1 Ka mul selus vit, “Naviteni anatin eli, tei en kami koa miro ekok, irmattei hetokol avong koa keil iles hiasuvien onen Ahi hemai hetal min keihoen.”✡Mak 13:30

2 Katau, avong ahetai (6) muli, Iesu kur Pita, Tiemes, ka Sion ka mulamun keitel, telvina en mari vatihou tai, veni keitel enges telvato ien. Navong telro ien, tellele telles nan Iesu viles,✡2Pit 1:17-18 3 ka eisin omon viles mai muoh vis muoh, ritin vareis. Meatin tovuol vakaskas vamukonek. 4 Evus, telmali telles Ilaetsa ka Mosis lumul luselus ral Iesu.

5 Ka Pita selus ravobong vit, “Tiser, tahos imok keke komeitel metmul ekok. Metheovav en votevav hetel: tai onom, tai onen Mosis, ka tai onen Ilaetsa.” 6 Kei ral tunali keilu telmetau houlu, sakini Pita reingeingen tounah koa mul viteni.

7 Evus, mahmah tai kistal ka mutaluh koe keitel, ka tellong rea tai koa vit, “Koanik vi Natkuli kati tas varei keisom, ka envatien onak mul ien. !Mithelong kat ren!”✡Sam 2:7; Mat 3:17; 12:18; Mak 1:11; Luk 3:22; 2Pit 1:17; Dut 18:15; Umen 3:22 8 Tellele konakon karahit keitel ka telroles etai mun meatin, Iesu enges ro ral min keitel.

9 Navong telmita ris netan, Iesu vit koe keitel vit, “Mitnahitehitentei tounah koa mitlesi min meatin etai hetokol avong koa Natin Meatin hemoul eris ran matien.”✡Mat 12:16; Mak 8:30 10 Tellong kat ren, ka en keitel enges telmul telselus usil aneite ten selusien onen navong vit, ‘hemoul eris ran matien.’

11 Ka telvis Iesu telvit, “?Vensa tiser keil ten mengkatien avit Ilaetsa hemai helamu en Mesaea koa Ahi vat kati?”✡Mal 3:1; 4:5-6

12-13 Ka Iesu vit kilea min keil vit, “Anatin, Ilaetsa hemai ekok helamu vasak mesein tounah vasi ven amaien onen Mesaea. Ka naviteni min kamitel, Ilaetsa mai tuai, ka meatin keil amum tisa mini suval koa e vati, suval asa koa Tus Votut viteni. En sise enek Natin Meatin helong mahien ka meatin keil iseseini suval asa koa Tus Votut viteni.”✡Sam 22:1-18; Aes 53:3

14 Navong Iesu ral min Pita, Tiemes ka Sion telmita ris ven meatin sav keil onen Iesu, telles meatin keil houlu akarahit keil, ka tiser keil ten mengkatien onen Mosis amul amusel ral min keil. 15 Navong meatin keil ales Iesu kistal, amutimanin, ka amuloh uva ka akur revi. 16 Ka Iesu vis meatin onen keil vit, “?Mimul mimusel ral min keil en asa?”

17 Tai en vangi meatin keil vit, “Tiser, nakur natkuli mai minuk veni ninin tisa tai mul ien, sakini, sakras vaselus. 18 Navong ninin enek muasi, kuvini va netan, ka sakini, si kokohin mai, lohon katiloh, ka aven vasi keih. Navis meatin onom keil avahile lati, ka keil asakras.”

19 Iesu viteni min keil vit, “!Ekovei! Meatin keil ten avong kosa, demkatien one tovuol vareis. ?Nito hetal min kami avong hehis? ?Avong hehis nilei kat kami enges? Alkur ehon enek vamai minau.”

20 Sakini, akur ehon enek va min Iesu. Ka navong ninin tisa enek lesi, sakin ehon enek maleilei, mot va netan ka reitei, ka si kokohin mue ran ongon.

21 Iesu vis tata onen ehon vit, “?Avong ehis, keke kei mukok?”

Vit risi mini vit, “Avong etin vi ehon. 22 Avong houlu ninin tisa enek vit vou vini, suval soni va en ahang ka en oai. ?Em hemahis komal eli ka kikatauni munak kokilea kovoumoni?”

23 Ka Iesu viteni vit, “?Vensa kovit, ‘munak kokilea kovoumoni?’ Meatin kilea voumon tounah vasi munak demkatien onen mul.”✡Mat 21:21; Mak 11:23-24; Luk 17:6

24 Hatte tas, tamen peahi vit, “Nakur demkatien, ka rovinvintei. !Kataunau makur tei ris!”✡Luk 17:5

25 Ka navong Iesu lei kilea keke meatin keil amuloh umai ven keil, viteni min ninin tisa vit, “Naviteni minuk, ninin ten ameng ka raling vonhon, kimea ran ehon ekek ka kirmaitei mun varei eni.”

26 Ninin enek mis kai, maleilei keih, ka mea rani. Ka navong lokoveini, ehon enek rokaikaitei mun suval mat varei. Sakini, meatin tei keil avit, “!Ei, kei mat tuai!”✡Mak 1:26 27 Ka Iesu vuli kat hen ehon ka rali lati mulomal.✡Mat 9:25; Mak 1:31; 5:41; Luk 8:54; Umen 3:7

28 Katau suk, navong Iesu va en teim tai ral min onen keil, keil avis lelau eni avit, “?Komai misakras mevahile lat ninin tisa enek vensa?”

