18
Avuli kat Iesu✡Mat 26:47-56; Mak 14:43-50; Luk 22:47-53
1 Navong Iesu vis evus, mea ral min meatin keil onen ka uva en usi Poal Kidron. En out enek, nei olip tai mul ien, ka uva ien.✡Mat 26:36; Mak 14:32
2 Sudas kilea out kave uva ien veni, avong houlu, Iesu lah ruai ekonek ral min meatin keil onen. Sakini, navong Sudas va keke vamae lat Iesu vaha min hen vativieh keil onen,✡Luk 21:37; 22:39 3 mulamun vangi meatin tavaeen keil ten out Rom ral min meatin taleikokoeien keil ten Eim Votut koa asuv keil onen pris keil ka Farasi keil asila keil uva. Ka umai ral min laet ka ai tahuen keil one.✡Sion 7:32,45
4 Iesu kilea tounah vasi koa hekistal mini, sakini va visu min keil ka vis keil vit, “?Kami mimul milekat isei?”
5 Avit kesi avit, “Iesu ten out Nasaret.”
Kei vit, “Inau navi kei.”*Vahesa selusien enek vahit, “inau NAVI,” koa vi ‘Iahova,’ isen kati onen Ahi (Eks 3:14). Sudas, koa mae lati eva en he mul mulomal ral min keil. 6 Navong Iesu vit, “Inau navi kei,”†Vahesa selusien enek vahit, “inau NAVI,” koa vi ‘Iahova,’ isen kati onen Ahi (Eks 3:14). keil asoretin keil ka umotmot uva en atan.
7 Iesu vis ris keil vit, “?Kami mimul milekat isei?”
Keil avit, “Iesu ten out Nasaret.”
8 Ka kei vit, “Naviteni min kami tuai keke inau navi kei.‡Vahesa selusien enek vahit, “inau NAVI,” koa vi ‘Iahova,’ isen kati onen Ahi (Eks 3:14). Ka munak mimul milekat inau, mihemaen koakeil ekek iha.” 9 Kei viten selusien koanek vasakin asa koa kei viteni vamai vahi anatin navong vit, “Tata, tovuol en koakeil kosani minau vavuol.”✡Sion 6:39; 17:12
10 Evus, Saemon Pita, koa kur mari naef tai, leh lati ka musah koteh ralingen matu one slev onen asuv houlu onen pris keil. Isen slev enek vi Malkas.✡Luk 22:36,38 11 Ka Iesu viteni keih min Pita vit, “!Ling ris naef onom en vulin! Mahien koanek, Tata onak varei sak meseini venau, ka mal imok keke nikur vasi.”✡Mat 20:22; 26:39; Mak 10:38; 14:36; Luk 22:42
12 Evus, meatin tavaeen keil ten out Rom ral min avat one, ka meatin taleikokoeien keil ten Eim Votut umai avuli kat Iesu ka apar kati. 13 Mulamu, akuri va ven Annas, avu tisa onen Kaiafas, koa vi asuv houlu onen pris keil en sua koanek.✡Luk 3:2; Sion 18:24 14 Ka vi Kaiafas varei koa vit, “Hetahos imok munak meatin hetas hemat en usite onen meatin keil, helin munak imaen me-Rom keil imai u vini me-Isrel vasi keil.”✡Sion 11:50
Pita vit usite onen tovuol en Iesu✡Mat 26:69-70; Mak 14:66-68; Luk 22:56-57
15 Saemon Pita ka meatin tamun onen Iesu lumul lulehni keilu lumusil Iesu. Ka veni asuv houlu onen pris keil kilea en meatin tamun enek, maeni musil Iesu va en teahu ten mari eim onen asuv houlu onen pris keil.✡Mat 26:58; Mak 14:54; Luk 22:54-55 16 Ka Pita, kei mules mulomal hae vesesal en meteau. Sakini, meatin tamun koanek onen Iesu, koa asuv houlu onen pris keil kilea, kei va hae, selus min ahin koa lei kokoe en meteau. Sakini, amaen Pita emun va neim. 17 Navong ahin koa mul lei kokoe en meteau les Pita, viteni mini vit, “Ei, keik emun kovi tai en meatin keil onen meatin ekek.”✡Sion 18:25
Pita vit kesi vit, “Vuo, rovitei inau.” 18 Out mandil houlu. Sakini, meatin taleikokoeien keil ka meatin toumien keil onen asuv houlu onen pris keil amumon ahang en sakol, ka amulomal rahiti amul amutae. Ka Pita emun mul mulomal ral min keil ka mul mutae ahang.
