15
TUHAN ikat janji deng Abram
15:1-21
Su lewat brapa waktu begini Abram dapat pengliatan.* 15:1 Pengliatan de jadi waktu orang dengar TUHAN bicara langsung tapi hanya de saja yang bisa liat ato dengar Allah pu pesan itu. Ini bisa waktu tidur tapi bisa juga waktu de masi bangun. Dalam pengliatan tu de dengar TUHAN bicara ke de begini,
“Abram, ko jang takut!
Sa yang jaga ko dari musu.
Nanti ko dapat bagian yang besar.”
Tapi Abram jawab begini, “TUHAN Allah, Tuhan mo kasi sa apa lagi? Sa ni trada anak. Baru nanti sa mninggal, yang dapat sa pu barang-barang smua juga Eliezer mo, sa pu orang kerja yang dari Damsik itu.”
Trus Abram de bilang lagi, “TUHAN tra kasi sa anak. Baru waktu sa mninggal, sa pu orang kerja ini, de yang nanti dapat sa pu barang-barang smua ini.”
Begini Abram dengar TUHAN bilang de lagi, “Bukan ko pu orang kerja yang nanti dapat ko pu harta smua, tapi ko pu anak laki-laki sendiri.” Trus TUHAN bawa Abram kluar baru bilang ke de begini, “Abram, ko liat ke langit! Skarang, kalo ko bisa, coba ko hitung bintang-bintang itu!” TUHAN tamba lagi, “Nanti ko pu anana cucu pu banyak sama macam begitu.” 15:5 Roma 4:18; Ibrani 11:12
Waktu itu, Abram de percaya yang TUHAN bilang. Itu jadi, TUHAN liat de tu orang yang benar karna de pu percaya ini. 15:6 Roma 4:3; Galatia 3:6; Yakobus 2:23
TUHAN bilang lagi ke Abram, “Sa ini TUHAN yang bawa ko kluar dari kota Ur di tana Babilonia, supaya Sa kasi tana Kanaan ni untuk jadi ko pu milik.”
Tapi Abram de tanya, “TUHAN Allah, bagemana sa tau kalo tana ini nanti jadi sa pu milik?”
TUHAN jawab dia, “Ko pi ambil untuk Sa, sapi betina satu, kambing betina satu, deng domba jantan satu. Dong masing-masing yang umur tiga taun. Trus ambil juga burung merpati puti deng merpati hitam yang masi muda satu-satu.”
10 Abram de ambil smua yang TUHAN suru de itu. De bla, bagi tenga binatang-binatang ni jadi dua bagian. Baru, de taru yang de su potong tu, baku sebla-sebla dalam satu baris. Tapi untuk yang burung de tra bla jadi dua. 11 Pas burung-burung yang biasa makan bangke ni datang hinggap di daging-daging yang Abram taru itu, tapi Abram usir.
12 Waktu pas matahari su mo masuk begini, Abram tatidur sono. Begini, glap yang tra baik punya, turun tutup dia sampe de rasa takut. 13 Baru TUHAN bilang ke Abram lagi begini,
“Abram, ko dengar baik-baik ini! Ko pu anana cucu nanti jadi orang pendatang di tana satu, tana yang bukan dong punya. Nanti dong jadi budak, trus dong tinggal dapa injak-injak trus di sana, sampe 400 taun. 14 Tapi bangsa yang bikin dong jadi budak ini nanti dapa hukum dari Saya. Habis itu, nanti dong kluar deng bawa banyak barang-barang. 15:14 Keluaran 12:40-41; Kisah para Rasul 7:6-7 15 Tapi untuk ko, ko nanti hidup sampe ko su masuk umur yang tua baru ko gabung deng ko pu moyang dong yang su duluan. Nanti ko mninggal deng tenang trus ko dapa kubur waktu ko pu rambut su puti. 16 Habis ko pu turunan keempat 15:16 Ko pu turunan keempat - De pu arti stela 400 taun. Dong hitung satu turunan 100 taun, jadi kalo su empat turunan, 400 taun. dong pu jaman su lewat, ko pu anana cucu yang di jaman itu, nanti dong kembali ke tana ini, trus ambil tana ini dari orang Amori. Karna, di waktu itu baru orang Amori dong pu jahat su cukup untuk dapa hukum, skarang masi blum.”
17 Pas matahari su masuk baru su glap, kaget begini blanga yang isi bara deng asap-asap tu muncul deng obor yang menyala besar skali. Blanga deng obor tu muncul, baru jalan dari tenga-tenga daging yang Abram su atur itu. 15:17 Pas matahari su masuk ... daging yang Abram su atur itu - Ini tanda dari TUHAN kalo yang De janji tu pasti De bikin itu jadi. 18 Waktu itu juga, TUHAN ikat janji deng Abram. TUHAN bilang,
“Sa janji, nanti Sa kasi tana ini smua untuk ko pu anana cucu dorang. Tana yang mulai dari sungai di sebla timur Mesir, yang pas di batas ujung tu, sampe di de pu ujung yang satu, di sungai besar Efrat ini. 19 Tana yang dari orang Keni, orang Kenas, orang Kadmon, 20 orang Het, orang Feris, orang Refaim, 21 orang Amori, orang Kanaan, orang Girgasi deng orang Yebus dorang.”

*15:1 15:1 Pengliatan de jadi waktu orang dengar TUHAN bicara langsung tapi hanya de saja yang bisa liat ato dengar Allah pu pesan itu. Ini bisa waktu tidur tapi bisa juga waktu de masi bangun.

15:5 15:5 Roma 4:18; Ibrani 11:12

15:6 15:6 Roma 4:3; Galatia 3:6; Yakobus 2:23

15:14 15:14 Keluaran 12:40-41; Kisah para Rasul 7:6-7

15:16 15:16 Ko pu turunan keempat - De pu arti stela 400 taun. Dong hitung satu turunan 100 taun, jadi kalo su empat turunan, 400 taun.

15:17 15:17 Pas matahari su masuk ... daging yang Abram su atur itu - Ini tanda dari TUHAN kalo yang De janji tu pasti De bikin itu jadi.