hetetamen keil onen Siu keil alekat sise avouas Iesu vamat✡Mat 26:1-5; Luk 22:1-2; Sion 11:45-53
1 Avong elu sesuk hetokol avong Siu keil amundem kat ‘Avong keil ten Veret koa Is Tovuol Ien.’ En avong koa mulamu eni amumon ‘Anien ten Mul Laui.’ Sakini, asuv keil onen pris keil ka tiser keil ten mengkatien onen Mosis alah ruai keke avatun lekat sise koa ika suai ien ihuli kat Iesu ka uasi hemat.✡Mak 11:18; Luk 19:47 2 Ka amul avit, “Rehermumontei en avong ten ale, veni hetisa meatin keil anoumon rea.”
Iesu va en anien tai ka ahin tai rie lat houhouen onen mini✡Mat 26:6-13; Sion 12:1-8
3 Navong Iesu mul veah en meteimal ten out Betani, mul kanian en teim sen Saemon koa mulamu mesaien ten leprosi mul en hiliven. Ka ahin tai mai neim, kur oel koa vite tahos imok, ka mani teni va nesa.*Veite amumoni en ahat tamuoh koa avise en alabasta ka oel koa mul ien amumoni en lite ten vati nard. Ka kiles lat meten ka mutahi en vatin Iesu vatie lati keke vouhou mini.✡Luk 7:37-38 4 Koanek sakin koakeil amul en out enek avuroh kati ka amul arun kutut eni ral min keil eris avit, “?Vensa varei kei mul purun oel mukok? 5 Vahit kei vasalem eni, kilea vakur mani handred etel (300).†Selusien kati vit, “300 denarie,” koa suval 300,000 vatu. Evus, kei kilea vasan mani keil enek vaha min koakeil tounah one tovuol.” Sakini avul kati.
6 Ka Iesu vit, “!Allokoveini! ?Vensa mimul mimumoni mini mukonek? Kei mumon more tounah minau. 7 Koakeil tounah one tovuol ito hetal min kami lises. Ka mikilea mivakataun keil lisenges, mul esuk en kami. Ka inau, nirtotei hetal kami lises.✡Dut 15:11 8 Ahin ekek mumon tounah koa kei kilea voumoni. Ka navong mutah oel enau, kei mul sak mesein avek ven tetahinien onak.✡Sion 19:40 9 Anatin eli naviteni min kami, en out vasi netan koa ihitehiten more longlongien usil inau, ihiteni mun asa koa ahin enek mumoni minau. Ka hesakin meatin sav keil emun indem silat kei.”
Sudas maeni keke vasa lat Iesu va en hen asuv keil onen pris keil✡Mat 26:14-16; Luk 22:3-6
10 Navong akanian evus, Sudas Eskariot, tai en meatin teindan elu (12) onen Iesu, va ven asuv keil onen pris keil keke hemae lat Iesu heha en he. 11 Keil asi keil navong araengoni, ka avat kati mini avit ihuli. Sakini, Sudas mul lekat sise heka ien hemae lat Iesu min keil.
Iesu kan Anien ten Mul Laui ral min meatin keil onen✡Mat 26:17-29; Luk 22:7-14,21-23; Sion 13:21-30
12 Navong Avong keil ten Veret koa Is Tovuol Ien emai, en visokon ten avong tai teni, teim sen Siu vasi keil amul asak mesei avouas sipsip keil koa avaani en Anien ten Mul Laui. Meatin teindan elu (12) onen Iesu avisi avit, “?Out kave em vati mevasak mesein Anien ten Mul Laui ien?”✡Eks 12:6; 14:20
13 Sakini, Iesu viteni min meatin onen elu vit, “Milheha Serusalem, milhehisu min meatin tai koa mul vous veioai, milhousili. 14 Ka navong milhelesi va neim, milhehiteni min meatin koa eim onen milhehit, ‘Tiser onomai en vati vailea keke out kave hean Anien ten Mul Laui vatal meatin onen keil ien.’ 15 Hevus, meatin ten eim hekur kamil mithehina, hetie lat out koa mariso ka sak revi tuai. Milhesak mesein anien en out enek.”