Asuv houlu onen pris keil Annas vis Iesu usil hihiseien keil onen✡Mat 26:59-66; Mak 14:55-64; Luk 22:66-71
19 En out neim, Iesu mulomal en meten asuv houlu onen pris keil koa visi usil meatin keil onen ka hihiseien keil onen. 20 Iesu vit kesi vit, “Tounah koa naselus usili, navit leini min meatin vasi keil. Navong navihisei, namumoni en eim tahihiseien keil orer ka en teahu ten Eim Votut, out keil koa Siu keil alah ruai ien. Narvit suain etai tounah.✡Sion 7:26; Mat 4:23; 26:55; Sion 6:59; 7:14 21 ?Vensa varei mimul mivis inau usili? Alhis koakeil araengon asa naviteni min keil, veni keil along kilea asa naviteni.”
22 Navong Iesu viteni mukok, meatin taleikokoeien tai onen asuv houlu onen pris keil kovas veinan Iesu ka vit, “?!Vensa varei komul koselus mukonek min asuv houlu onen pris keil!?”✡Umen 23:2; Sion 19:3
23 Iesu vit kesi vit, “Munak naviten etai tounah tisa, kihit leini vi asa. ?Ka munak asa naviteni mal, vensa varei kokovas inau?”
24 Evus, Annas san Iesu koa rop mul veah en hen keilu va ven Kaiafas, asuv houlu onen pris keil.§En avong koanek, Kaiafas vi asuv houlu kati onen pris keil. Annas, kei vi asuv houlu onen pris keil ten sua koa evus, ka mari keihoen mul veah en hen.✡Luk 3:2; Sion 18:13
Pita vit usite onen tovuol en Iesu avong tamun✡Mat 26:71-75; Mak 14:69-72; Luk 22:58-62
25 Navong Pita mul veah mulomal vesesal en ahang ka mul mutae, tei en meatin keil avisi avit, “?Mukave? ?Keik emun kovi tai en meatin keil onen meatin keisom?”✡Sion 18:17
Ka Pita muun vit, “Vuo, rovitei inau.”
26 Evus, slev tai onen asuv houlu onen pris keil, koa mul en vatiamal onen slev koa Pita ra koteh ralingen, viteni vit, “?Ka rovitei keik koa nalesuk en nei olip ral mini?”✡Mat 26:51; Mak 14:47; Luk 22:49-50; Sion 18:10; 18:1
27 Hatte etel eni, Pita muun vit, “Vuo, rovitei inau.” Ka en hati avong enek, ato kokorat.✡Mat 26:34; Mak 14:30; Luk 22:34; Sion 13:38
Akur Iesu va en meten Paelet✡Mat 27:1-2,11-31; Mak 15:1-20; Luk 23:1-5,13-25
28 En visokon semau, akulat Iesu ran teim onen Kaiafas, asuv houlu onen pris keil, ka amulamuni va en teim onen Paelet, avat ten kavmen en out enek. Ka hetetamen onen Siu keil arvatei en teim onen veni kei rovitei Siu tai ka e rovattei avamai avahilehilu en meten Ahi. Veni, hemukonek, asakras avaan Anien ten Mul Laui.**Siu tai sakras vaha en out onen koakeil arvitei Siu, vuo vaanian vituai vatal min keil, vuo vatokol tounah koa keil arokoli. Siu keil amundemi keke hesakin keil ihilehilu en meten Ahi. Ka keke avato ris, iha ikas motein ave en avong vasi en wik tai, ka hekatau eni, iha isan sanien votut tai min Ahi. Hetetamen keil enek onen Siu keil arie lati keke amundem houlu usil mengkatien keil koa heting koe keil asakras avaanian valin mengkatien koa vit anou vinitei meatin sav tai. 29 Sakini, Paelet va hae keke vales keil. Navong les keil, vis keil vit, “?Tisaen sa varei koa mivit meatin ekek mumoni va kat kami?”
30 Avit kesi avit, “Meatin koanek vi meatin tisa tai. Vahit varvitei anatin mevarsantei minuk keke kovasan mahien mini.”
31 Paelet viteni min keil vit, “Mukonek, kami varei mihekuri ka mihelei rahit usite onen. Hevus, mihesan mahien mini housil mengkatien keil onami.”✡Sion 19:6-7; 19:6; Umen 18:15
Ka avit kesi avit, “Mengkatien keil ten kantri koanik ring koe komai vit komai Siu keil mesakras mevasan matien min etai meatin en kot onomai.” 32 Koanek kur out vasakin selusien onen Iesu vamai vahi anatin navong vit luvat vati sakien sa koa hemat eni.✡Mat 20:19; 26:2; Sion 3:14; 8:28; 12:33
33 Sakini, Paelet va ris teim onen ka visi avalamun Iesu vamai en meten. Navong lesi, Paelet visi vit, “?Mukave? ?Anatin keke keik kovi asuv houlu onen Siu keil?”
