1 Vi avong tai mulamu en avong ten Anien ten Mul Laui. Iesu kilea tuai keke avong mai vesesal keke helokovein out netan ka hehina ven Tata onen. Ka veni envatien onen mul en meatin keil koa Ahi sani mini, Iesu vit vatie lat envatien onen min keil hetokol keite ten moulien onen.✡Mat 26:45; Mak 14:41; Sion 12:23; 17:1; 16:28

2 En vongien enek, Iesu mul kanian ral min meatin keil onen. Ka Temat san rendemien tuai min Sudas, natin Saemon Eskariot, keke hemae lat Iesu heha en hen vativieh keil onen.✡Luk 22:3; Sion 13:27 3 Iesu kilea keke Tata ling tounah vasi keil en hen tuai, ka kilea emun keke ka ven Ahi ka hehina ris mini.✡Mat 11:27; Luk 10:22; Sion 3:35; 16:28 4 Sakini, mea ran avet taanianien, kulat eisin omon koa hae ka lokovein eisin koa ka neim mules. Evus, mutoh kat kei en taol tai. 5  Musin mukok evus, mutah oai va en pesin tai, ka va ven meatin keil onen. Evus, kas retai en ale ka muul motein keil ral min taol koa mutoh kat kei eni.✡Luk 7:44; Sion 12:3 6 Iesu va ven Saemon Pita koa viteni mini vit, “?Asuv, vensa varei keik kokas alok?”

7 Iesu vit kesi vit, “Keik korkileatei veah asa koa namul namumoni, ka hekatau, kilea suk.”✡Sion 13:12

8 Ka Pita viteni keih vit, “!Vuo, kirkastei alok en avong etai!”

Iesu vit, “Munak nirkastei alom, usite onom tovuol enau.”

9 Ka Saemon Pita vit, “!Asuv, munak hemukonek, konakasteis alok! !Kikas hek keilu ka vatuk emun!”

10 Iesu viteni mini vit, “Koakeil amukul amutolas tuai, irkastei mun ave vasi. Vi ale sesuk koa ikas risi. Sakini, kami mimuto tuai, ka rovitei kami vasi koa mivato.”✡Sion 15:3 11 (Iesu viten selusien enek vit, “Rovitei kami vasi koa mivato,” veni kilea tuai isei hemae lati.)✡Sion 6:64,70-71

12 Navong Iesu kas ale evus, musin eris en eisin omon koa ka hae, ka rondan eris en vulin en avet taanianien. Rondan evus, viteni min keil vit, “?Kami mikilea aneite ten asa koa namumoni min kami?✡Mat 28:8,10 13 Mivise inau en ‘Tiser’ ka ‘Asuv,’ ka mal keke mimumoni mukonek, veni vi anatin. 14 Sakini, munak inau, Asuv ka Tiser onami, naling rendemien onak va netan ka nakas motein alomi, mal keke kami emun mihekekas motein alomi eris.✡Luk 22:27; Mat 20:28; 1Tim 5:10 15 Inau namumon sakien enek keke kami mikilea mivaleisungeini. Mukonek, miheha mihekataun mesav keil hetal min rendemien koa netan hesuval etin koa inau namumoni min kami.✡Plp 2:5; 1Pit 2:21 16 Anatin eli naviteni min kami, slev tai romaritetei mok valin masta onen, ka eiloheh tai romaritetei mok valin kei koa sila.✡Mat 10:24; Luk 6:40; Sion 15:20 17 Munak mikilea anatinien koanik, tokolkatien hel ven kami munak mihoum housili.✡Tiem 1:25

18 “Ka narmultei maselus usil kami vasi. Navong narie lat kami keke mivousil inau, nakilea en kami tuai. Ka narie lat kami mukok keke Tus Votut hemai hehi anatin koa viteni vit, ‘Meatin koa kanian ral minau, kei varei viles mum tisa minau.’ Sam keil 41:9

