15
Vatte ten demkatien orer
Tuak ka ahinkuli keil, ek vati mihendem ris more longlongien koa navitehiteni min kami. More longlongien enek, kami mikuri vi onami ka mimulomal keih eni. More longlongien enek koa naviteni min kami, mul mutut moulien onami munak miling demkatien onami keih eni. Ka munak mimusil sise sav, demkatien onami hemai hehi heisav enges.
Veni more longlongien koa vi hetetamen imok koa inau nakuri, nasa lati vat min kami. Ka selusien teni keie: Iesu mat ven tisaen orer musil asa koa amutisi mul en Tus Votut. Aes 53:8-9 Navong mat, arahini. Ka en avong etel teni, Ahi rali lati moul eris ran matien musil asa koa amutisi en Tus Votut. Sam 16:10; Hos 6:2; Siona 1:17; Mat 12:40; Umen 2:24-32 Navong moul eris, kistal ven Pita ka, evus, min teindan elu (12) onen. Luk 24:34; Mat 28:16-17; Mak 16:14; Luk 24:36; Sion 20:19 Evus, en avong tai, kei kistal min koakeil amusili koa amulin handred elim (500) koa amul en out tai. Houlu en keil amoul veah kosa, ka teis umat tuai. Evus, Iesu kistal min Tiemes,* Tiemes enek vi tunali Iesu koa mutis Tiemes ka koa aselus usili en Mat 13:55; ka Kal 1:19. ka katau, kei kistal min eiloheh vasi keil onen. Luk 24:50 Ka amutimanin keke, katau suk en keil vasi, Iesu kistal minau, suval amutimanin en titiali koa mai en avong koa romaltei teni. Umen 9:3-6; 1Kor 9:1 Ven koanek, namundemi keke navi havivi mok en eiloheh sav keil, ka nalonge suval narvinvintei makur eis ten eiloheh tai veni, mulamu, nuvae kat meatin keil en Sios onen Ahi. Efes 3:8; 1Tim 1:15; Mat 5:19; Umen 8:3 10 Ka ven more envatien onen Ahi, inau numai navi eiloheh anatin. Ka more envatien koa kei rie lati minau rovitei heisav. Veni inau namum keih imok mulin eiloheh sav keil. Ka roviteis inau koa namul namum, ka more envatien onen Ahi mul mum ka enau. 2Kor 6:1; 11:5,23 11 Sakini, munak hihiseien enek heka venau, vuo heka ven eiloheh sav keil, koanek vi asa koa komai vasi mevitehiteni, ka koanik vi asa koa kami vasi mimai mikur anatin eni.
Anatinien keke Kristo moul eris ran matien vi vatte ten demkatien orer
12 Komai memul mevitehiteni keke Iesu moul eris tuai ran matien. ?Mukonek, vensa tei en kami mimul mivit koakeil umat asakras avamoul eris ran matien? 13 Munak koanek vi anatin, vasuval koa Iesu emun romoultei eris ran matien. 14 Ka munak vi anatin keke Iesu romoultei eris ran matien, more longlongien koa komai mevitehiteni min kami vi heisav enges, ka demkatien onami emun vi heisav enges. 15 Ka hemukonek, selusien onomai usil Ahi emun vi luvosien enges, veni mevitehiteni keke Ahi rali lat Iesu ran matien. Ka munak vi anatin keke koakeil umat asakras avamoul eris ran matien, Ahi sakras vatali lat Iesu rani. Umen 1:22; 4:33; 5:32 16 Veni munak koakeil umat irmoultei eris, Iesu emun romoultei eris ran matien. 17 Ka munak Iesu romoultei eris ran matien, demkatien onami vi heisav enges, ka kami mivupuol veah en tisaen keil onami. 18 Ka mukonek, koakeil akur anatin en Iesu koa umat tuai, keil emun avupuol en tisaen keil one. 19 Ka munak desien orer en Iesu mul kataun ir en moulien koanek enges, ka rokatauntei mun ir en moulien koa hemai, demkatien orer vi heisav enges ka mal imok keke rehelonge hetisa helin meatin sav keil.
20 Ka vi anatin keke Iesu moul eris tuai ran matien. Ka anatinien teni mul rie lati keke koakeil emun umat, imoul eris. Iesu suval moei anien koa akur rohtoh eni koa rie lati keke anien sav keil houlu emun imemea ran ah. Kol 1:18 21 Matien emai min ir ka en meatin tas. Ka en vati sise enek, mearisien ran matien emun emai min ir ka en meatin tai. Sen 3:17-19; Rom 5:12,18 22 Ven asa koa Adam mumoni, ir koa rokistal en ara onen, romul romat suvali. Ka ven asa koa Kristo mumoni, koakeil akapil ral min Iesu, imoul eris ran matien hesuvali. 23 Ka tetai en ir hemoul eris en avong mal teni: Iesu mea mulamu, ka navong hemai ris, ir esuk koa rovi onen, rehemoul ris. 1Kor 15:51-52; 1Tes 4:16; Rev 20:5 24 Ka katau en avong enek, keite ten tounah vasi hemai. En avong enek, Iesu hevae hetal min koakeil vasi atisa koa akur hiasuvien, hetetamenien ka keihoen, ka helohlin keil vasi. Hevus, hiasuvien ten tounah vasi, hesani heha ven Ahi Tamer. Dan 2:44 25 Musil rendemien onen Ahi, Kristo helosil kat tounah vasi emau hetokol avong koa hehitan en vativieh keil onen iha en hen. Sam 110:1; Mat 22:44 26 Ka vativieh ekor koa Iesu hevae lini hehi matien. Rev 20:14; 21:4 27 Hesuval koa Tus Votut viteni koa vit, “Ahi ling tounah vasi keil koa mumoni en hen.” Sam keil 8:6 Ka navong viten “tounah vasi koa mumoni en hen,” rokilea keke roselustei usil Ahi koa lingi en hen. 28 Ka navong Ahi ling tounah vasi mul en hen Natnali tuai, Natnali heling kei sasen en hen Ahi. Hesakini, Ahi varei hehi houlu helohlin vasi tounah keil.
29 ?En usite eris ten mearisien, munak vi anatin keke meatin keil asakras avamoul eris ran matien, vensa varei tei en meatin keil, amul avi baptaes en keil en usite onen koakeil umat tuai? 30 ?Ka munak vi anatin keke meatin keil asakras avamoul eris ran matien, vensa varei inau ka eiloheh sav keil memul mevisu en avong takeih keil lises? Rom 8:36; 2Kor 4:10-11 31 Anatin, en avong vasi keil, navisu ral min matien. Tuak ka ahinkuli keil, selusien onak vi anatin suval koa vi anatin keke namul navut nau ven demkatien koa mikuri en Iesu Kristo, Asuv orer. Rom 8:36; 2Kor 4:10-11 32 En avong tai, me-Efeses keil aso koe nau ven selusien onen Ahi koa namul navitehiteni ka avit avatali vas vis nau vasuval avi huli rendan keil. ?Ka munak namumoni en rendemien koa ten out netan enges, ka meatin keil asakras avamoul eris ran matien, hekataunau hemukave? Veni munak hemukonek, hetahos imok rehousil rendemien matu onen Siu keil koa vit,
