Selusien koa helamu ten
1 Pita
?Isei mutis selusien koanik?
Pita koa vi eiloheh tai onen Iesu Kristo mutis leta koanek✡1Pit 1:1 en sua 63 AD (sua keil koa katau en avong Iesu avasi). Navong Iesu vise rohtoh en Pita, kei vi meatin talah mesauien ral min tunali koa Andru,✡Mak 1:17 ka Iesu viles keilu lumai luvi meatin keil onen. Navong Iesu vesesal valokovein out netan, kei ling Pita vi houlu en eiloheh sav keil.✡Sion 21:22 En tus ten ‘Umen onen eiloheh keil,’ houlu en selusien ten sapta 1-12 mul vit usil tounah koa Pita mumoni. Vesesal en keite ten moulien onen, Pita va en mari taon ten out Rom (koa vise suaini en Babilon) ka lesi keke, en out vasi, Kristin keil avotini keih veni akur sakvisien en hen kavmen, en hen me-Isrel sav keil koa asesein Iesu, ka en hen tiser taluvosien keil koa amul avisein keil en tounah houlu koa rovitei anatin. Sakini, Pita mutis leta koanik vahati lat rendemien onen Kristin keil.
?Isei vuli selusien koanik mulamu?
Pita mutis selusien koanek va min me-Isrel keil koa aling demkatien one en Iesu Kristo. Ka navong sakvisien keil mai keih imok en out Serusalem, houlu en Kristin keil alokovein out Serusalem ka uva suk en out savsav keil. Ka en out vasi koa uva ien, akur more longlongien usil Iesu Kristo ka meatin sav keil emun umai aling demkatien one en Iesu Kristo.
?Pita mutis selusien koanik vensa?
Pita en vati vasel kat Kristin keil availea keke Ahi rie lat keil avahi onen – Ahi rie lat Kristin keil avahi Eim Votut onen,✡1Pit 2:4 avahi pris keil onen,✡1Pit 2:5,9 ka avahi horetan ten kantri koa vi votut onen.✡1Pit 2:9,11 Ven koanek, aro en out netan suval avahi heou keil.✡1Pit 2:11
Pita en vati vasel kat Kristin keil avahouhou min avat keil one en out netan – Pita kilea keke Kristin keil houlu amul avotini keih en hen koakeil ten kavmen. Ka avaseini, Pita sel kat Kristin keil keke ihouhou min keil.✡1Pit 2:13-17
Pita en vati vasel kat Kristin keil avahouhou min keil eris – Pita sel kat slev keil um housil rendemien onen masta keil one,✡1Pit 2:18-20 ahin keil ihouhou min meatin keil one,✡1Pit 3:1-6 ka meahos keil ihouhou min ahin keil one.✡1Pit 3:7
Pita en vati vasel kat Kristin keil avahikiti avoum vatahos – Avaseini keke amul akur mahien keil, Kristin keil umon tounah vasi hetal min rendemien koa heha netan✡1Pit 3:8 ka anasa kestei sakien keil koa tisa.✡1Pit 3:9 Veni mal keke meatin keil onen Kristo ikur mahien ven demkatien navong amum mal veni kei varei kur mahien.✡1Pit 4:12-17
Pita en vati vasel kat koakeil ten sios avahouhou revi min elda keil one – Pita sel kat elda keil keke ilosil kat revi meatin keil onen Ahi,✡1Pit 5:1-4 ka sel kat Kristin keil ilong kat elda keil one ten sios.✡1Pit 5:5
Mari rendemien tai ten selusien koanik mul en 1 Pita 4:12-13
Tuak onak eli keil en demkatien, minatimanintei en mahien takeih keil koa mimul mikuri keke vasak vis kami. Minandemtei minahit tounah keil enek irmaitei en kami. Vuo, kosa mihehilelau en sien veni mimul en vati sise ten mahien koa Iesu emun mul ien. Ka en keite ten sise koanik, en avong Iesu hehothot en hetetamenien onen, kami mihehilelau hehi houlu mun en sien.
?Asa mul en selusien koanik?
1. Ahi rie lat vangi meatin keil avahi onen keke avahi votut. (1:1–2:10)
2. Kristin keil ihouhou min meatin sav keil hetal min rendemien koa heha netan. (2:11–3:7)
3. Avaseini mahien keil koa akuri, Kristin keil ilomal hekeih navong amundem kat Iesu koa kur mahien ven keil. (3:8–4:19)
4. Kristin keil ihouhou min koakeil ten sios veni akilea keke Iesu hemai ris. (5:1-14)
1
Hitkileaen onen Pita usil leta koanik
1 Inau Pita, eiloheh onen Iesu Kristo. ✡Tiem 1:1
Namul namutis leta koanik va min kami, Kristin keil koa miro en provins keil ten out Pontas, Kalesia, Kapadosia, Esia, ka Bitinia. Ahi rie lat kami mivi onen, ka kosa, miro rasil en out netan suval heou keil.*Avise Kristin keil en ‘heou’ veni vulie kati vi out nesa. Les visi en Umen 8:1,4; 11:19. 2 Ahi Tamer rie lat kami veni, en avong telamu, kei kilea en kami ka mum revi tounah vasi musil rendemien onen. Sakini, Ninin onen mumon kami mivi votut keke mivalong kat Iesu Kristo ka keke ran vasakin kami mivatolas ran tisaen keil onami. ✡Rom 8:29; 2Tes 2:13; Hib 12:24
Navis Ahi hesakin moulien onami hehilelau en more envatien ka tomat onen.