19 “Sakien koanek rokurtei veah out. Ka navit luvati min kami en avong koanek, keke navong hekur out, mihekur anatin eni keke inau navi kei.*Vahesa selusien enek vahit, “inau NAVI,” koa vi ‘Iahova,’ isen kati onen Ahi (Eks 3:14). ✡Sion 14:29; 16:4; 8:24,28 20 Anatin eli naviteni min kami, meatin koa kur revi meatin tai koa nasila, suval koa mul kur revi inau mun. Ka meatin koa kur revi inau, suval koa mul kur revi kei koa sila inau numai.”✡Mat 10:40; Mak 9:37; Luk 9:48; 10:16

21 Navong Iesu viten koanik evus, tin vilelau en demvoen ka vit leini vit, “Anatin eli naviteni min kami, tai en kami hemae lat inau niha en hen vativieh keil onak.”

22 Navong meatin keil onen alonge mukok, aleles keil eris, ka areingeingen isei varei koa Iesu mul vit usili. 23 Tai en meatin keil onen, kei koa envatien onen Iesu mul ien houlu mok,†Koanik vi Sion koa mutis leta ekek. kei mul rondan en usiven Iesu.✡Sion 19:26; 20:2; 21:7,20 24 Sakini, Saemon Pita selus mini en hen vit vahis Iesu keke mul selus usil isei varei. 25 Sakini, meatin onen enek mulis va neli vesesal ven Iesu ka visi vit, “?Asuv, isei varei?”✡Sion 21:20

26 Iesu vit kesi vit, “Niling hati veret koanek en sup ekek ka nisani mini. Kei varei keinek.” Sakini, Iesu kur hati veret tai, lingi va en sup, ka sani min Sudas, natin Saemon Eskariot. 27 Ka Sudas kur hati veret enek. Evus, Temat mai sien rendemien onen Sudas. Ka Iesu viteni min Sudas vit, “Asa koa kovit kovoumoni, kikalah kumoni.”✡Luk 22:3; Sion 13:2 28 Tovuol en keil koa arondan en avet taanianien vailea vensa Iesu viten selusien koanik mini. 29 Tei en keil amundemi keke Iesu mul sila keke vahul tounah ten ale, vuo keke vasan tounah min koakeil mani one tovuol veni vi Sudas koa lei kat mani one.✡Sion 12:6 30 Sakini, Sudas kur hati veret koa Iesu sani mini ka, hatte tas, va hae. Vongien mai tuai ke.✡Sion 9:4; 11:9-10; 12:35-36

31 Navong Sudas eva, Iesu viteni vit, “Avong mal keke inau, Natin Meatin, makur eis koa vi hetetamen imok. Ka asa koa numoni hehati lati isen Ahi emun hehina nesa mok.✡Sion 12:23; 17:1,5 32 Ka veni asa koa numoni hehati lat isen Ahi, Ahi varei hehati lat isok, ka houmoni kosa.

33 “Kami li misuval titiali keil onak. Ka nito hetal min kami avong havivi emun. Hevus, mihelekat inau, ka miherlestei inau. Naviteni min kami selusien koa nasani min hetetamen keil onen Siu keil koa navit, ‘Out koa inau niha ien, kami misakras mivaha ien.’✡Sion 7:33-34; 8:21 34 Ka namul nasan mengkatien hau tai min kami: emi hehathat kami. En vati sakien koa inau ek vat kami, kami emun emi hehathat kami.✡Sion 15:12,17; 1Sion 2:7; 3:23; 2Sion 1:5 35 Munak kami emi hehathat kami, meatin vasi keil ilei kilea keke mivi meatin keil onak.”✡1Sion 3:14

36 Saemon Pita vis Iesu vit, “?Asuv, kiha kave?”✡Sion 7:35; 7:34,36

Iesu vit kesi vit, “Out koa niha ien, kosakras kovousil inau kosa. Ka hekatau, keik kusil inau.”

37 Ka Pita visi vit, “?Asuv, vensa varei nasakras mousiluk kosa? !Inau nasak mesei keke mamat en usite onom!”

38 Iesu vit kesi vit, “?Anatin keke kosak mesei kovamat venau? Anatin eli naviteni minuk, out hermulantei mau ka ato herkokorattei mau, ka keik, kihiteni hatte hetel keke usite onom tovuol enau.”