“Reheanian ka rehemunmun
veni visuvong, rehemat.” Aesea 22:13 Aes 56:12; Luk 12:19-20
33 Minamaentei meatin keil analuvos kami suval selusien matu enek mul viteni, “Navong kolah ruai ral min meatin tisa keil, more moulien onom hemai hehilehilu.” 34 Sakini, rendemien onami hehiles hemai ris hetahos ka mihehati kami en tisaen keil onami. En lesien onak, sakien onami mul rie lati keke tei en kami areingeingen Ahi varei. Koanek vi memouen onami. Rom 13:11; Efes 5:14; Umen 26:8; 1Kor 6:5
Navong rehemoul eris ran matien, aver hehiles
35 Vahesa meatin tai hehisi hehit, “?Meatin keil imoul eris ran matien hemukave? ?Ka navong imoul eris, ave ilesi hemukave?” 36 Vati meatin koanek, vatin tovuol veni meatin vasi keil akilea en koanek: navong koluh utiai tai en atan, utiai enek hemat emau vasakin tounah tai hehiteh heka eni ka hemoul. Sion 12:24 37 Ka navong koluh tounah tai, korluhtei tounah koa moul marite tuai. !Vuo! Koluh utite teni enges suval kon, bin, ka kabis. selusien kati vit, uit vuo gren sav tai 38 Ka mul en Ahi keke vasakini hel hemoul hemarite hemukave. Ka en utiai tateisav vasi keil, kei sakin keil amoul amusil vati sakien keil one. Sen 1:11
39 Ka koanek vatte tas en tounah keil koa amoul ka akur ave. Aven meatin keil teisav en aven tirendan keil, ka aven tirendan keil emun teisav en aven aman keil. Ka aven aman keil emun teisav en aven mesau keil. 40 Ka en vati rendemien koanek, tounah keil koa amul en teilang, ateisav en tounah koa amul en out netan. Tounah keil ten teilang avi moreite en sakien sav ten tounah keil ten out netan. 41 Ka keil emun ateisav. Tetinien ten meteiai teisav en tetinien ten avati, koa teisav emun en tetinien onen hitu keil. Ka en hitu keil emun, tetinien one teisav en keil eris.
42 Sakini, en vati rendemien enek, aven koakeil umat iteisav en ave koa ikuri navong imoul eris ran matien. Navong arahin teiai onen meatin tai, teiai enek hemande hesuval aluh utiai tai. Ka navong meatin enek hemoul eris ran matien, aven heteisav keke hel lisenges ka hermattei mun. 43 Navong arahin meatin tai, ales aven suval tounah koa rotahostei ka memerau enges. Ka navong hemoul eris ran matien, iles aven keke hetahos imok ka keihoen hel ien. Plp 3:20-21 44 Navong arahini, teiai onen meatin tai hevinvin vato en out netan enges, ka navong hemoul eris ran matien, aven enek hevinvin vato en out nesa. Veni aven meatin keil en out netan mul, rokilea keke ave koa ikuri en out nesa emun hel. 45 Ven koanek, Tus Votut viteni keke, Adam, koa Ahi mum rohtoh eni, mai vi meatin koa moul. Sen 2:7; Sion 6:63; 2Kor 3:16,17 Ka Adam koa katau, koa vi Kristo, mai vi ninin koa san moulien min meatin keil. 46 Ahi rosantei mau aver koa ten out nesa min ir. Vuo. Mulamu, kei san aver koa vinvin rovato en out netan. Ka katau suk, hesan aver min ir koa hevinvin rovato en out nesa. 47 En avong telamu, Ahi mum rohtoh en aven Adam, meatin koa mulamu, en atan ten out netan. Ka Adam koa katau, kei ka en out nesa. Sen 2:7 48 Koakeil amul en out netan asuval Adam koa amumoni en atan. Ka koakeil imoul en out nesa isuval kei koa ka en out nesa. 49 Suval netin koa ir rokur suvalien onen meatin koa amumoni en atan, rehekur suvalien emun onen meatin koa ka en out nesa. Sen 5:3
50 Tuak ka ahinkuli keil, asa koa namul naviteni ekek: ir rosakras rovaha rovakur vuler en out nesa koa Ahi vi Asuv Houlu eni vatal min aver koa vi husi ka ara enges, veni aver koa kilea vamat ka vamande sakras vato en out koa tounah keil asakras avamat ien. 1Kor 6:13
51 Mihetaengon revi ka mahit luvat lingkatien suai onen Ahi koa kei vothot eni kosa: hervitei ir vasi koa rehemat, ka ir vasi aver hehiles. 1Tes 4:15-17; Mat 24:31 52 Hekistal hemukok: en hati avong tai, navong amuh kor en amaru onen Ahi, koakeil umat imoul eris ran matien ka irmattei mun. Ka ir vasi koa romoul romules, aver hehiles. Tounah keil enek hekur out hekalah, hesuval navong mipol kat metomi ka mimule ris. 53 Veni hesuval koa rehekulat aver koa kilea vamat ka vamande keke rehekesi en aver koa sakras vamat vuo vamande. 2Kor 5:4 54 Navong koanek hekur out, selusien koa mul en Tus Votut hemai hehi anatin koa vit,
“Matien, Ahi mu lini tuai.” Aesea 25:8
55  “Matien sakras valohlin ir.
Keihoen onen hetovuol emun vapurun ir.” Hosea 13:14
56 Asa koa sakin matien kilea vapurun meatin keil vi tisaen. Ka tisaen kur keihoen onen navong rokilea en mengkatien keil onen Ahi ka rorali vasi. Rom 7:13; 6:14 57 Ka rehemasmas Ahi ven asa koa Iesu Kristo, Asuv orer, mumoni sakin ir rolohlin keihoen ten tisaen ka matien emun. Rom 6:14
58 Sakini, tuak ka ahinkuli keil, veni mearisien vi anatin ka rolohlin keihoen ten tisaen ka matien, mihelomal hekeih ka minakaikaitei en demkatien onami. Mihemarir lises en umen koa mimumoni min Ahi Asuv veni mikilea keke umen onami hervitei heisav enges. 2Kron 15:7; Rev 14:13