Rehemasmas Ahi veni kei mumon sise keke voutut ir
3 !Rehesan masmasien hehina min kei koa vi Ahi ka Tata onen Iesu Kristo koa vi Asuv orer! Ven enmahisien onen mariso, Ahi sakin ir rovi heite hau koa rovi titan kati, ka rehendesini keke rehemoul eris ran matien ka rehekur moulien ten lisenges veni rokapil ral min Iesu koa moul eris ran matien. ✡2Kor 1:3 4 Ka rokilea revi emun keke rehekur tounah keil tetahos koa Ahi ling revi mules hehi onen meatin keil onen. Kei ling revi keil amules en out nesa keke asakras avamande, asakras avatisa, ka asakras avamatu. 5 Tounah keil enek avi onami koa Ahi mul ring koe kami ral min keihoen onen. Kei mul ring koe kami ral min demkatien onami hetokol keite ten tounah vasi koa hehothot en keite ten sise ten mututien koa kei ling kati. ✡Sion 10:28; 17:11
6 Sakini mikilea mihesi kami hehi houlu mok ven tounah keil enek vi anatin, avaseini keke, kosa, mikur mahien keil ten avong havivis en sakvisien tateisav keil koa amul akistal ven kami. ✡Tiem 1:2 7 Sakvisien keil enek mul mai vatie lati keke demkatien onami vi anatin. Demkatien onami suval gol koa alingi en ahang van moteini vatolas ran tisaen teni keke mai vi gol anatin. Ka demkatien onami tahos imok mulin gol koa kilea vatisa. Ka munak ihotini keke demkatien onami hehi anatin, Ahi hesan masmasien, hetetamenien ka houhouen min kami en avong koa Iesu Kristo hemai hekistal eni. ✡Siob 23:10; Sam 66:10; Pro 17:3; Tiem 1:3; Aes 48:10; Sak 13:9; Mal 3:3; 1Kor 3:13 8 Avaseini mirlestei veah, emi vat Iesu Kristo. Anatin, avaseini mirlestei kei en avong kosa, kami mimul mikur anatin eni. Sakini, mivilelau en mari sien teni koa selusien enges rovinvintei vahiteni. ✡Sion 20:29; 2Kor 5:7 9 Ka mimul mikur heite ten demkatien onami koa mirosini mivakuri, koa vi mututien ten moulien onami. ✡Rom 6:22
10 Sise ten mututien koanik, provet keil telamu e vati mok availea. Sakini avuli tus houlu ka alekat revin rendemien keil keke availeile eni. Ka keil avit leini usil more envatien koa Ahi hetie lati min kami. ✡Mat 13:17; Luk 10:24 11 En avong koanik, Ninin onen Kristo sien keil ka sakin keil avitehiten usil mahien keil koa Kristo hekuri, ka hetetamenien koa hekuri hekatau eni. Keil asak avahotin avong hekistal ien ka hemukave hemai. ✡Sam 22; Aes 53; Luk 24:26 12 Ahi vothot eni min provet keil keke selusien keil one rovitei ten avong one, vuo, vi ten avong orer. Anatin, asa koa keil vit leini mulamu, kosa, meatin keil avitehiteni navong aviten more longlongien min kami en keihoen koa ka ven Ninin Votut koa Ahi ten out nesa sila ven kami. Anatin eli, tounah keil koa mimul milesi mai kistal kosa, angelo keil emun asi keil houlu mok keke avatapehai avalesi vakistal. ✡Efes 3:10
Sakien orer hetolas veni Ahi vul lat ir ral min ran Iesu Kristo
13 Sakini, veni mimul mikur mututien onami tuai, mihesak mesein rendemien onami houm: rendemien onami heilea revi lises ka miheling desien onami hevus varei en tokolkatien koa Ahi hesani min kami navong Iesu Kristo hemai ris hekistal ien. ✡Luk 12:35; Efes 6:14 14 Mihelong kat Ahi hesuval more titiali keil along kat ren tame keil. Minoumontei mun sakien tatisa keil koa mimumoni mulamu en avong koa mirkurtei veah ileilien usil Iesu Kristo. ✡Rom 12:2; Efes 2:3; 4:17-18 15 Sakien onami heteisav, kami mihehi votut en tounah vasi mimumoni. Anatin, mihehi votut veni Ahi koa vise kami mivi onen, kei vi votut. 16 Koanik anatin, veni Tus Votut viteni vit, “Mihehi votut veni inau navi votut.” Levitikas 19:2 ✡Lev 11:44,45; 20:7
