1 Su brapa waktu lewat begini, Allah tes Abraham pu percaya. Allah bilang begini ke dia, “Abraham!”

Abraham jawab, “Ya, Tuhan.”

2 Allah bilang,

3 Jadi, besok begini pagi-pagi skali Abraham de su bangun. De bla kayu untuk bakar kas korban ke Allah, trus de ikat di de pu kledai. Baru de panggil de pu orang kerja dua deng de pu anak Isak. Trus, dong smua jalan ke tempat yang Allah su bilang sama dia. 4 Pas su tiga hari dong jalan, dari jau ni Abraham buang mata trus de dapa liat tempat yang Allah bilang de tu. 5 Abraham bilang ke de pu orang kerja dua tu, “Kam dua tinggal di sini deng kledai ni. Sa deng Isak mo pi ke sana, tong dua mo pi sembayang dulu. Habis sembayang baru nanti tong dua balik ke kam sini.”

6 Abraham de ambil kayu yang pake bakar kas korban ke Allah tu, baru de taru di de pu anak Isak pu bahu. Trus Abraham de bawa bara api deng pisou di tangan. Baru dong dua jalan sama-sama. 7 Pas dong ada jalan begini Isak bilang ke de pu bapa Abraham begini, “Bapa?”

Abraham jawab, “Bagemana anak?”

Isak tanya, “Sa liat, kitong su ada api deng kayu bakar tapi, mana domba pu anak yang nanti tong potong baru bakar kas korban ke Allah?”

8 Abraham bilang dia, “Anak, Allah sendiri yang nanti kasi anak domba yang nanti tong bakar kas korban untuk Allah Dia.” Trus dong dua lanjut jalan lagi sama-sama.

9 Waktu dong dua sampe di tempat yang Allah bilang ke Abraham tu, Abraham de susun batu untuk bikin tempat bakar korban di situ. De susun kayu di atas tempat itu, trus de ikat de pu anak Isak. Baru, de taru de pu anak Isak di atas kayu yang di tempat bakar korban itu. 10 Habis itu, Abraham ambil de pu pisou. Tapi pas de mo potong de pu anak begini, 11 TUHAN pu Malaikat† 22:11 TUHAN pu Malaikat ni TUHAN sendiri yang bicara, tapi TUHAN kas tunjuk De pu diri lewat malaikat. bicara dari surga deng suara besar ke dia, “Abraham! Abraham!”

Abraham jawab, “Ya, Tuhan.”

12 Trus TUHAN bilang begini lewat De pu Malaikat, “Jang ko bunu anak itu. Jang bikin apapa ke dia, karna skarang Sa su tau kalo ko memang hormat skali sama Sa sampe ko dengar yang Sa suru ko. Ko tra main-main untuk kasi ko pu anak yang cuma satu tu saja untuk Sa.”

13 Abraham de langsung buang mata, de liat ke blakang begini ada domba jantan satu yang de pu tanduk tasangkut di pohon-pohon kecil yang de pu batang talingkar. Jadi Abraham de ambil domba tu, trus de potong baru de bakar kas korban untuk Allah, ganti de pu anak Isak.✡ 22:1-13 Ibrani 11:17-19 14 Jadi Abraham kas nama tempat itu pake nama yang de pu arti ‘TUHAN yang kas siap apa yang tong perlu.’‡ 22:14 TUHAN yang kas siap apa yang tong perlu - Bahasa Ibrani: Yahweh Yireh. Dari situ yang orang biasa bilang begini, “Di atas TUHAN pu gunung, TUHAN su kas siap smua yang tong perlu.”

15 Trus TUHAN pu Malaikat bicara dari surga deng suara besar lagi ke Abraham, 16 De bilang begini,

19 Habis itu, Abraham deng Isak dong kembali ke dong pu orang kerja dua tu, trus dong smua pulang sama-sama ke Bersyeba. Abraham de tinggal trus di Bersyeba situ.

20 Habis dari gunung Moria tu, Abraham de dapa kabar kalo de pu sodara Nahor pu maitua Milka su pu anana laki-laki dlapan orang. Dong pu nama-nama tu: 21 Us yang tua, trus de pu ade Bus, baru Kemuel yang jadi moyang dari orang Aram. 22 Habis dong tiga, ada Kesed, Hazo, Pildas, Yidlaf, baru Betuel. 23 Betuel de pu anak prempuan nama Ribka.§ 22:23 Ribka de yang nanti jadi Isak pu maitua. Dlapan orang ini suda, yang lahir dari Milka, Nahor pu maitua. Nahor yang Abraham pu sodara. 24 Nahor de juga pu budak prempuan yang nama Reuma, yang de ambil jadi de pu maitua. Nahor pu anana yang lahir dari Reuma, dong pu nama tu, Tebah, Gaham, Tahas, deng Maaka.