Selusien koa helamu ten
2 Sion
?Isei mutis selusien koanik?
Eiloheh Sion Sepeti mutis leta koanik katau en avong koa mutis 1 Sion, vesesal en sua 90 AD (sua keil koa katau en avong Iesu avasi).
?Isei vuli selusien koanik mulamu?
Sion viteni keke mutis leta koanik ‘min ahin koa Ahi rie lati vi onen ka min titan keil.’ En avong enek, meatin keil houlu amumoni keih en Kristin keil ven demkatien one, sakini Sion en rovattei vahit luvat isen meatin keil ka mul ling suain selusien onen en leta enek.
?Sion mutis selusien koanik vensa?
Sion en vati vasel kat Kristin keil e vahathat keil eris – Sion mutis houlu usil envatien koa mal Kristin keil avatie lati min Kristin sav keil.✡2Sion 1:5-6
Sion en vati vasel kat Kristin keil anousiltei tiser taluvosien keil – Sion viteni keke koakeil arkurtei anatin keke Iesu Kristo mita mai vi meatin anatin koa aven mul, keil arvitei Kristin anatin. Sakini, meatin keil onen Ahi irkur revitei tiser taluvosien keil enek ka irkurtei anatin en hihiseien keil one.✡2Sion 1:7-11
Mari rendemien tai ten selusien koanik mul en 2 Sion 1:9
Koakeil amul aling teisao en hihiseien keil onen Iesu Kristo, keil arkapiltei vatal min Ahi. Ka koakeil amusil kat varein hihiseien keil onen, keil akapil ral min Ahi Tata ka ral min Natnali.
?Asa mul en selusien koanik?
1. Selkatien keke Kristin keil usil kat mengkatien ten envatien onen Ahi. (1:1-6)
2. Selkatien keke Kristin keil anousiltei koakeil hihiseien one usil Iesu Kristo romusiltei anatinien. (1:7-13)
1
Hitkileaen onen Sion usil leta koanik
1 Inau, koa avise nau en Elda, namutis leta koanik. ✡3Sion 1:1
Namutis va min Ahin koa Ahi rie lati vi onen ka min titan keil.*Veni sakvisien keil avi houlu, Sion mul selus suai. En rovattei vahiten isen meatin keil, sakini vise sios en ‘Ahin’ ka Kristin keil en ‘titan keil.’ Ek vat kami anatin, ka rovitei inau enges, koakeil emun koa akilea anatinien e vat kami. 2 Veni anatinien enek mul en ir, ka heles hetal min ir lisenges.
3 Navisi keke Ahi Tata ka Natnali, Iesu Kristo, luhesan more envatien, enmahisien ka tomat onealu min ir. Keil il en moulien orer navong romul er vathat ir ka romul romusil kat anatinien.
Selkatien keke rehousil sakien ten envatien ka hihiseien keil koa avi anatin
4 Navong nakur longlongien keke titami keil amusil kat anatinien suval koa Tata meng kati, nasi nau houlu. ✡3Sion 1:3 5 Atou onak eli, tahos er hehathat ir. Asa koa namutisi venuk rovitei selusien hau. Vuo, kei vi selusien tai koa rokuri tuai navong rokur rohtoh en demkatien orer. ✡1Sion 2:7; 2:24; 3:11; Sion 13:34; 15:12,17; 1Sion 3:11 6 Rorie lat envatien koa vi anatin navong ualien orer musil kat mengkatien keil onen Ahi. Ka mengkatien keil koa miraengoni mulamu, navong mikur rohtoh en demkatien, vi koanik: ualien onami housil sakien ten envatien. ✡Sion 14:15,23,24; 1Sion 5:3
7 Meatin taluvosien houlu aka vasi out netan, koakeil arkurtei anatin eni keke Iesu Kristo mita mai vi meatin koa aven mul. Vati meatin koa mukonek vi uti luvosien ka vi vativieh en Iesu Kristo. ✡Mat 7:15; 1Sion 2:18; 4:1,3 8 Sakini, mihelei kat revi kami keke ui umen ten demkatien orer navuol. Anatin, mihelomal hekeih keke mihekur vasin ui umen ten demkatien onami.
9 Koakeil amul aling teisao en hihiseien keil onen Iesu Kristo, keil arkapiltei vatal min Ahi. Ka koakeil amusil kat varein hihiseien keil onen, keil akapil ral min Ahi Tata ka ral min Natnali. ✡1Sion 2:23; 4:15 10 Sakini, munak meatin etai mai ven kami koa hihiseien onen romusil kattei anatinien, minahisetei kei nasuval Kristin tuomi tai, ka minakur revitei namai en teim onami. ✡Rom 16:17; Efes 5:11; 2Tes 3:6 11 Mihoumoni hemukonek veni kei koa mul kur revi vati meatin koanik hehi tuak onen, kei mul kavituai en tisaen keil koa mumoni.
Selusien ekor
12 Nakur kat tounah houlu mahiteni min kami, ka ek rovattei matisi en leta tai. Ek vati mok masao en kami keke reheleles ir ka reheselus vituai. Hemukonek, ir vasi rehesi ir hehi houlu mok. ✡3Sion 1:13; Nam 12:8; 3Sion 1:14
13 Titan Tukahin keil koa Ahi rie lati, keil emun aviten more one minuk.
*1:1: Veni sakvisien keil avi houlu, Sion mul selus suai. En rovattei vahiten isen meatin keil, sakini vise sios en ‘Ahin’ ka Kristin keil en ‘titan keil.’
✡1:5: 1Sion 2:7; 2:24; 3:11; Sion 13:34; 15:12,17; 1Sion 3:11
✡1:6: Sion 14:15,23,24; 1Sion 5:3
✡1:7: Mat 7:15; 1Sion 2:18; 4:1,3
✡1:10: Rom 16:17; Efes 5:11; 2Tes 3:6
✡1:12: 3Sion 1:13; Nam 12:8; 3Sion 1:14