29 Ka Iesu vit kesi min keil vit, “Ahi mul san keihoen keke avahile lat vati ninin tisa enek vaka en sise ten hisien enges.”*Tei en tus matu keil ten Mak asorin selusien enek koa vit, “vaka en sise ten hisien ka uval ran anien.”

30 Iesu ral min teindan elu (12) onen amea ran out enek, amual uva en out sav keil en provins ten out Kaleli veni Iesu en rovattei meatin keil availea out kave kei ro ien. 31 Iesu mumoni mukonek keke kilea vahisein meatin keil onen. Kei viteni mukok vit, “Meatin tai hesa lat inau, Natin Meatin, niha en hen meatin keil ten out netan koa u vini nau. Ka, en avong etel teni, inau nimoul eris ran matien.”✡Mat 16:21; 20:18-19; Mak 8:31; 10:33-34; Luk 18:32-33; 24:7 32 Ka keil areingeingen aneite ten hihiseien enek, ka ametau keke avahisi eni.

33 Iesu ral meatin keil onen umai en meteimal ten out Kapaniam ka uva ris teim. Ka Iesu vis keil vit, “?Asa keke mimul mimusel eni en sise?” 34 Ka keil aro raeng veni keke en sise amul arun kutut ven isei vi hetetamen imok en keil.✡Luk 22:24

35 Sakini, Iesu rondan, vise ruain teindan elu (12), ka viteni min keil vit, “Isei keke en vati val nesa, heling kei heha netan. Mukonek, hehi meatin toumien onen meatin vasi keil.”✡Mat 20:26-27; 23:11; Mak 10:43-44; Luk 22:26

36 Evus, Iesu kur titiali tai ka lingi mulomal luhu en keil. Kei kav kati ka viteni min keil vit, 37 “Meatin koa hekur revi titiali koa mukok en isok, suval koa mul kur revi nau. Ka navong kur revi inau, rovitei inau enges, suval koa kei kur revi kei koa sila inau.”✡Mat 10:40; Luk 10:16; Sion 13:2

38 Ka Sion Sepeti viteni min Iesu vit, “Tiser, komai meles meatin tai mul vile lat ninin tisa keil en isom, ka meviteni mini keke hehati, veni kei rovitei tai en ir.”

39 Ka Iesu viteni min keil vit, “!Minahitentei mini nahati! Veni munak meatin etai mumon merikel tai en isok, sakras vamea ka vaselus karenau. 40 Ven meatin koa rovitei vativieh orer, kei vi tai en ir.✡Mat 12:30; Luk 11:23 41 Anatin naviteni li min kami, meatin etai koa hesan oai enges min kami ven isok, kei hekur heite teni.

42 “Ka en usite sav, munak meatin etai hesakin meatin tai koa musil kat inau suval titiali keke hemot en tisaen, hetahos imok min meatin enek keke isar kat mari ahat en hiren ka isoni hemarindu en anev ten atas. 43 En vati rendemien enek, munak tai en kami, hen sakin kei mot en tisaen, heta kotehei. Hetahos imok mini keke hen tai hevuol ka kei hekur more moulien koa sakras vavus. Hetisa mini munak hen elu mules, ka heha en out onen temat keil, en out koa ahang teni sakras vavus.✡Mat 5:30 44 †Tei en tus matu keil ten Mak asorin selusien enek koa vit, “Heha en out koa asilat keil koa sakras avamat iani, ka ahang koa heani sakras vavus.” 45 Ka munak meatin tai alen sakini mot en tisaen, heta kotehei. Hetahos imok mini keke alen tai hevuol ka kei hekur more moulien. Hetisa mini munak alen lou mules, ka ison meatin enek heha en ahang onen temat keil. 46 ‡Tei en tus matu keil ten Mak asorin selusien enek koa vit, “Heha en out koa asilat keil koa sakras avamat iani, ka ahang koa heani sakras vavus.” 47 Ka munak tai meten sakin meatin enek mumon tisaen, hekis lati. Hetahos imok mini keke meten tai hevuol ka kei hekur more moulien. Hetisa munak meten elu lumules, ka ison meatin enek en ahang onen temat keil.✡Mat 5:29 48 Heha en out koa asilat keil koa asakras avamat iani, ka ahang koa heani sakras vavus.✡Aes 66:24

49 “Ahi mul maen ir rovisu en avong takeih keil keke vasakin ir rovatolas en meten suval koa sol ka ahang mul sakin sanien votut tai mai mutolas.✡Lev 2:13

50 “Sol tahos. ?Ka munak kasien teni vuol rani, umon sa keke avaling ris tahosien teni? !Asakras!§Sol telamu rosuvaltei sol ten kosa, romutotei. Sakini, kasien teni mul vuol rani. Sakini, tahos keke sakien onami hesuval sol koa mul sakin lahruaien onami mai tahos imok ka miro vituai en tomat.”✡Mat 5:13; Luk 14:34; Kol 4:6; Rom 12:18; 1Tes 5:13