3
Sion Baptis mum rohtoh en umen onen keke vaha vahitehiten more longlongien onen Ahi min meatin keil
1 En avong koa Taebirias vi Sisa ten out Rom sua teindan elim (15), meatin ehat (4) sav emun amul akataun losilkatien onen: Herod Antipas vi asuv houlu ten out Kaleli; tunali Pilip vi asuv houlu ten out Ituria ka Trakonaetas; Lisanias vi asuv houlu ten out Abilin; ka Pontias Paelet vi avat ten kavmen ten out Sudea.✡Mat 3:1-12; Mak 1:1-8; Sion 1:19-28 2 Ka en avong enek, Annas ka Kaiafas lukur umen ten asuv houlu onen pris keil.✡Luk 1:80
En avong enek, Ahi selus min Sion, natin Sakaraea, en out volvol. 3 Sakini Sion karahit out vasi vesesal en Oaisal Sodan ka vitehiten selusien onen Ahi min meatin keil vit, “!Mihehiles moulien onami ran tisaen! Hevus, mihemai minau ka nihi baptaes en kami hetie lati keke methos onen Ahi mul en kami.”✡Umen 13:24; 19:4 4 Provet Aesea telamu mutis luvati usil Sion vit,✡Aes 40:3-5
“Itaengon rea tai hehiso hekeih en out volvol hehit,
‘Mihesak mesein sise onen Asuv.
Anatin, mihesak revi sise onen hemal.
5 Mihetahin revi poal vasi keil
ka vatihou keil vasi miheil lati hehi aet.
Out keil koa akalkali, mihoumoni hemai hemal revi,
ka mihetahin vasi vulvul keil.
6 Hevus, meatin keil vasi ilesi
7 Vangi meatin keil houlu umai ven Sion keke vahi baptaes en keil. Ka Sion selus keih min hetetamen onen Siu keil koa umai veni vit, “!Ei, kami mivi vangi tetal tisa keil koa mimul mirili meatin keil en ongomi! ?Isei sel kat kami keke mivalohosai ran mahien koa Ahi hesani min kami?✡Mat 12:34; 23:33 8 Hetahos imok keke, helamu, mihoumon sakien koa hetie lati keke miviles ran tisaen keil onami anatin. Ka minahitentei minahit, ‘Komai meherkurtei mahien veni Ebraham vi vati avu onomai ka Ahi rie lat komai mevi onen.’ Ka naviteni min kami keke koanek rovitei anatin, veni Ahi kilea vatie lat ahat keil ekek ka hesakin keil imai ihi ekek avahi havin Ebraham keil keke avahi meatin keil kati onen.✡Sion 8:39 9 Keitinek, Ahi sak mesein teiai onen tuai vatei lat vatiai keil koa arsontei heite koa tahos. Anatin, itei lat keil ka ison keil iha en ahang.”✡Mat 7:19; Sion 15:6
10 Ka vangi meatin keil enek avis Sion avit, “?Hesakini, komai mehoumon sa?”
11 Sion viteni min keil vit, “Munak tai en kami, eisin omon elu, hesan tai min meatin koa omon tovuol. Munak tai en kami, anien an mul, hesan tei min meatin sav koa an tovuol.”
12 Evus, meatin keil ten takis emun umai keke Sion vahi baptaes en keil, ka avisi avit, “?Tiser, mehoumon sa varei keke mevamal en meten Ahi?”✡Luk 7:29
13 Sakini, Sion viteni min keil vit, “Minalahtei mani ten takis nalin asa koa mengkatien ten kavmen viteni.”
14 Ka meatin tavaeen keil emun umai avisi avit, “?Ka mukave en komai? ?Mehoumon sa keke mevamal en meten Ahi?”
Sakini, Sion viteni min keil vit, “Minakeih kattei meatin keil keke avasan mani min kami. Ka minakurtei mani en sise koa miluvos isen meatin sav tai en kot. Mihelonge hetahos enges en ui umen koa mimul mikuri.”
15 Navong meatin keil along tounah koa Sion mul viteni, amundemi houlu usili ral min sien ka aviteni min keil eris avit, “Vahesa Sion varei vi Mesaea koa Ahi vat kati keke hesani hemai.”
16 Navong Sion longe mukok, vit risi min keil vit, “Narvitei Mesaea. Inau namul navi baptaes en kami en oai enges. Ka kei koa hemai hekatau enau, kei hehi hetetamen imok helin nau, ka narvinvintei makulat sandel onen. Kei varei hehi baptaes en kami en Ninin Votut ka en ahang.*Ahang koanek hean motein koakeil amusil kat revi Iesu, ka hean lin koakeil armusiltei.✡Umen 13:25 17 Kei sak mesei tuai vatiti vas meatin vasi keil hesuval meatin koa kur savel keke vaso lelat uti uit vaha ran ingeite. Uti uit koa hetahos, helah ruaini heha en eim onen; ka ingeite keil teni, heniti en mari ahang koa sakras vamat.” 18 En sakien enek, Sion sel kat meatin keil ka vitehiten more longlongien onen Ahi min keil.
