42
Meatin toumien onen Iahova
Aesea 42:1-7; 49:5-6
1 Provet Aesea vit mesein selusien onen Iahova vit,
“Ekek, meatin toumien onak koa nasan keihoen mini.
Kei varei narie lati, ka nasi nau veni.✡Mat 3:17; 17:5; Mak 1:11; Luk 3:22; 9:35
Nasieni en Ninin onak,
ka helosil kat revi out vasi keil en sakien ten maluen.
2 Kei hervitei meatin koa heselus hekeih,
ka en sise keil, hermakultei en selusien onen.
3 Ven enmahisien onen, hermumontei hekeih
en koakeil mesav keil amumoni keih en keil.
Ka koakeil demkatien one rokeihtei mun,
kei hesuv kat demkatien one.
Navong helei revi en usite onen meatin keil,
houmoni hemal min keil vasi.
4 Hehati mal hekeih ka rendemien onen sakras vamot
heha hetokol avong keke houmon sakien ten maluen hekarahit out vasi netan.
Anatin, meatin keil koa aro soutin amul arosin hihiseien keil onen.”
5 Evus, provet Aesea vit risi vit,
“Koanek selusien onen Iahova koa vi Ahi.
‘Inau namumon teilang koa karahit out netan.
Inau namum revi out vasi keil ten out netan ral min tounah vasi keil koa amoul ien.✡Umen 17:24-25
Inau nasan eang ten moulien koa meatin keil amuseh eni.
Ka inau naling ninin mul en meatin keil koa amul amual en out netan.
6 Ral min maluen onak, inau, Iahova, navisok kum minau,
ka nihuli kat hem ka nikataunuk.
Nikur koek ka numon hatkatien takeih hetal min meatin keil heka enuk.
Nisakinuk kimai kihi laet tai koa hesil en sise ven meatin keil ten kantri sav keil.✡Aes 49:6; Luk 2:32; Umen 13:47; 26:23
7 Keik kisakin koakeil avi metovar imai ilele,
ka koakeil aro en out koa malikelik en eim takeih, kumon keil imaluv rani.’ ”