15:3: Aes 53:8-9

15:4: Sam 16:10; Hos 6:2; Siona 1:17; Mat 12:40; Umen 2:24-32

15:5: Luk 24:34; Mat 28:16-17; Mak 16:14; Luk 24:36; Sion 20:19

*15:7: Tiemes enek vi tunali Iesu koa mutis Tiemes ka koa aselus usili en Mat 13:55; ka Kal 1:19.

15:7: Luk 24:50

15:8: Umen 9:3-6; 1Kor 9:1

15:9: Efes 3:8; 1Tim 1:15; Mat 5:19; Umen 8:3

15:10: 2Kor 6:1; 11:5,23

15:15: Umen 1:22; 4:33; 5:32

15:20: Kol 1:18

15:21: Sen 3:17-19; Rom 5:12,18

15:23: 1Kor 15:51-52; 1Tes 4:16; Rev 20:5

15:24: Dan 2:44

15:25: Sam 110:1; Mat 22:44

15:26: Rev 20:14; 21:4

15:30: Rom 8:36; 2Kor 4:10-11

15:31: Rom 8:36; 2Kor 4:10-11

15:32: Aes 56:12; Luk 12:19-20

15:34: Rom 13:11; Efes 5:14; Umen 26:8; 1Kor 6:5

15:36: Sion 12:24

15:37: selusien kati vit, uit vuo gren sav tai

15:38: Sen 1:11

15:43: Plp 3:20-21

15:45: Sen 2:7; Sion 6:63; 2Kor 3:16,17

15:47: Sen 2:7

15:49: Sen 5:3

15:50: 1Kor 6:13

15:51: 1Tes 4:15-17; Mat 24:31

15:53: 2Kor 5:4

15:56: Rom 7:13; 6:14

15:57: Rom 6:14

15:58: 2Kron 15:7; Rev 14:13