16
Pol viten more min meatin keil onen Ahi en mari taon ten out Rom
Navit mahit kilea min kami usil more ahinkuli orer koa isen Fibi. Kei mul mum en sios ten out Kengkria. Navong hemai ven kami, mihekur revi en isen Asuv hesuval koa mal meatin keil onen Ahi avoumoni. Ka navis kami mihekatauni en usite vasi keil koa kei tamurei eni, veni kei kataun meatin keil houlu, ka kataunau mun.
Mihiten ‘more’ onak min Prisila ka Akuila, koa keilu lumum vituai ral minau en umen koa Iesu Kristo sani min komaitel. Umen 18:2,18,26 Vesesal keilu luvamat keke luvakataunau. Sakini, namasmas keilu houlu mok, ka roviteis inau, sios vasi keil onen koakeil arvitei Siu emun amasmas keilu. Ka naviten ‘more’ min koakeil emun alah ruai en teim onealu. 1Kor 16:19; 16:15
Ka min Epaenetas koa kei varei en provins ten out Esia ling rohtoh en demkatien onen en Kristo, naviten ‘more’ mini. ‘More’ mun va min Meri, koa mum keih en usite onami. ‘More’ onak va min Andronikas ka Siunias. Keilu luvi Siu koa metro vituai en eim takeih. Eiloheh keil akilea revi keilu, ka lumai luvi Kristin mulamu enau.
‘More’ min Ampliatas, tuak tetahos tai veni demkatien onomal en Kristo tas. Ka naviten ‘more’ onak va min Obanas koa melmum vituai min Kristo, ka min Stakis emun, more tuak tai. 10 ‘More’ min Apeles koa rie lati tuai keke demkatien onen en Kristo vi anatin. ‘More’ emun min koakeil amul en teim onen Aristobolas. 11 ‘More’ min Herodion, Siu tai suval inau, ka min koakeil amul en teim onen Nasisas koa aling demkatien one en Asuv orer.
12 Nasan ‘more’ onak emun min Trifaena ka Trifosa, koa lumum ven Asuv. Ka ‘more’ min Perisis, more tuak koa mum keih min Asuv. 13 Nasan ‘more’ onak va min Rufas, more meatin koa Asuv rie lati vi onen, ka min mama onen, koa lises lei kat revi nau suval navi natnali kati. Mak 15:21 14 ‘More’ emun min Asingkritas, Flegon, Hermis, Patrobas, Hermas, ka tuak ka ahinkuli savsav keil koa aro ral min keil. 15 ‘More’ min Filolokas ka Sulia, min Nereas ka tunahin, ka min Olimpas ka min meatin vasi keil emun onen Ahi koa aro ral min keil.
16 Navong mihehit ‘more’ min kami, mihesan hemi matu vatie lat envatien onen Ahi min kami eris. Ka meatin keil en sios vasi keil onen Kristo amul asan ‘more’ one vat min kami. 1Kor 16:20; 1Pit 5:14
Selusien ekor
17 Tuak ka ahinkuli keil, nasel kat kami keke mihelei kat revi kami, veni meatin keil amul koa amumon tasilien keil ka amul apurun demkatien onen meatin keil. Koakeil enek amul uvae kat hihiseien keil koa kami mikuri tuai. !Minahatei vesesal ven keil! Mat 7:15; Taet 3:10 18 Veni koakeil amumon tounah keil enek armumtei min Kristo, Asuv orer. Vuo, keil amumon tounah enek keke avakur asa koa keil enges e vati. Selusien one kas ka asan selusien vahati lat rendemien onen meatin keil koa areingeingen asa koa amul amumoni keke avaluvos keil eni. Plp 3:19; Kol 2:4; 2Pit 2:3 19 Meatin vasi keil alonglong eni keke mikur revi more longlongien usil Iesu Kristo. Sakini, inau nasi nau houlu ven kami. Ka ek vati keke kami mihehi meteisau en usite ten tounah koa tahos, ka mihetolas en usite ten tounah koa tisa. Rom 1:8; Mat 10:16; 1Kor 14:20 20 Ka Ahi koa vi vatte ten tomat, hervitei tuetin hehe kokoa Temat en hehen alomi. Navisi keke more envatien onen Iesu, Asuv orer, hel ven kami vasi. Sen 3:15; Rom 15:33
21 Timoti koa melmum vituai, kei san ‘more’ onen min kami. Ka Lusias, Seson ka Sosipata, koa telvi Siu suval nau, keitel emun telviten ‘more’ vat min kami. Umen 16:1; 19:22; 20:4; Plp 2:19
22 Inau, Tosias, meatin koa mutis leta koanik en usite onen Pol, nasan ‘more’ onak min kami en isen Asuv.
23 Geas, koa kur revi nau en teim onen ka maen meatin keil ten sios asukul ien, kei mun san ‘more’ onen min kami. Ka Erastas, meatin koa mul lei kat mani ten taon ekek, ka tuer Kuotas, keilu mun lusan ‘more’ onealu min kami. Umen 19:29; 1Kor 1:14; 2Tim 4:20 24  * Tei en tus matu keil ten Rom asorin vas koanek koa vit, “Navisi keke more envatien onen Iesu Kristo, Asuv orer, hel ven kami. Anatin.”
Hisien ten masmasien
25 !Rehehati lat isen Ahi koa vi hetetamen imok! Kei kilea vasakin kami mivalomal vakeih en demkatien onami en more longlongien koa nakuri. More longlongien enek vit luvat lingkatien suai onen Ahi usil Iesu Kristo koa kei ling suaini mul en avong telamu rokol kosa. Efes 1:9; 3:5,9; Kol 1:26 26 Ka kosa, Ahi ten lisenges meng kati keke mehehothot eni heka en tisien onen provet keil heha min meatin keil en kantri vasi keil keke akilea avaling demkatien one eni ka avalong kati. Rom 1:5
27 !Rehehati lat isen Ahi koa vi hetetamen imok veni kei enges vi meteisau imok! !Rehemasmasi lisenges en isen Iesu Kristo! Anatin. 1Tim 1:17; Siud 1:25

16:3: Umen 18:2,18,26

16:5: 1Kor 16:19; 16:15

16:13: Mak 15:21

16:16: 1Kor 16:20; 1Pit 5:14

16:17: Mat 7:15; Taet 3:10

16:18: Plp 3:19; Kol 2:4; 2Pit 2:3

16:19: Rom 1:8; Mat 10:16; 1Kor 14:20

16:20: Sen 3:15; Rom 15:33

16:21: Umen 16:1; 19:22; 20:4; Plp 2:19

16:23: Umen 19:29; 1Kor 1:14; 2Tim 4:20

*16:24: Tei en tus matu keil ten Rom asorin vas koanek koa vit, “Navisi keke more envatien onen Iesu Kristo, Asuv orer, hel ven kami. Anatin.”

16:25: Efes 1:9; 3:5,9; Kol 1:26

16:26: Rom 1:5

16:27: 1Tim 1:17; Siud 1:25