19 Ka navong Sion mul mumon umen onen, selus keih va kat asuv houlu Herod Antipas veni kur ahin onen tunali mai vi ahin onen, isen Herodias. Sion selus emun va kat Herod ven tounah sav vasi keil koa mumoni koa romaltei.✡Mat 14:3-4; Mak 6:17-18 20 Sakini, Herod mumon tounah tai koa tisa mok mulin tounah sav keil koa mumoni: kei viteni keke meatin tavaeen keil onen avaha avahuli kat Sion ka avasoni vaha en eim takeih.
Sion vi baptaes en Iesu✡Mat 3:13-17; Mak 1:9-11
21 Navong semau Sion vi baptaes en meatin keil, Iesu emun mai veni keke Sion vahi baptaes eni. Ka navong Iesu mul vis, voiteh ten out nesa mutah 22 ka Ninin Votut muka mita suval ame ka rondan en kei. Ka rea tai viso ka en out nesa vit, “Keik kovi natkuli kati anatin koa envatien onak mul enuk, ka nasi nau mok venuk.”✡Sion 1:32; Sen 22:2; Sam 2:7; Aes 42:1; Mat 12:18; 17:5; Mak 9:7; Luk 9:35; 2Pit 1:17
Vatiamal onen Iesu✡Mat 1:1-17
23 Navong Iesu kur rohtoh en umen onen, sua onen hanumau tai ka halualim emun (30). Meatin vasi amundemi avit kei vi natin Siosep.✡Luk 4:22; Sion 6:42 Ka avu keil ten vatiamal onen Siosep, eis keil one mukok:
Siosep vi natin Heli.
24 Ka Heli vi natin Matat,
koa vi natin Livae,
koa vi natin Melki,
koa vi natin Sanae,
koa vi natin Siosep.
25 Siosep vi natin Matataeas,
koa vi natin Amos,
koa vi natin Neham,
koa vi natin Esli,
koa vi natin Nakae.
26 Nakae vi natin Mahat,
koa vi natin Matataeas,
koa vi natin Semein,
koa vi natin Sosek,
koa vi natin Soda.
27 Soda vi natin Soanan,
koa vi natin Resa,
koa vi natin Serubabel,✡Esra 3:2
koa vi natin Seltil,
koa vi natin Neri.
28 Neri vi natin Melki,
koa vi natin Adi,
koa vi natin Kosam,
koa vi natin Elmadam,
koa vi natin Er.
29 Er vi natin Sosua,
koa vi natin Eliesar,
koa vi natin Sorim,
koa vi natin Matat,
koa vi natin Livae.
30 Livae vi natin Simeon,
koa vi natin Sudah,
koa vi natin Siosep,
koa vi natin Sonam,
koa vi natin Eliakim.
31 Eliakim vi natin Melea,
koa vi natin Mena,
koa vi natin Matataha,
koa vi natin Netan,
koa vi natin Deved.✡1Saml 16:1,13
32 Ka Deved vi natin Tiese,✡Rut 4:17-22
koa vi natin Obed,
koa vi natin Boas,
koa vi natin Salmon,
koa vi natin Nason.
33 Nason vi natin Aminatap,
koa vi natin Atmin,
koa vi natin Ani,
koa vi natin Hesron,
koa vi natin Peres,
koa vi natin Sudah.✡Sen 35:23
34 Sudah vi natin Siekob,✡Sen 25:26
koa vi natin Aesak,✡Sen 21:3
koa vi natin Ebraham,
koa vi natin Terah,
koa vi natin Nahor.
35 Nahor vi natin Seruk,
koa vi natin Rehu,
koa vi natin Pelek,
koa vi natin Eber,
koa vi natin Sela.
36 Sela vi natin Kenan,✡Sen 4:25–5:32
koa vi natin Arpaksat,
koa vi natin Sem,
koa vi natin Noah,
koa vi natin Lamek.
37 Lamek vi natin Metusela,
koa vi natin Inok,
koa vi natin Sared,
koa vi natin Mahalalel,
koa vi natin Kenan.
38 Kenan vi natin Inos,
koa vi natin Set,✡Sen 4:25
koa vi natin Adam.
Ka Adam vi natin Ahi.
✡3:1: Mat 3:1-12; Mak 1:1-8; Sion 1:19-28
✡3:6: Luk 2:30-31; Umen 28:28; Taet 2:11
*3:16: Ahang koanek hean motein koakeil amusil kat revi Iesu, ka hean lin koakeil armusiltei.
✡3:19: Mat 14:3-4; Mak 6:17-18
✡3:20: Mat 3:13-17; Mak 1:9-11
✡3:22: Sion 1:32; Sen 22:2; Sam 2:7; Aes 42:1; Mat 12:18; 17:5; Mak 9:7; Luk 9:35; 2Pit 1:17