16 Sakini, keilu luva Serusalem ka lules tounah vasi suval koa Iesu viteni min keilu. Ka lusak mesein Anien ten Mul Laui en out enek.
17 En vongien enek, Iesu ral min meatin onen keil uva en out ten anien. 18 Ka navong amul akanian ruai, Iesu viteni min keil vit, “Anatin eli naviteni min kami, tai en kami koa mul kanian ral minau ekok, kei varei hemae lat inau niha en hen meatin tatisa keil.”✡Sam 41:9
19 Koanek sakin meatin onen keil alonge tisa, ka keil avis Iesu, tai vis ka teisav, avit, “?Asuv mukave, komundemi kovit inau?”
20 Ka Iesu vit kesi vit, “Tai en kami koa romul rokanian ruai ral minau. 21 Ka anatin keke Natin Meatin hemat hesuval koa Tus Votut viteni. Ka hetisa suk min kami tai koa hemae lati. Meatin enek, tahos imok kei vahit avarvasitei, veni Ahi hesan mahien mini hemarite mok.”
Anien votut onen Asuv Iesu✡Mat 26:26-30; Luk 22:14-20; 1Kor 11:23-25
22 Navong amul akanian, Iesu kur veret ka san masmasien veni. Evus, vul vahasi ka riti min meatin keil onen ka viteni min keil vit, “Mihekuri miheani. Koanik vi avek.”✡Mat 14:19; 15:36; Mak 6:41; 8:6; Luk 9:16
23 Evus, Iesu kur veiuaen, san masmasien veni, ka sani min keil amuni, tai vis ka teisav.✡1Kor 10:16 24 Ka viteni min keil vit, “Uaen koanik vi rak vasakin hatkatien hau onen Ahi vakeih ka vamai vahi anatin.‡Mosis mutah ran buluk en ahor ten sanien vasakin hatkatien matu koa me-Isrel keil amumoni ral min Ahi vamai vakeih ka vahi anatin (Eks 24:6-8). Rak houe hesakin meatin houlu ikur moulien.✡Eks 24:8; Sak 9:11; Hib 9:20 25 Anatin eli naviteni min kami, nirmuntei mun uaen koanik hetokol avong koa nimun ris uaen hau en out koa Tata onak vi asuv houlu ien.”
26 Navong akanian evus, amusau en souen tai ka asital avina en Hou Nei Olip.✡Sam 113–118; Luk 22:39
Iesu vit luvati keke meatin keil onen ilohosai rani✡Mat 26:31-35; Luk 22:31-34; Sion 13:36-38
27 Navong arokol Hou Nei Olip, Iesu selus min meatin onen keil vit, “Kami vasi mihelokovein inau hesuval koa Ahi viteni en Tus Votut koa vit,
‘Nuas meatin koa losil kat sipsip keil,
28 Ka navong nimoul eris ran matien, nilamu en kami niha en out Kaleli.”✡Mak 16:7
29 Pita mea selus vit, “!Nahi koakeil ekek ilokoveinuk, ka inau, nasakras!”
30 Ka Iesu vit risi mini vit, “En vongien enek, out hermulantei mau, ka ato herkokorattei mau hatte helu; ka keik, kihiteni hatte hetel keke korkileatei inau.”
