33
Yakub kembali baku baik deng Esau
33:1-20
1 Waktu Yakub buang mata begini de liat Esau deng de pu anana bua 400 orang, dong ada jalan mnuju ke Yakub dorang. Jadi, Yakub de bagi de pu anana masing-masing deng dong pu mama-mama. Jadi ada empat rombongan: Lea, Rahel, trus budak prempuan dua. 2 Yakub de taru budak prempuan dua tu deng dong pu anana di bagian depan. Trus habis itu, Lea deng de pu anana di blakang, baru Rahel deng Yusup yang paling blakang skali. 3 Yakub de sendiri jalan paling depan skali dari dong smua. De jalan, trus de tunduk hormat sampe ke tana ke Esau. De bikin begitu tuju kali sampe ke dekat de pu kaka itu. 4 Tapi, Esau ni de lari pi ke Yakub, de peluk trus de sayang Yakub, baru dong dua bongkar mnangis. 5 Waktu Esau de buang mata begini, de liat ada prempuan-prempuan deng anana, jadi de tanya, “Orang-orang yang ada ikut deng ko itu sapa?”
Yakub jawab ke Esau begini, “Itu anana yang sa dapat karna Allah su kas tunjuk De pu baik ke sa, yang jadi kaka pu pesuru ini.”
6 Habis itu, budak prempuan dua tu deng dong pu anana datang ke dekat dorang. Trus dong tunduk kasi hormat ke Esau sampe ke tana. 7 Begini, Lea deng de pu anana juga tiba. Dong datang dekat trus tunduk kasi hormat lagi. Yang trakir, Yusup deng Rahel dong datang dekat trus dong tunduk kasi hormat.
8 Esau de lanjut bicara, “Ade, tadi sa ketemu rombongan-rombongan deng binatang-binatang yang ko kirim itu. Ko bikin begitu untuk?”
Yakub jawab, “Itu untuk kaka Esau. Supaya kaka bisa kas tunjuk kaka pu baik ke saya.”
9 Tapi Esau de jawab, “Adeee, sa pu juga banyak. Jadi, ko punya tu, simpan untuk ko saja.”
10 Tapi Yakub jawab,
“Ah kaka, jang begitu. Kalo memang kaka sayang sa, kaka trima hadia-hadia yang sa kasi ni suda. Karna bisa baku hadap muka deng kaka langsung begini saja, sa su rasa macam liat Allah pu muka begitu. Sampe kaka su mo datang sambut sa lagi. 11 Jadi, kaka trima suda, sa pu tanda salam yang sa su bawa ini. Allah su kas tunjuk De pu baik ke sa sampe sa punya smua-smua ini.”
Yakub de tinggal paksa trus sampe Esau de mo trima.
12 Trus Esau bilang sama dia, “Yo suda! Mari tong jalan lanjut! Nanti sa jalan sama-sama deng kam.”
13 Tapi Yakub de alasan ke Esau begini,
“Kaka Esau, macam yang kaka su tau: Anana ni, dong masi tra kuat jalan jau. Trus ada kambing domba sama sapi yang masi kas susu dong pu anana. Jadi, kalo dong harus jalan cepat-cepat dalam satu hari ini saja, binatang-binatang piara ni dong smua bisa mati nanti. 14 Jadi, biar kaka jalan duluan suda. Sa yang jadi kaka pu pesuru ni, nanti jalan plan-plan ikut binatang piara yang jalan depan kitong ini. Sa ikut anana ini dong pu tempo jalan, sampe nanti tong ketemu kaka dong di tana Seir.”
15 Trus Esau de bilang, “Kalo begitu, biar sa kas tinggal sa pu anana bua brapa untuk jaga kam suda.”
Yakub balas bilang, “Ah, tra usa kaka! Kaka su kas tunjuk kaka pu baik ke sa saja, su cukup.”
16 Jadi suda, Esau dong langsung jalan pulang ke tana Seir hari itu juga.*33:16 Seir ni ada di bagian timur tenggara dari Kanaan. 17 Tapi Yakub dong tra ke tana Seir, dong pigi ke daera Sukot trus bikin tempat tinggal di situ. Baru de bikin tempat lindung di situ untuk de pu binatang-binatang piara. Dari situ yang, dong kas nama tempat itu Sukot.†33:17 Sukot - De pu arti ‘tempat lindung.’ Tempat ini ada di sebla timur dari tana Kanaan.
18 Yakub dong jalan dari Padan-Aram tu, trus dong sampe di kota Sikem di tana Kanaan deng tra kurang apapa. De bikin tenda di bagian timur kota itu trus dong tinggal di situ. 19 Tempat yang de bikin de pu tenda tu, de bli deng harga 100 uang perak dari Hemor pu anana dorang. Hemor tu Sikem pu bapa. 20 Trus Yakub de bikin tempat bakar korban untuk Allah di situ. De kas nama tempat itu deng nama El Elohe Israel yang de pu arti ‘Israel pu Allah tu Allah.’