16
Iesu moul eris ran matien Mat 28:1-8; Luk 24:1-12; Sion 20:1-10
Ka en mendilah, navong Sabat evus, Meri ten out Makdela, Salome, ka Meri mama onen Iosev keilu Tiemes, telvul oel koa vite tahos keke telvasahula en teiai onen Iesu. Ka en Sande, visokon semau, navong meteiai kistal, telva keke telvasao en valengeihat. Navong telmul telmual veah en sise, telvis keitel eris telvit, “?Isei hetei lat mari ahat ten voiteh min iatel?”
Ka navong telvina tellesi keke ahat arei lati tuai, ka ahat enek mariso. Sakini, telva neim. Ka navong telva neim, telles meatin hau tai rondan en usite matu, musin en eisin tamuoh. Ka navong tellesi, telmutimanin eni. Rev 7:9,13
Ka kei viteni min keitel vit, “!Mitnametautei! Mitlekat Iesu ten out Nasaret koa amuti kati en aiveave. Kei moul eris ran matien tuai ka rorotei mun ekok. Mitkilea mitvales out koa aling teiai onen mul ien. Ka mitheha, mithehiteni min meatin keil onen, ka mithehit kati mok min Pita, keke Iesu helamu en keil heha provins ten out Kaleli. Keil ilesi en out enek hesuval koa kei viteni tuai min keil.” Mat 26:32; Mak 14:28
Navong teluahin telsital ran valengeihat, annivul kat keitel, telmaleilei ka tellohosai. Veni telmetau houlu, telroviten etai tounah koa tellesi min meatin sav en sise.* Tei en tus matu ten Mak evus en vas 8. Ka teisav en tus matu keil asorin selusien enek koa vit, “Sakini, keitel telva varei ven Pita ka teisav keil. Telviten hati tounah koa tellesi ka telraengoni min keil. Mul evus, Iesu, kei mok, sila meatin onen keil keke ika rasil iha en out vasi en out netan ka ihitehiten more longlongien ten moulien hau koa sakras vavus min meatin vasi keil.”
Tei en tus matu keil ten Mak, 16:9-20 tovuol ien
Iesu rie lat kei min Meri ten out Makdela Mat 28:9-10; Sion 20:11-18
Navong Iesu moul eris ran matien en visokon semau en Sande, kei kistal mulamu ven Meri ten out Makdela koa mulamu vile lat ninin tisa oulu (7) rani. 10 Ahin enek va, viten asa koa kur out min meatin keil onen koa amul amurang. 11 Ka navong araengoni keke Meri les Iesu moul eris ran matien, arkurtei anatin eni.
Iesu kistal min meatin elu en sise Luk 24:13-35
12 Katau ris, Iesu kistal ven meatin onen elu navong lumul luva en out sav. Ka keilu lurlei kileatei veni nan viles. 13 Ka navong lukilea suk, lumuris ka luviteni min teisav keil luvit lules Iesu, ka keil esuk arkurtei anatin en selusien onealu.
Iesu mai kistal min meatin keil onen Mat 28:16-20; Luk 24:36-49; Sion 20:19-23; Umen 1:6-8
14 Katau suk, Iesu kistal ven teindan tai (11) onen navong amul akanian. Ka vul kat keil veni demkatien one tovuol ka vatie keih ramat veni arkurtei anatin en selusien onen koakeil avit leini avit alesi moul eris ran matien. 15 Ka kei viteni min keil vit, “Miheha, miheka vasi out ka mihehitehiten more longlongien min meatin vasi keil ten out netan. 16 Ka meatin koa heling demkatien onen en more longlongien usil inau, mihehi baptaes en keil keke vatie lat anatinien teni. Hesakini, kei hekur moulien hau. Ka meatin koa rokurtei anatin en more longlongien enek, Ahi helei rahit usite one. Umen 2:38; 16:31,33 17 Koakeil akur anatinien, ikur keihoen koa hesakin keil umon merikel. Ihile lat ninin tisa en isok, ka iselus en selusien sav keil emun. Umen 8:7; 16:18; 2:4,11; 10:46; 19:6; 1Kor 2:2-4 18 Ka munak ikur tetal vuo imun oai tatisa koa hesakini imat, tounah hetovuol hesut keil. Keil iling he en koakeil amesai, ka itali lat keil ran mesaien one.” Luk 10:19; Umen 28:3-6; 4:30; 5:16; 8:7; Tiem 5:14-15
Iesu vina en out nesa Luk 24:50-53; Umen 1:9-11
19 Navong Iesu selus ral min meatin teindan tai (11) onen evus, Ahi kulati ran keil ka kuri vina nesa. En out nesa, Iesu rondan en usite matu onen Ahi. 2Ki 2:11; Umen 1:9-11; 1Tim 3:16; Sam 110:1; Mat 22:14; 26:64; Mak 12:36; 14:62; Luk 20:42; 22:69; Umen 2:33,34; 5:31; 7:55,56; Rom 8:34; Efes 1:20; Kol 3:1; Hib 1:3,13; 8:1; 10:12; 12:2; 1Pit 3:22 20 Ka meatin keil onen uva ka avitehiten selusien onen Ahi en out vasi. Ka Asuv Iesu mul kataun keil ka sakin merikel keil akistal en he. Koanek sakin meatin keil houlu akur anatin en selusien one. Umen 14:3; Hib 2:3-4
 
Koanek vi keite ten more longlongien usil Iesu Kristo koa Mak mutisi. Anatin.

^ Mat 28:1-8; Luk 24:1-12; Sion 20:1-10

16:5: Rev 7:9,13

16:7: Mat 26:32; Mak 14:28

*16:8: Tei en tus matu ten Mak evus en vas 8. Ka teisav en tus matu keil asorin selusien enek koa vit, “Sakini, keitel telva varei ven Pita ka teisav keil. Telviten hati tounah koa tellesi ka telraengoni min keil. Mul evus, Iesu, kei mok, sila meatin onen keil keke ika rasil iha en out vasi en out netan ka ihitehiten more longlongien ten moulien hau koa sakras vavus min meatin vasi keil.”

16:8: Mat 28:9-10; Sion 20:11-18

16:11: Luk 24:13-35

16:13: Mat 28:16-20; Luk 24:36-49; Sion 20:19-23; Umen 1:6-8

16:16: Umen 2:38; 16:31,33

16:17: Umen 8:7; 16:18; 2:4,11; 10:46; 19:6; 1Kor 2:2-4

16:18: Luk 10:19; Umen 28:3-6; 4:30; 5:16; 8:7; Tiem 5:14-15

16:18: Luk 24:50-53; Umen 1:9-11

16:19: 2Ki 2:11; Umen 1:9-11; 1Tim 3:16; Sam 110:1; Mat 22:14; 26:64; Mak 12:36; 14:62; Luk 20:42; 22:69; Umen 2:33,34; 5:31; 7:55,56; Rom 8:34; Efes 1:20; Kol 3:1; Hib 1:3,13; 8:1; 10:12; 12:2; 1Pit 3:22

16:20: Umen 14:3; Hib 2:3-4