4
Selkatien keke Kristin keil um vituai en sakien ten envatien
Ahi mumon kami mimai mivi vangi meatin hau tas. Sakini, inau Pol koa namul en eim takeih veni namum min Asuv Iesu, namul nasel kat kami keih keke mihoumon sakien keil en moulien onami koa hevinvin en koakeil Ahi vise keil avahi onen. Efes 3:1; Plp 1:7,13; Flm 1:1,9; Kol 1:10 Lisenges, mihesakin rendemien onami heha netan ka sakien keil onami hememerau enges. Mihoumoni hetahos min kami eris hetal min envatien ka rendemien onami hetaveah. Kol 3:12-13 Ninin Votut mumon kami mimai mivi vangi meatin tas tuai. Sakini, mihesak visi en sise vasi keil keke kami miheto vituai en tomat. Kol 3:14-15 Anatin, ir koa rokur demkatien rovi aven tas ka Ninin Votut koa mul en tiner tas. Ka, ral min rendemien tetaveah, rokur desien tas keke vi anatin keke Ahi vise lat ir reheto vituai hetal mini en out nesa. Rom 12:5; Efes 2:16; 2:18 Ir romul romusil Asuv tas koa vi Kristo, romul romusil kat hihiseien tas, ka avi baptaes en ir keke rovapil vituai en demkatien tas. Sion 10:16; 1Kor 8:6 Ahi tas ka vi Tata ten tounah vasi. Kei vi hetetamen imok mulin tounah vasi, mul mum en moulien onen meatin keil, ka mul moul en tin meatin keil. 1Kor 12:6
Ka min tetai en ir, Kristo mul riti sanien savsav keil musil rendemien onen. Rom 12:3,6; 1Kor 12:11 Koanik suval selusien koa mul en Tus Votut koa vit,
“Navong kei vina nesa en out ten houhouen onen,
kei mulamun koakeil kei vae lin keil ka ling keil en hen.
Ka min meatin keil onen, kei san more sanien keil min keil.” (Sam 68:18) Kol 2:15
Navong selusien koanek viteni vit, “kei vina nesa en out ten houhouen onen” rie lati keke, mulamu, Kristo mul tuai en out netan. Sion 3:13 10 Ka kei koa mul en out netan, vi kei varei koa vina nesa ka ro en out ten houhouen koa mulin out sav vasi keil en out nesa keke kilea vahi hetetamen imok mulin tounah vasi keil. 11 Ka Kristo san “more sanien keil” min meatin keil onen keke tei keil imai ihi eiloheh keil, tei imai ihi provet keil ten avong kosa, tei ihitehiten more longlongien, ka tei keil ilosil kat revi vangi Kristin keil ka ihisein revi keil. 1Kor 12:28 12 Kristo san more sanien keil min meatin keil onen ekek keke vasak mesein Kristin vasi keil avoumon more umen vakataun mesav keil eni. En sise enek, Sios, koa vi aven Kristo, hemai hekeih tamun en demkatien. 2Tim 3:17; 1Pit 2:5 13 Sakini, koakeil ten Sios imai vituai keke ilea Natin Ahi koa aling demkatien one eni, imai imatu revi en demkatien one, ka imoul en usite vasi keil heha vio … imai imal vasi hesuval Kristo enges. Kol 1:28
14 Sakini, ronasuvaltei mun titiali keil en demkatien orer koa akalah avakur anatin en hihiseien sav vasi keil koa amul umai. Ronasuvaltei vot tai koa mules muloh kalkali navong eang sav keil umai ka amuh kati. Ronamaentei meatin keil taluvosien anamai analuvos ir natal min selusien keil one koa kas. 1Kor 14:20 15 Vuo, hermukteinek. Ir reheselus usil anatinien onen Ahi ka rehehitehiteni hetal min sakien ten envatien. Hesakini, rehemai rehematu revi en usite vasi keil ka rehemai rehesuval Kristo koa vi Avat ten Sios onen. Efes 1:22; 5:23; Kol 1:18; 2:19 16 Kei mul kapil vituain meatin keil onen suval koa hati aven keil amul akapil vituai ral min teisav en keil. Ka navong hati aven keil ekek amul amumon umen kati one, aven enek hemai hekeih ka hematu revi. Sakini, munak meatin keil ten Sios um vasin umen one hetal min sakien ten envatien, Sios hemai hekeih tamun ka hematu revi.
Pol sel kat Kristin keil keke ilokovein moulien matu one ka ikur moulien hau koa Ahi mul sani min keil
17 Veni kami mivi hati aven keil ten Sios onen Iesu Kristo, ek vati masel kat kami vatal min keihoen koa Asuv Iesu sani minau. Nasel kat kami keke minousiltei mun sakien keil onen koakeil areingeingen Ahi. Veni rendemien one koteh, ka amundem usil tounah keil koa avi heisav enges. Rom 1:21 18 Amul veah en mankoli ka asakras availea tounah keil onen Ahi. Keil amul soutin ran moulien hau koa Ahi mul sani veni vatie keih ka e rovattei availea sise onen. Efes 2:12; Kol 1:21; 1Pit 1:14 19 Navong keil amumon tisaen, armemoutei mun. Keil asan keil keke avousil sakien keil enges koa ave en vati, amul amumon sakien houlu koa tisa ramat, ka e vati mok avales avoum vatisa vamukonek. Kol 3:5
20 Ka koanik rovitei sakien keil koa mikuri navong avisein kami usil Iesu Kristo. 21 Anatin eli, avisein kami usil anatinien onen Iesu navong milong usili ka mikapil vituai ral mini. 22 Avisein kami keke mihelokovein moulien matu onami hetal min sakien tatisa keil teni, hesuval koa kami mikulat musi eisin keil ka misoni eva. Veni, en avong enek, kami miluvos kami eris mivit tounah keil koa avemi en vati tahos imok. Ka tounah keil enek amul avou lin moulien onami enges. Kol 3:9; Kal 6:8 23 Avisein kami keke mihemaen Ahi hehiles tinomi neim ka rendemien onami, ka hesakin kami mihemai mihehi heite hau. Rom 12:2 24 Ka avisein kami keke mihekur sakien keil tetahos ten moulien hau onami hesuval koa mimul mimusin en eisin hau tai koa tahos vis tahos imok. Sakini, mal imok keke sakien keil onami hetie lati keke moulien hau koa Ahi sani min kami vi votut ka mal imok, suval koa kei varei vi votut ka mal imok. Kol 3:10; Sen 1:26
Pol sel kat Kristin keil keke sakien keil one hetie lati keke akur moulien hau
25 Veni ir rokur moulien hau koa Ahi sani min ir, ronaluvostei mun. Hetahos keke tounah vasi keil koa romul roselus usili ral min tuer keil en demkatien hehi anatin. Rehoumoni hemukonek veni rovi hati aven keil ten Sios tas. Sak 8:16; Kol 3:8-9 26 Mal keke mihevuroh navong miles meatin tai mul mum tisa, ka mihelekat revi keke vurohien onami nasakintei kami minamot en tisaen. Ka mihekalah, mihetalimal eni helamu en avong koa meteiai hehita henu. Sam 4:4; Tiem 1:19-20 27 Hesakini, mihersantei ahho min Temat keke valamun kami mivousil sise onen ten tisaen. 28 Munak tai en kami vi tarhena, helokovein sakien enek ten henaien, ka heha houm hetal min hen keilu housil sakien tetahos tai. Hesakini, kei kilea vasan kataunien min koakeil tounah one tovuol. 1Tes 4:11 29 Minasontei selusien keil koa tisa, ka mihesa kesi min keil more selusien keil ten kataunien koa hetie lat more envatien onen Ahi. Hesakini, navong milesi mal keke mivoumoni, mihesan more selusien koa kilea vasakin koakeil alonge, rendemien one hemai hekeih tamun. Efes 5:4; Kol 3:8; 4:6 30 Minoumontei sakien keil koa noumon Ninin Votut nalonge natisa. Veni Ahi san Ninin onen min kami vatie lati keke kei ring koe kami ka vul lat kami tuai mivahi meatin keil onen ka, en avong tai koa hemai, hekulat kami ran out netan koa vilelau en mahien. Aes 63:10; 1Tes 5:19; Efes 1:13-14 31 Sakini, mihelokovein sakien tatisa keil ekek. Minandemtei natisa en kami eris, minavuroh kattei kami, ka minasontei selusien takeih naha kat kami. Minavaetei natal min kami, minaselus karentei kami, ka minoumontei tounah sav keil min kami natal min rendemien tatisa. Kol 3:8 32 Mal keke mihetahos min kami ka mihetie lat enmahisien min kami eris. Mihelele hetahos eris en kami hesuval koa Ahi lele tahos eris en kami ven tounah keil koa Kristo mumoni tuai. Kol 3:12-13; Mat 6:14; 18:22-35