31 Ka Pita viteni keih tamun vit, “!Vuo, hermukteinek! !Inau, nimat hetal minuk! !Inau, nasakras mahiteni keke mahit inau narkileatei keik!” Ka keil vasi aviteni vatte tas.✡Sion 11:16
Iesu vis min Ahi en out Ketsemani ka ling moulien onen en hen✡Mat 26:36-46; Luk 22:39-46
32 Iesu ral min meatin onen keil, uva en out koa avise en ‘Ketsemane’ ka viteni min keil vit, “Mihetondan ekok, mihetosinau. Maha mau, mahis.”✡Sion 18:1
33 Ka kur Pita, Tiemes ka Sion, telmusili. Iesu en von ka mundemko houlu.✡Mat 17:1; Mak 5:37; 9:2; 13:3; Luk 5:10; 6:14; 8:51; 9:28; Umen 1:13 34 Ka viteni min keitel vit, “Demkoen vil en tinok, vit vahonet inau. Mitheto ekok, mithele hetal minau.”✡Sam 42:5,11; 43:5; Sion 12:27; 4:9
35 Iesu mual ran keitel havivis, retengeiril va netan, ka vis Ahi hekulat avong takeih enek rani. 36 Kei viteni vit, “Tata onak eli. Kokilea kovoumon tounah vas. Konoumontei li nau nanalong mahien. Ka kirmumontei hesuval koa inau ek vati. Kumonis hesuval koa keik em vati.”✡Rom 8:15; Kal 4:6; Sion 5:30; 6:38
37 Navong Iesu muris, votini keke keitel telmatil. Sakini, viteni min Saemon Pita vit, “?Pita, komatil? ?Kosakras kovatos kovalei avong vahi havivis? 38 !Kamitel, telmea! !Telhis keke mithermottei navong sakvisien keil hemai en kamitel. En tinomi, emi vati mivoumon asa koa mal, ka avemi memerau enges.”✡Mat 6:13; Luk 11:4
39 Iesu va ris ka vis en vati hisien koa vis eni mulamu. 40 Ka navong muris mai ven keitel, votini keke keitel telmatil eris. Telsakras telvahuli kat metalong. Sakini, telmemou ka telreingeingen tounah koa telhehiteni mini.
41 Ka navong Iesu muris ven keitel hatte etel eni, viteni min keitel vit, “?Mitmatil eris? ?Mitmuseh veah? !Vus tuai! ?Mitlesi? Ekek, avong mai avasa lat Natin Meatin vaha en hen meatin tisa keil. 42 !Telmea, tovaha! Meatin koa vasa lat nau keie, mai tuai.”
Avuli kat Iesu✡Mat 26:47-56; Luk 22:47-53; Sion 18:3-12
43 Navong Iesu mul semau selus, Sudas koa vi tai en meatin teindan elu (12) onen kistal. Ka meatin keil amusili umai, alah kat mari naef ka ai tavaeen keil. Umai musil rendemien onen asuv keil onen pris keil, elda keil ten out Serusalem ka tiser keil ten mengkatien onen Mosis.✡Mat 16:21; 27:41; Mak 8:31; 11:27; 14:53; 15:1; Luk 9:22; 20:1 44 Sudas vat kati min keil vit, “Meatin koa nimusi, koanek keke mihehuli kati, mihesar kati ka mihekuri miheha.”
45 Ka navong Sudas va vesesal ven Iesu, vise vit, “!Tiser!” Evus, kav kati ka musi en vivin. 46 Sakini, meatin keil enek avuli kati.
47 Ka tai en keil vati mul vesesal en out enek, leh lat mari naef onen ka musah koteh ralingen slev onen asuv houlu onen pris keil.
48 Ka Iesu vis meatin keil enek vit, “?Vensa mimai milah kat naef ka ai tavaeen keil? ?Mimai keke mivahuli kat inau vasuval navi tarhena tai? 49 En avong vasi navisein meatin keil en teahu ten Eim Votut vesesal ven kami, ka mirvuli kattei nau. Ka tounah koa mimumoni sakin asa koa Tus Votut viteni usil inau hemai hehi anatin.”✡Luk 19:47; 21:37; Sion 18:20
50 Ka meatin keil vasi onen Iesu alokoveini ka aloh rasil.✡Sak 13:7; Mat 26:31; Mak 14:27
51 Ka litetai tai koa kav koe en kaliko tas, muleh musil Iesu. Ka navong meatin keil asasa avuli kati, 52 lokovein kaliko onen mules ka muloh hon enges.§Litetai koanek, amundemi avit vi Mak koa mutis tus enek.
Hetetamen keil onen Siu keil akur Iesu va en kot✡Mat 26:57-68; Luk 22:54-55,63-71; Sion 18:13-14,19-24
53 Ka meatin keil koa avuli kat Iesu akuri va en asuv houlu onen pris keil. Ka asuv keil onen pris keil, ral min elda keil ten out Serusalem, ka tiser keil emun ten mengkatien onen Mosis alah ruai en out tas ekonek.✡Mat 16:21; 27:41; Mak 8:31; 11:27; 14:43; 15:1; Luk 9:22; 20:1 54 Ka Pita mul lehni musil keil va vio … arokol teahu ten teim sen asuv houlu onen pris keil. Pita rondan ral min meatin taleikokoeien keil koa alosil kat teim enek, ka mul mutae ahang.
