Aesea
6
Ahi vise Aesea vamai vahi provet tai onen
Aesea 6:1-10
En sua koa asuv houlu Usaea ten out Sudah mat,* Asuv houlu Usaea mat vesesal en sua 740 BC (sua keil mulamu en avong koa Iesu avasi). inau, Aesea, nales Iahova mul rondan en vulin ten keihoen koa mul vina nesa. Kot koa musin eni tetaveah, ka ngolite vita netan sien out neim en Eim Votut onen. En out koa Iahova mul ien, vati angelo keil koa avise en ‘sereb’ amuka nesa eni ka ave mul vihil houlu. Retai en keil, apoue ahetai (6). En apoue elu, akav koe nae eni; ka en elu mun, akav koe ale tanetan eni; ka en elu mun, amuka eni. Ka navong amuka, avisohiso va min keil eris avit,
“!Votut, votut, votut! !Iahova, Asuv Houlu ten out nesa, vi votut! Rev 4:8
Keihoen onen mariso ka sien out netan.”
Hisoen keil one keih ka sakin eim enek kulul, ka neim en Eim Votut vilelau en eas. Eks 40:34-35; Rev 15:8 Navong nalesi, nametau houlu ka naviteni navit, “!Aue li, mamat ke! Selusien vasi keil koa akistal ran ongok romutotei, ka naro luhu en meatin keil koa selusien one mun romutotei en meten Ahi. Anatin eli, navilehilu ka nales Iahova, Asuv Houlu ten out nesa, en metok kati.”
Evus, sereb tai va en ahor koa amunit senta ien, kaeat kat ahat tai koa mukan vilhili rani, ka kuri mai venau. Navong mai, rokol ongok en ahat koa mukan vilhili ka viteni vit, “?Kolesi? Navong narokol ongom en ahat koa mukan vilhili ekek, Ahi sak motein moulien onom ran tisaen keil onom ka sakinuk kirmemoutei mun veni.”
Evus, naraengon Iahova selus vit, “?Nisila sei? ?Isei hehi provet onomai?”
Sakini naviteni navit, “!Inau ke! !Sila nau!”
Sakini, kei viteni minau vit, “Kiha kihiteni min meatin keil ekek kihit,
‘Avaseini mihetaeng heha vis …
kami miherlong kilea etai tounah.
Avaseini mihelele heha vis …
miherlei kilea etai tounah.’
10 Selusien onom hesakin vatin meatin keil ekek hemai hekeih imok,
houmon ralinge hehon ka mete hevar.
Veni munak ilei revi en tounah koa numoni en mete,
vuo ilong kilea eni en ralinge,
keil indem revi ka ihiles ran tisaen keil one
ka nimai nikulat mesaien ran moulien one.”

*6:1: Asuv houlu Usaea mat vesesal en sua 740 BC (sua keil mulamu en avong koa Iesu avasi).

6:3: Rev 4:8

6:4: Eks 40:34-35; Rev 15:8