34 Iesu vit kesi vit, “?Komul kovis inau mukok en usite onom sasom, vuo veni meatin sav keil avit usil inau minuk?”
35 Paelet vit kesi vit, “Usite onak tovuol enuk veni inau narvitei Siu tai. Vi meatin keil kati onom ka asuv keil onen pris keil koa amae latuk komai en hek. ?Vensa? ?Komumon sa koa tisa en keil?”✡Sion 1:11
36 Iesu viteni mini vit, “Hiasuvien onak keke mahi asuv houlu rokatei ran out netan. Veni munak vi anatin keke hiasuvien onak ka ran tounah en out netan ekek, meatin keil onak ivae en usite onak keke hesakini nirvatei en hen hetetamen keil onen Siu keil. Sakini, kolesi keke hiasuvien onak rokatei ran out ekok.”
37 Paelet visi vit, “?Sakini, anatin keke kovi asuv houlu?”✡1Tim 6:13; Sion 3:32-33; 8:47; 1Sion 4:6
Iesu vit kesi vit, “Keik koviteni kovit inau navi asuv houlu tai. Ka avasi inau ka numai en out netan keke moumon tounah vatas, keke nihitehiten usil anatinien. Koakeil vasi amusil kat anatinien, keil ilong kilea asa koa namul naviteni.”
38 Ka Paelet visi vit, “?Isei kilea vailea anatinien?”
Navong Paelet selus ral min Iesu evus, va hae ka selus eris min Siu keil vit, “Inau narles etai tounah en usite onen koa tisa vahit vamal masan mahien mini. 39 Ka musil sakien matu oralu, en Anien ten Mul Laui ekek, namul namae lat meatin tai koa kami mihetie lati heha hesital ran eim takeih. ?Sakini, emi vati mamaen asuv houlu onen Siu keil vasital?”
40 Ka keil avisohiso keih avit, “!Vuo, emai rovattei meatin enek! Emai vati keke mihelokovein Barabas hemaluv.” Ka Barabas vi lariken tai.✡Umen 3:14
✡^ Mat 26:47-56; Mak 14:43-50; Luk 22:47-53
*18:5: Vahesa selusien enek vahit, “inau NAVI,” koa vi ‘Iahova,’ isen kati onen Ahi (Eks 3:14).
†18:6: Vahesa selusien enek vahit, “inau NAVI,” koa vi ‘Iahova,’ isen kati onen Ahi (Eks 3:14).
‡18:8: Vahesa selusien enek vahit, “inau NAVI,” koa vi ‘Iahova,’ isen kati onen Ahi (Eks 3:14).
✡18:11: Mat 20:22; 26:39; Mak 10:38; 14:36; Luk 22:42
✡18:14: Mat 26:69-70; Mak 14:66-68; Luk 22:56-57
✡18:15: Mat 26:58; Mak 14:54; Luk 22:54-55
✡18:18: Mat 26:59-66; Mak 14:55-64; Luk 22:66-71
✡18:20: Sion 7:26; Mat 4:23; 26:55; Sion 6:59; 7:14
§18:24: En avong koanek, Kaiafas vi asuv houlu kati onen pris keil. Annas, kei vi asuv houlu onen pris keil ten sua koa evus, ka mari keihoen mul veah en hen.
✡18:24: Mat 26:71-75; Mak 14:69-72; Luk 22:58-62
✡18:26: Mat 26:51; Mak 14:47; Luk 22:49-50; Sion 18:10; 18:1
✡18:27: Mat 26:34; Mak 14:30; Luk 22:34; Sion 13:38
✡18:27: Mat 27:1-2,11-31; Mak 15:1-20; Luk 23:1-5,13-25
**18:28: Siu tai sakras vaha en out onen koakeil arvitei Siu, vuo vaanian vituai vatal min keil, vuo vatokol tounah koa keil arokoli. Siu keil amundemi keke hesakin keil ihilehilu en meten Ahi. Ka keke avato ris, iha ikas motein ave en avong vasi en wik tai, ka hekatau eni, iha isan sanien votut tai min Ahi. Hetetamen keil enek onen Siu keil arie lati keke amundem houlu usil mengkatien keil koa heting koe keil asakras avaanian valin mengkatien koa vit anou vinitei meatin sav tai.
✡18:31: Sion 19:6-7; 19:6; Umen 18:15
✡18:32: Mat 20:19; 26:2; Sion 3:14; 8:28; 12:33
✡18:37: 1Tim 6:13; Sion 3:32-33; 8:47; 1Sion 4:6