Hevus, Mosis vis meatin keil ilah sanien keil one heha min Ahi keke avoumon Eim Tavolin eni ral min tounah keil teni ka eisin omon pris keil emun. Me-Isrel keil alah tounah houlu vis houlu mok mai veni. Evus, Ahi lei kan meatin elu koa meteisauen mul en keilu keke lumai luvi avat toumien, isealu Besalel ka Oholiap. Lulosil kat meatin toumien sav keil koa meteisauen mul en keil keke umon tounah keil enek hesuval koa Ahi rie min Mosis.

17 Sakini, en avong mulamu en avati koa mulamu en sua hau, sua kati katau en avong amemea ran out Isip, keil avat lat Mari Eim Tavolin onen Iahova. 18 Mosis sakin meatin keil avous ai keil teni ka aling kati en vulie ral min eitu keil teni. Evus, hatur ka vatiseng teni, aleh mal eni mulomal. 19 Navong alehei evus, keil aleh tavolin kav koe ai keil teni. Ka tavolin tamun, alehei mul kati, musil asa koa Ahi meng kati min Mosis. 20 Evus, vus ahat elu koa Mengkatien Halualim mul ien ka ling keilu en Bokis ten Hatkatien onen Ahi. Keil aling ai tahohoien elu lukirisil en out tatetalien ten Bokis. Ka apoh kat bokis en hoite teni. 21 Evus, alah Bokis ten Hatkatien va alingi neim en Eim Tavolin, ka rekein kaliko mul koe out koa mul ien. En sakien enek, Mosis musil asa koa Iahova meng kati mini. 22 Mosis viteni min keil avus avet taling tounah keil ien va neim en Eim Tavolin, hae en kaliko, en usite matu. 23 Ka ling veret ten sanien onen Iahova en hoite suval koa Iahova meng kati mini. 24 Ka en usite meil, aling laet koa mulomal eni. 25 Ka en out enek, en meten Ahi, kei munit laet musil asa koa Iahova meng kati mini. 26 Ka luhu en keilu, vesesal ven kaliko, kei ling titi out ten sanien koa amumoni en gol. 27 Ling tounah koa vite tahos mul ien ka muniti musil asa koa Iahova meng kati mini. 28 Amumoni evus, Mosis vis keil arekein kaliko en voiteh ten Eim Tavolin. 29 Ka en out enek, hae en voiteh teni, vis keil aling mari ahor keke avanit sanien votut keil ien eni. Alingi evus, Mosis muas sipsip tai ka muniti eni ral min sanien votut ten uti uit keil musil asa koa Iahova meng kati mini. 30 Vis keil aling pesin takas ahe ien mul vas Eim Tavolin ka mari ahor ten sanien. Evus, amutah oai va ien. 31-32 Alingi mukok keke avong vasis koa Mosis, Eron ka natnali keil avit avaha en Eim Tavolin vuo avanit sanien en avet teni, akilea avakas motein he vuo ale tanetan en out enek musil asa koa Iahova meng kati min Mosis. 33 Katau en tounah keil enek, Mosis sakin meatin keil amumon vieh en kaliko karahit Eim Tavolin ka ahor ten sanien. Ka en meteau teni, aleh koe en kaliko tamun. Mukonek, umen ten Eim Tavolin enek, Mosis mum vasi.

34 Evus, mahmah mita mutaluh koe Out Tahisuen karahit Eim Tavolin, ka muohien onen Iahova mita va sien Eim Tavolin enek.✡1Ki 8:10-11; Aes 6:4; Esek 43:4-5; Rev 15:8 35 Ven tounah enek, Mosis sakras vaha neim en Eim Tahisuen vuo en Eim Tavolin. 36  Me-Isrel keil amul ales mahmah koa mul nesa en Eim Tavolin. Navong mahmah mea, keil emun amemea, alah lat votevav keil one ka amusili. 37 Ka navong mahmah mules en out enek, keil emun amules. 38 En avong vasis koa keil amul amual, akilea ales mahmah onen Ahi mul nesa en Eim Tavolin, ka en vongien keil alesi viles mai vi ahang koa vilhili.