4:1: Efes 3:1; Plp 1:7,13; Flm 1:1,9; Kol 1:10

4:2: Kol 3:12-13

4:3: Kol 3:14-15

4:4: Rom 12:5; Efes 2:16; 2:18

4:5: Sion 10:16; 1Kor 8:6

4:6: 1Kor 12:6

4:7: Rom 12:3,6; 1Kor 12:11

4:8: Kol 2:15

4:9: Sion 3:13

4:11: 1Kor 12:28

4:12: 2Tim 3:17; 1Pit 2:5

4:13: Kol 1:28

4:14: 1Kor 14:20

4:15: Efes 1:22; 5:23; Kol 1:18; 2:19

4:17: Rom 1:21

4:18: Efes 2:12; Kol 1:21; 1Pit 1:14

4:19: Kol 3:5

4:22: Kol 3:9; Kal 6:8

4:23: Rom 12:2

4:24: Kol 3:10; Sen 1:26

4:25: Sak 8:16; Kol 3:8-9

4:26: Sam 4:4; Tiem 1:19-20

4:28: 1Tes 4:11

4:29: Efes 5:4; Kol 3:8; 4:6

4:30: Aes 63:10; 1Tes 5:19; Efes 1:13-14

4:31: Kol 3:8

4:32: Kol 3:12-13; Mat 6:14; 18:22-35