55 Asuv keil onen pris keil ka hetetamen sav keil emun koa aro en out ten kot enek, amul alekat meatin koa heselus hetisa heha kat usite onen Iesu en kot keke akilea avouasi vamat. Ka arvotin etai meatin. 56 Meatin houlu aviten luvosien va kat Iesu, ka en selusien keil one armaitei en rendemien vatas.
57 Ka en avong enek, tei en meatin keil amulomal aluvos eni avit, 58 “Metlonge keke kei vit hou rasilin Eim Votut koa meatin keil amumoni. Ka en avong etel, houm kes tamun koa meatin tovuol houmoni.”✡Mak 15:29; Sion 2:19 59 Ka en selusien somok enek, tunien one tateisav.
60 Sakini, asuv houlu onen pris keil mulomal luhu en keil ka vis Iesu vit, “?Tounah tovuol kovahiteni? ?Kolong selusien somok koa aviteni va katuk?”✡Aes 53:7; Mak 15:4-5; Luk 23:9 61 Ka Iesu mules ro raeng, roviten etai selusien.✡Mat 16:16; Mak 5:7; Luk 8:28; Sion 11:27; 20:31
Ka asuv houlu onen pris keil enek vis risi vit, “?Anatin keke keik kovi Mesaea koa Ahi vat kati keke hesani? ?Anatin keke kovi Natin Ahi koa romul rovati lat isen?”
62 Ka Iesu vit risi vit, “Inau keinek. Ka hervitei tuetin, kami miheles …
‘Natin Meatin hetondan
en usite matu onen Ahi Asuv ten Keihoen.
Ka mihelesi hemita
en mahmah keil ten out nesa!’ ” Sam keil 110:1; Daniel 7:13✡Mat 22:44; Luk 20:42; Umen 2:34; Efes 1:20; Kol 3:1; Hib 1:3,13; 10:12; 12:2; Mat 24:30; Mak 13:26; Luk 21:27; Rev 1:7; 14:14
63 Asuv houlu onen pris keil tin tisa houlu ven selusien onen Iesu. Sakini, rali vas eisin omon**Tus Votut ling mengkatien en asuv ten pris keil vit asakras avatali vas etai eisin one navong alonge tisa (Lev 10:6; 21:10). ka musel vit, “?!Vensa romul rolekat selusien sav koa vaha kati!?✡Nam 14:6; Umen 14:14 64 ?Mitlonge? !Kei selus va kat isen Ahi! Kei rali koteh mengkatien orer. ?Rendemien onami mukave?” Keil vasi umai en rendemien tas avit mal keke Iesu hemat.✡Lev 24:16; Sion 19:7
65 Ka tei en keil amutiv kat Iesu, apar koe meten ka amul amuti. Navong amumoni avit, “?!Ei provet, hit visi, isei mutik!?” Evus, meatin taleikokoeien keil ten eim enek akulat Iesu ran keil, ka keil esuk amul amuasi.
Pita viteni hatte etel keke rokileatei Iesu✡Mat 26:69-75; Luk 22:52-62; Sion 18:15-18,25-27
66 Navong Pita mul semau en teahu ten eim osen asuv houlu onen pris keil, atouli toumien tai onen mai. 67 Ka navong les Pita mul mutae ahang, kei lei mamah eni ka rie lati vit, “!Keik kamil Iesu ten out Nasaret!”
68 Ka Pita muun vit, “Rovitei anatin. Inau narkileatei tounah koa komul koviteni.” Ka kei mea mual va en meteau.††Tei en tus keil onen Mak asorin selusien enek koa vit, “Hatte tas, ato kokorat.”
