23
Sara mati trus Abraham bli tana untuk bikin kuburan
23:1-20
1 Sara hidup sampe 127 taun, sampe situ suda de pu umur. 2 Waktu dong di Kanaan di kota Kiryat-Arba, yang orang knal deng nama Hebron, Sara de mninggal. Waktu itu, Abraham de sedi skali baru bongkar mnangis untuk Sara.
3 Habis waktu duka, Abraham bediri kas tinggal de pu maitua baru pigi ke orang Het pu tua-tua. Abraham bilang dong begini, 4 “Sa ini hanya pendatang saja yang singga di kam pu tana ini. Sa mo minta ijin untuk bli satu petak tana supaya sa bisa bikin kuburan untuk kubur sa pu maitua ini.”
5 Orang Het dong jawab Abraham begini, 6 “Begini, tuan ini orang yang pu kuasa besar, yang tinggal sama-sama deng kitong. Jadi, tuan pake suda, tong pu kuburan yang paling bagus untuk kubur tuan pu maitua, trada dari tong yang nanti tolak.”
7 Abraham de langsung bediri trus tunduk hormat sampe ke tana ke orang Het, dong yang pu tana disitu. 8 Trus Abraham bilang dong begini,
“Kalo kam trima untuk kubur sa pu maitua di sini, tolong dengar ini: tolong minta ke Zohar pu anak laki-laki yang nama Efron ka, 9 supaya de mo jual de pu goa Makpela yang ada di pinggir de pu kebun itu. Kam bilang de kasi tana itu ke saya, nanti sa bayar itu deng harga penu depan kam smua, supaya sa bisa ambil tana ni untuk bikin tong pu kuburan.”
10 Baru waktu itu pas orang Het yang nama Efron ni, de deng orang-orang Het lain ni, dong ada duduk bicara di pintu masuk kota situ. Jadi, Efron de kasi jawaban ke Abraham pas depan orang-orang Het deng smua orang yang ada di situ. De bilang begini, 11 “Begini saja tuan, depan orang-orang yang satu bangsa deng sa ini, sa kasi kebun itu lapis deng de pu goa. Tuan ambil suda, baru kubur tuan pu maitua.”
12 Trus Abraham de tunduk lagi hormat sampe ke tana ke orang-orang suku Het itu. 13 Baru Abraham bilang ke Efron depan orang-orang di situ, “Jang begitu! Sa minta, tolong ko dengar yang sa bilang ini. Sa mo bli kebun itu smua. Tolong kas biar sa bayar saja suda. Begitu baru sa bisa kubur sa pu maitua di sana.”
14 Trus Efron de jawab Abraham begini, 15 “Tuan eee! Tana spanggal tu de pu harga cuma 400 potong perak saja. Trada arti skali untuk tuan deng saya. Tuan ambil suda, baru kubur tuan pu maitua di situ.”
16 Abraham stuju deng harga yang Efron bilang. Trus de timbang perak untuk Efron supaya pas sperti yang Efron su bilang depan orang Het dorang, pas 400 potong perak ikut cara hitung yang penjual biasa pake.
17 Jadi suda, Efron pu kebun yang di Makpela, di bagian timur daera Mamre tu jadi Abraham pu milik. Tana, kebun deng goa, lapis deng pohon-pohon sampe yang di ujung-ujung kebun smua tu, 18 Efron kasi ke Abraham jadi tana yang su dapa jual ke Abraham depan orang Het dorang, depan smua orang yang ada datang di pintu masuk kota itu. 19 Habis itu, Abraham pi kubur de pu maitua Sara di dalam goa yang di kebun Makpela itu. Ini di Kanaan, di bagian timur daera Mamre, yang skarang orang tau deng nama Hebron. 20 Jadi begitu suda, kebun deng goa yang orang Het punya itu, skarang jadi Abraham pu milik yang de bikin jadi tempat kuburan.