1 Satu hari, Allah bilang ke Yakub begini, “Siap-siap skarang! Pigi ke Betel trus tinggal di sana. Ko bikin tempat bakar korban untuk Sa, Allah yang dulu kas tunjuk diri ke ko waktu ko lari dari ko pu kaka Esau.”

2 Jadi, Yakub bilang ke de pu orang-orang satu ruma deng orang-orang yang su jalan sama-sama deng dia,

4 Dong smua kasi dong pu allah, patung-patung yang dong semba ni ke Yakub, trus dong pu anting-anting yang ada di tlinga juga dong kasi. Baru Yakub kubur itu smua di bawa pohon besar yang ada di Sikem situ. 5 Habis itu, dong siap-siap brangkat. Waktu dong jalan, Allah bikin orang-orang di kota-kota tempat dong lewat tu, rasa takut skali deng dorang. Jadi, trada orang yang brani srang Yakub dorang.

6 Brapa hari begini Yakub deng smua orang yang sama-sama deng dia sampe di tempat yang nama Lus yang orang knal deng nama Betel. Tempat ini ada di Kanaan juga. 7 Di tempat itu, Yakub de bangun tempat bakar korban untuk Allah. Trus de kas nama tempat itu El Betel*35:7 El Betel - De pu arti ‘Allah dari tempat yang nama Betel ini.’ karna dulu waktu de lari dari de pu kaka, Allah kas tunjuk Diri ke dia di tempat itu. 8 Di situ yang, Debora, orang yang dulu biasa jaga-jaga Ribka†35:8 Ribka ini Isak pu maitua ni, Yakub pu mama. ni de mninggal trus dapa kubur di sebla slatan kota Betel itu, di bawa pohon besar yang di situ. Dari sini yang, pohon itu dapat nama Pohon Mnangis.

9 Jadi waktu Yakub masi tinggal di Betel, yang habis de su pulang dari Padan-Aram tu, Allah kas tunjuk De pu Diri lagi ke Yakub trus kasi de berkat. 10 Allah bilang de begini, “Nama Yakub ini, skarang su bukan ko pu nama lagi, tapi Israel. Jadi ko pu nama skarang tu Israel.” Jadi Allah kas nama de Israel.✡35:10 Kejadian 32:28 11 Trus Allah bilang de begini lagi,

13 Habis itu, Allah naik pi kas tinggal Yakub di tempat yang tadi De ada bicara ke Yakub itu. 14 Trus Yakub de bikin tanda pake batu besar di tempat itu, tanda untuk kas ingat kalo Allah perna bicara deng de di situ. Baru de kasi persembahan air anggur ke Allah, de siram air anggur itu trus de siram minyak ke bagian atas batu itu, untuk kastau kalo batu itu de kas kusus untuk Allah. 15 Yakub kas nama tempat yang Allah ada bicara deng de tu Betel.§35:15 Betel - De pu arti ‘Allah pu ruma.’

16 Habis itu, Yakub dong kas tinggal Betel. Waktu dong su mo dekat-dekat Efrata, Rahel de rasa de pu anak su mo lahir, de rasa sakit yang tra sperti biasa. 17 Waktu de pu rasa sakit tu, su mulai tamba para, bidan yang bantu de untuk lahir tu bilang begini, “Ko jang takut! Ko pu anak ni laki-laki lagi.” 18 Waktu Rahel pu napas-napas trakir, seblum de pu napas putus, de kas nama anak itu Ben-oni.*35:18 Ben-oni - Nama ini pu arti ‘anak yang lahir deng stenga mati.’ Tapi anak itu pu bapa Yakub kas nama de Benyamin.†35:18 Benyamin - Nama ini pu arti ‘anak yang sa paling sayang’ ato ‘anak yang dari sa pu kuat.’ 19 Jadi begitu suda, Rahel de mninggal trus dong kubur de di pinggir jalan yang mo ke Efrata, skarang tempat ini nama Betlehem. 20 Yakub bikin tanda dari batu di atas de pu kuburan. Batu itu yang masi jadi tanda kalo Rahel ada dapa kubur di situ.

21 Habis itu, Israel dong lanjut jalan, trus dong bikin tenda di sebla tempat yang nama Migdal-Eder. 22a Waktu Israel dong tinggal di tempat ini yang, Ruben de sampe tidur deng Bilha, budak yang de pu bapa su ambil jadi maitua. Trus Israel de dengar apa yang de pu anak tua ni bikin.‡35:22a Trus Israel de dengar apa yang de pu anak tua ni bikin - Nanti di Kejadian 49:3-4 Yakub hukum de pu anak yang tua ini.

22b Yakub pu anana laki-laki smua ada dua blas orang.

23 Lea pu anana tu Ruben, de ini Yakub pu anak yang tua. Habis de ada Simeon, Lewi, Yehuda, Isakar deng Zebulon.

24 Rahel pu anana tu Yusup deng Benyamin.

25 Kalo Bilha, Rahel pu budak prempuan, de pu anana tu Dan sama Naftali.

26 Trus kalo Zilpa, Lea pu budak prempuan, de pu anana tu Gad sama Asyer.

27 Trakir tu, Yakub ketemu deng de pu bapa Isak pas de sampe di daera Mamre, tempat yang dekat Kiryat-Arba, yang orang kenal deng nama Hebron. Itu tempat yang Isak deng Abraham tinggal jadi pendatang dulu. 28-29 Isak de mninggal, de gabung deng de pu orang-orang tua dorang. De pu umur su 180 taun, waktu de mninggal de su tua skali. De pu anak Esau deng anak Yakub yang kubur dia.