17 Ahi, koa mivise en Tata navong mivis mini, kei rolestei meatin tai mulin meatin sav, ka mul lei rahit usite onen meatin vasi keil musil asa amumoni. Mukonek, mihouhou mini ral min moulien onami en avong vasi koa miro suval heou en out netan. ✡Sam 89:26; Aes 64:8; Ser 3:19; Mat 6:9; Luk 11:2; 2Kron 19:7; Umen 10:34; Rom 2:11; Kal 2:6; Efes 6:9; Kol 3:25; Sam 28:4; 62:12; Pro 24:12; Aes 59:18; Ser 17:10; Rom 2:6; 1Kor 3:8; 2Kor 11:5; 2Tim 4:14; Rev 2:23; 18:6; 20:13-14; 22:12 18 Anatin, mihehouhou min Ahi ral min moulien vasi onami veni mikilea tuai mormore tounah koa Ahi sani keke vahul lat moulien onami. Mulamu, mimusil kat sakien keil onen avu onami keil koa avi heisav enges, ka Ahi vul lat kami mimaluv ran sakien heisav keil enek. Ka rovul lattei kami en tounah koa kilea vatisa, vasuval silva vuo gol. 19 Vuo, Ahi vul lat kami en tounah koa moreite mok mulin tounah vasi keil en out netan. Kei vul lat kami en ran Iesu Kristo, koa mat suval sipsip ten sanien votut koa mesaien vuo tisaen tovuol ien.†Sipsip ten sanien votut, tounah tovuol vakula (Eks 12:5). ✡Umen 20:28; Hib 9:12; 1Pit 1:2 20 En avong telamu, navong Ahi romumontei veah out netan, kei rie lat Iesu tuai keke hesa lat moulien onen. Ka kosa, vesesal en keite ten tounah vasi, Ahi vothot eni keke vahinat kami. ✡Umen 2:23; Efes 1:4 21 Iesu mai vi sise keke mivakur anatin en Ahi koa rali lati ran matien ka san hetetamenien mini. Ven koanik, miling demkatien ka desien onami keih en Ahi. ✡Sion 14:6; Rom 5:1-2; 4:24; 10:9
22 Navong milong kat anatinien onen Ahi, misakin kami mimuto ran sakien tatisaso keil onami. Ka ven koanik, emi vat tuomi keil en demkatien ral min envatien tai koa vi anatin. Sakini, ral min moulien vasi keil onami, mihehikit sakien koa emi hehathat kami eni. ✡Sion 13:34; Rom 12:10 23 Mihoumoni hemukonek, veni mikur moulien hau koa tateisav en moulien koa mikuri en tata vuo mama keil onami ten out netan koa akilea avamat. Vuo, moulien hau enek ka en selusien onen Ahi koa moul lisenges ka sakras vavuol. ✡Sion 1:13; Hib 4:12; Dan 6:26 24 Koanik suval asa koa Tus Votut mul viteni vit,
“Meatin keil vasi ten out netan akilea avamat avasuval oumunai.
Tahosien vasi keil one avi ten avong havivis suval hungevai keil ten eivorohus.
Anatin, oumunai mul mukou ka hungevai keil umotmot,
Selusien koanik vi more longlongien koa avitehiteni min kami.
*1:1: Avise Kristin keil en ‘heou’ veni vulie kati vi out nesa. Les visi en Umen 8:1,4; 11:19.
✡1:2: Rom 8:29; 2Tes 2:13; Hib 12:24
✡1:7: Siob 23:10; Sam 66:10; Pro 17:3; Tiem 1:3; Aes 48:10; Sak 13:9; Mal 3:3; 1Kor 3:13
✡1:11: Sam 22; Aes 53; Luk 24:26
✡1:14: Rom 12:2; Efes 2:3; 4:17-18
✡1:17: Sam 89:26; Aes 64:8; Ser 3:19; Mat 6:9; Luk 11:2; 2Kron 19:7; Umen 10:34; Rom 2:11; Kal 2:6; Efes 6:9; Kol 3:25; Sam 28:4; 62:12; Pro 24:12; Aes 59:18; Ser 17:10; Rom 2:6; 1Kor 3:8; 2Kor 11:5; 2Tim 4:14; Rev 2:23; 18:6; 20:13-14; 22:12
†1:19: Sipsip ten sanien votut, tounah tovuol vakula (Eks 12:5).
✡1:19: Umen 20:28; Hib 9:12; 1Pit 1:2
✡1:21: Sion 14:6; Rom 5:1-2; 4:24; 10:9
✡1:23: Sion 1:13; Hib 4:12; Dan 6:26