69 Ka atouli enek lei ris Pita ka viteni min meatin keil koa amul en out enek vit, “!Meatin ekek vi tai en keil!”
70 Pita muun eris vit, “!Vuo! Rovitei inau.”
Rovitei tuetin, meatin sav keil emun aviteni min Pita avit, “Keik tai en keil keinek. Selusien onom suval koan Kaleli varei.”
71 Ka Pita selus keih min keil ka vit, “!Inau narkileatei varei meatin koa mimul miviteni! !Ka Ahi hesan mahien minau munak selusien onak vi luvosien!”
72 Mal en avong enek, ato kokorat hatte elu eni. Navong Pita longe, mundem ris asa koa Iesu viteni mini vit, “Ato herkokorattei mau hatte helu, ka keik kihiteni hatte hetel keke korkileatei inau.”✡Mat 26:34; Mak 14:30; Luk 22:34; Sion 13:38 Sakini, Pita en von ka murang.
✡^ Mat 26:1-5; Luk 22:1-2; Sion 11:45-53
✡14:2: Mat 26:6-13; Sion 12:1-8
*14:3: Veite amumoni en ahat tamuoh koa avise en alabasta ka oel koa mul ien amumoni en lite ten vati nard.
†14:5: Selusien kati vit, “300 denarie,” koa suval 300,000 vatu.
✡14:7: Dut 15:11
✡14:9: Mat 26:14-16; Luk 22:3-6
✡14:11: Mat 26:17-29; Luk 22:7-14,21-23; Sion 13:21-30
✡14:18: Sam 41:9
✡14:21: Mat 26:26-30; Luk 22:14-20; 1Kor 11:23-25
✡14:22: Mat 14:19; 15:36; Mak 6:41; 8:6; Luk 9:16
‡14:24: Mosis mutah ran buluk en ahor ten sanien vasakin hatkatien matu koa me-Isrel keil amumoni ral min Ahi vamai vakeih ka vahi anatin (Eks 24:6-8).
✡14:24: Eks 24:8; Sak 9:11; Hib 9:20
✡14:26: Sam 113–118; Luk 22:39
✡14:26: Mat 26:31-35; Luk 22:31-34; Sion 13:36-38
✡14:31: Mat 26:36-46; Luk 22:39-46
✡14:33: Mat 17:1; Mak 5:37; 9:2; 13:3; Luk 5:10; 6:14; 8:51; 9:28; Umen 1:13
✡14:34: Sam 42:5,11; 43:5; Sion 12:27; 4:9
✡14:36: Rom 8:15; Kal 4:6; Sion 5:30; 6:38
✡14:42: Mat 26:47-56; Luk 22:47-53; Sion 18:3-12
✡14:43: Mat 16:21; 27:41; Mak 8:31; 11:27; 14:53; 15:1; Luk 9:22; 20:1
✡14:49: Luk 19:47; 21:37; Sion 18:20
✡14:50: Sak 13:7; Mat 26:31; Mak 14:27
§14:52: Litetai koanek, amundemi avit vi Mak koa mutis tus enek.
✡14:52: Mat 26:57-68; Luk 22:54-55,63-71; Sion 18:13-14,19-24
✡14:53: Mat 16:21; 27:41; Mak 8:31; 11:27; 14:43; 15:1; Luk 9:22; 20:1
✡14:60: Aes 53:7; Mak 15:4-5; Luk 23:9
✡14:61: Mat 16:16; Mak 5:7; Luk 8:28; Sion 11:27; 20:31
✡14:62: Mat 22:44; Luk 20:42; Umen 2:34; Efes 1:20; Kol 3:1; Hib 1:3,13; 10:12; 12:2; Mat 24:30; Mak 13:26; Luk 21:27; Rev 1:7; 14:14
**14:63: Tus Votut ling mengkatien en asuv ten pris keil vit asakras avatali vas etai eisin one navong alonge tisa (Lev 10:6; 21:10).
✡14:65: Mat 26:69-75; Luk 22:52-62; Sion 18:15-18,25-27
††14:68: Tei en tus keil onen Mak asorin selusien enek koa vit, “Hatte tas, ato kokorat.”
✡14:72: Mat 26:34; Mak 14:30; Luk 22:34; Sion 13:38