10
O tuak ka ahinkuli keil, ek vati li mok keke Ahi houtut meatin kati keil onak. Ka lisenges namul navis keih mini en usite one. Nakilea mahiteni min kami keke me-Isrel keil e vati mok avousil kat Ahi, ka armumontei en sakien koa vi anatin koa Ahi rie lati min keil. Umen 22:3 Ka veni keil areingeingen sise koa Ahi lingi keke meatin keil umai amal en meten, asak visi avoumon sise sav keke avakur maluen enek. Sakini, aling rendemien one keke avarmusiltei sise ten maluen koa Ahi mumoni tuai. Rom 9:31-32 Veni Kristo sakin avong koa meatin keil asak visi avakur maluen vaka en mengkatien keil mai rokol keite teni. Sakini, kosa, koakeil aling demkatien one eni, keil varei umai amal en meten Ahi. Mat 5:17; Sion 3:18; Hib 8:13
Ahi mutut meatin vasi keil ka en sise ten demkatien enges
Mosis mutis selusien koanik usil mukave meatin kilea vamal en meten Ahi ka en sise ten mengkatien keil vit, “Koakeil vasi along kat selusien vasi ten mengkatien keil ekek imoul.” Levitikas 18:5 Kal 3:12
Ka en usite ten selusien koa vit usil mukave meatin keil akilea avamai avamal en meten Ahi ka en sise ten demkatien, Tus Votut vit, “Keik konahistei en rendemien onom konahit, ‘?Isei hehina en out nesa keke vakuri?’ ” Duteronomi 30:12 Veni koanek suval koa e vat Kristo vamita ris en out netan keke vaselus usili. Ka kei mita tuai. “Vuo kovahisi kovahit, ‘?Isei hehita en out ten matien vakuri?’ ” Duteronomi 30:13 Veni koanek suval e vat Kristo vamea ris ran out ten matien keke vaselus usili. Ka kei mea moul eris ran matien tuai. Ka asa koa Mosis viteni ekek, “Selusien onen Ahi mul vesesal ven kami, mul tuai en ongomi ka tinomi.” Duteronomi 30:14 Dut 9:4 Ka koanek vi selusien ten demkatien koa komai memul mevitehiteni. Veni munak mivit leini en ongomi keke Iesu vi Asuv, ka mikur anatin eni en tinomi keke Ahi rali lati ran matien, Ahi houtut moulien onami. 10 Veni navong meatin tai kur anatin eni en tin, Ahi lesi mal tuai en meten. Ka navong vit leini en ongon, Ahi mutut moulien onen tuai. 11 Veni Tus Votut viteni vit, “Koakeil akur anatin en kei, tounah tovuol kilea vasakin keil avamemou eni.” Aesea 28:16 Rom 9:33 12 Koanik vit usil ir vasi. Veni, en meten Ahi, tounah tovuol vateisav en Siu keil ka koakeil arvitei Siu. Ahi vi vati Asuv etin onen meatin vasi keil, ka san tokolkatien koa mariso va min koakeil vasi avise ven kataunien. Umen 10:34; 15:9 13 Koanek suval Tus Votut viteni koa vit, “Meatin vasi koa avise Iahova ven kataunien, kei houtut moulien one.” Soel 2:32
14 ?Ka meatin keil akilea avahis Ahi ven kataunien hemukave munak arkultei veah anatin eni? ?Ka keil akilea avakur anatin eni hemukave munak arlongtei veah selusien usili? ?Ka keil akilea avalong selusien usili hemukave munak meatin tovuol vaha vahitehiteni min keil? 15 ?Ka meatin keil akilea avaha avahitehiten selusien enek hemukave munak meatin tovuol vasila lat keil avaha? Koanek suval Tus Votut viteni koa vit, “Navong meatin keil akur more longlongien, amaien one moreite mok.” Aesea 52:7 Neham 1:15; Efes 6:15 16 Ka rovitei meatin vasi keil koa along kat more longlongien enek. Veni provet Aesea viteni mun vit, “?Iahova, isei kur anatin en selusien onomai? Meatin tovuol.” Aesea 53:1 Sion 12:38 17 Sakini, helamu, meatin tai heha hehitehiten more longlongien usil Iesu Kristo min meatin keil. Hevus, meatin keil akilea avalonge. Ka navong alonge, akilea avaling demkatien one en kei. Sion 17:20
18 Ka navis kami, “?Mukave, vi anatin keke me-Isrel keil arlongtei more longlongien usil Kristo?” Vuo, keil alonge tuai. Veni koanek suval Tus Votut viteni koa vit,
“Rea one karahit out vasi,
ka longlongien keil one usil Ahi va rokol meatin vasi keil en out netan.” Sam keil 19:4
19 Navis ris kami, “?Mukave, vi anatin keke me-Isrel keil arkileatei asa koa Ahi vit voumoni?” Vuo akilea, veni Mosis mutisi keke Iahova varei viteni vit,
“Inau nitokol kat koakeil arvitei meatin kati keil onak
keke vasakin kami, meatin kati keil onak, mivahi elu eni.
Anatin, numoni hetahos en kantri onen koakeil arkileatei inau.
En sise enek, nisakin kami, meatin kati keil onak, tinomi hetisa eni.” Duteronomi 32:21
20 Ka Ahi vit kilea imok eni navong selus ka en provet Aesea vit,
“Koakeil arlei kattei nau, keil varei avotin nau.
Anatin, navothot enau min koakeil armultei avahise inau.” Aesea 65:1
21 Ka Ahi vit usil me-Isrel keil vit,
“En avong vasi, namutelan hek keke makur revi meatin keil onak.
Ka arlong kattei inau ka vatie keih ramat.” Aesea 65:2

10:2: Umen 22:3

10:3: Rom 9:31-32

10:4: Mat 5:17; Sion 3:18; Hib 8:13

10:5: Kal 3:12

10:8: Dut 9:4

10:11: Rom 9:33

10:12: Umen 10:34; 15:9

10:15: Neham 1:15; Efes 6:15

10:16: Sion 12:38

10:17: Sion 17:20