20
Abraham deng Abimelek
20:1-18
1 Abraham de kluar dari Mamre trus pinda ke tana Negeb. De tinggal pas di tenga daera Kades deng Syur. Habis itu, de tinggal di kota Gerar jadi pendatang di situ. 2 Waktu itu, Abraham de bilang ke orang-orang kalo de pu maitua Sara tu de pu sodara. Itu yang, raja Abimelek di kota Gerar ni de suru pi ambil Sara untuk jadi de pu maitua.
3 Tapi, satu malam begini, Allah datang ke Abimelek dalam mimpi trus bilang ke de begini, “Dengar! Sa nanti hukum mati ko karna prempuan yang ko ambil itu. Prempuan itu su pu paitua.”
4 Tapi karna Abimelek de blum tidur deng Sara, jadi raja Abimelek ni de bilang ke Allah begini, “Tuhan! Sa deng sa pu bangsa tra bikin sala apapa. Masa Tuhan mo hukum mati bangsa yang tra sala? 5 Dong dua sendiri yang bilang kalo dong dua tu sodara. Sa trada rencana jahat ke dorang, sa tra bikin sala.”
6 Allah bilang ke de lagi dalam mimpi,
“Iyo. Sa su tau itu. Sa tau kalo ko trada rencana jahat ke dorang. Itu yang, Sa ada cegat ko supaya tra tidur deng prempuan itu, supaya ko tra bikin sala ke Saya. 7 Jadi skarang, kas kembali orang itu pu maitua suda! De tu Sa pu nabi. Nanti de yang berdoa untuk ko supaya ko tetap hidup. Tapi kalo ko tra kas kembali prempuan itu, ko tau saja eh, ko deng ko pu orang-orang smua pasti mati.”
8 Besok begini, masi pagi-pagi ni, Abimelek panggil de pu orang-orang penting smua, trus de kastau smua yang su jadi itu. Waktu de pu orang-orang ni dong dengar, dong smua langsung jadi takut skali. 9 Habis itu, Abimelek de panggil Abraham. Baru de bilang begini ke Abraham, “Knapa ko bikin begitu ke kitong? Sa bikin sala apa sama ko? Knapa ko bikin sa deng sa pu orang-orang sampe bikin sala besar begini? Yang ko bikin ke sa ini, su tra betul skali.” 10 Abimelek de bilang ke Abraham lagi begini, “Apa yang ko pikir sampe ko bikin begini?”
11 Abraham jawab begini,
“Sa pikir tu orang-orang di sini trada yang kas tunjuk hormat ke Allah jadi pasti nanti sa dapa bunu gara-gara dong liat sa pu maitua ini. 12 Trus de ini memang sa pu sodara prempuan juga. Tong dua pu bapa sama, mama yang beda. Tapi skarang de su jadi sa pu maitua. 13 Dulu, waktu Allah suru sa kluar dari sa pu bapa pu ruma trus jalan ke tana-tana lain, sa su bilang sa pu maitua begini, ‘Kalo ko sayang sa, bikin begini: ke mana saja tong pigi, bilang ke orang-orang di tempat itu sa ini ko pu sodara.’ ”
14 Suda. Habis itu, Abimelek de ambil kambing domba deng sapi-sapi, sama budak laki-laki deng budak prempuan, trus de kasi itu smua ke Abraham. Trus Abraham pu maitua Sara juga de kas kembali ke Abraham. 15 Baru Abimelek bilang begini, “Ko bisa tinggal di mana saja ko mau. Sa pu tana ni bebas untuk trima ko.” 16 Trus Abimelek bilang begini ke Sara, “Ko liat! Sa kasi 1.000 potong perak*20:16 1.000 potong perak - Satu potong perak de pu berat tu 11.5 gram, jadi perak yang de kasih tu de pu berat smua tu 11.5 kilo. ke ko pu sodara laki-laki, untuk kas slesai masala ini trus kas tunjuk ke orang smua di sini kalo ko memang tra sala.”
17 Habis itu, Abraham de berdoa ke Allah, trus Allah kas sembu Abimelek deng de pu maitua sama de pu budak prempuan dong, supaya dong bisa pu anak lagi. 18 Karna waktu itu TUHAN bikin smua prempuan di Abimelek pu istana tu tra bisa hamil, gara-gara yang jadi ke Abraham pu maitua Sara itu.
*20:16 20:16 1.000 potong perak - Satu potong perak de pu berat tu 11.5 gram, jadi perak yang de kasih tu de pu berat smua tu 11.5 kilo.