1 Navong Iesu ka onen keil umai vesesal en out Serusalem, keil akistal en meteimal ten out Betfas vesesal en Hou Nei Olip. En out enek, Iesu sila meatin elu onen 2 ka viteni min keilu vit, “Milheha en meteimal koa keisom. Navong milhekistal en out enek, milheles titan dongki tai asar kati mul en out enek koa meatin tovuol veah vatondan en eisilin. Milheluvati ka milhelehei hemai ekok. 3 Ka munak meatin etai hehis kamil vensa milmumon tounah enek, milhehiteni keke asuv en vati ka hervitei tuetin, hesan risi hemai.”

4 Sakini, luva lules titan dongki enek en vali sise, asar kati vesesal en voiteh ten eim tai. Navong lumul luluvati, 5 meatin keil koa amul en out enek avis keilu avit, “?Vensa milluvat titi dongki keisom?”

6 Luvit kesi min keil suval koa Iesu viteni min keilu, ka alokovein keilu luva. 7 Ka lukur titi dongki luva ven Iesu, lukuvin eisin onealu vina en eisilin titi dongki ka Iesu rondan eni. 8 Navong Iesu mul mual en dongki, meatin keil houlu amul asak mesein sise onen keke voual ien. Keil koa amul avuen eisin one ka teisav amusah oumeil en vali sise ka aling revi en sise onen. 9 Meatin keil koa amul amulamu ka koakeil akatau amul avisohiso avit,

11 Iesu kistal Serusalem ka va en Eim Votut. Lele karahit, lei vasi en tounah keil. Ka veni meteiai mul vita netan, kei muris va en meteimal ten out Betani ral min meatin teindan elu (12) onen keil ka amatil ien.

12 Out mulan, navong aka ris Betani, Iesu raengoni keke amai kati. 13 Les vati fik tai mul keiva neli koa oute houlu. Navong va vesesal veni keke valei visi munak heite mul ien, votini keke heite tovuol, les outes veni rovitei avong kati teni vatekao.✡Luk 13:6 14 Sakini, Iesu viteni min vati fik enek vit, “!Meatin hetovuol emun hean etai heiai eris ranuk!” Ka meatin keil onen along selusien onen.✡Mak 11:20

15 Navong akistal en out Serusalem, Iesu va en Eim Votut ka mul likat rasilin meatin keil koa amul avulhul ka asalem en tounah. Kei vou vilehiles avet onen meatin koa amul akekes en mani ka out tatondanien onen koakeil asalem en ame. 16 Ka romaen etai meatin vakur tei tounah avaka pas teahu ten Eim Votut. 17 Ka sel kat keil vit, “Ahi viteni en Tus Votut vit, ‘Eim onak ihise en Eim Tahisien onen meatin vasi keil ten out netan.’ Aesea 56:7 Ka kami mivilesi mai vi ‘Eim omon tarhena keil.’ ” Seremaea 7:11

18 Ka navong asuv keil onen pris keil ka tiser keil ten mengkatien onen Mosis alonge, amul alekat sise koa vasakini avouas Iesu vamat ien. Ka keil ametaun Iesu ven meatin vasi keil amutimanin en hihiseien onen.✡Mak 14:1; Luk 20:19; 22:2

19 Navong mendilah mai, Iesu ral meatin keil onen alokovein out Serusalem uva.

20 En visokon semau, navong amual en sise, alei ris keke vati fik mukou tuai, oute vita rokol lite netan emat.✡Mak 11:14 21 Pita rendem ris en tounah koa kur out ka viteni min Iesu vit, “!Tiser, kilesi! Vati fik koa kosesenda eni mukou tuai.”

22 Iesu vit kesi min keil vit, “Miheling demkatien onami en Ahi. 23 Anatin eli naviteni min kami, munak kami tai hehiteni min hou eke vamea ka vahita en atas, tounah koa visi, Ahi houmoni. Ka demkatien onen hekeih en asa koa visi.✡Mat 17:20; Luk 17:6; 1Kor 13:2 24 Mukonek, naviteni min kami, navong mivis ven tounah tai, miheling demkatien onami hesuval mikuri tuai, ka Ahi hesan tounah koa mivisi.

25 “Ka navong kami tai mulomal keke vahis, ka mundem tounah tisa koa meatin sav mumoni mini, helokovein vurohien onen ka houmon methos onen hetal min meatin enek. Hesakini, Ahi Tamer ten out nesa, methos onen hel eni ka herleletei mun hetisa mini ven tisaen onen.”✡Mat 6:14; 5:23; Rev 2:4,14,20 26 *Tei en tus matu keil ten Mak asorin en selusien koanik koa vit, “Munak methos onom tovuol en meatin sav, Ahi Tamer, methos onen sakras val enuk ka hel hendem ris tisaen keil onom.”

27 Iesu va ris en out Serusalem. Ka navong Iesu mul mual neim en teahu ten Eim Votut, asuv keil onen pris keil, tiser keil ten mengkatien onen Mosis, ka elda keil onen Siu keil umai veni.✡Mat 16:21; 27:41; Mak 8:31; 14:43,53; 15:1; Luk 9:22; 22:66 28 Keil avisi avit, “?Komul komumon tounah keil ekek en isen isei?†Keil avisi mukok veni Iesu likat meatin keil ran Eim Votut en Mak 11:15-19. ?Isei varei maenuk kovoumoni?”

29 Iesu vit kesi min keil vit, “Mahis kami suk en tounah tai. Ka munak mihiteni minau, nihiteni mun min kami isei maenau namumon tounah keil ekek. 30 Alvit visi minau. ?Isei keke maen Sion vahi baptaes en meatin keil? ?Ahi vuo meatin keil enges ten out netan?”✡Sion 1:33

31 Koanik sakin keil amul aselus rahiti min keil eris avit, “?Rehehiten sa? Munak rehehit ‘Ahi maeni,’ ka kei hehit, ‘?Sakini vensa mirkurtei anatin en selusien onen Sion?’✡Mat 21:32; Luk 7:30 32 Ka rosakras rovahit, ‘Meatin enges maeni’ ven meatin keil ekek amundem kati keke Sion vi provet tai onen Ahi.” Ka keil ametaun meatin keil anavuroh kat keil.✡Mat 14:5; 21:46 33 Sakini, avit risi min Iesu avit, “Komai mereingeingeni.”

Ka Iesu viteni mun min keil vit, “Inau mun, nirvitentei varei isei maenau namumon tounah keil enek.”