1 Ini Esau yang orang kenal deng nama Edom de pu daftar anana cucu.

2 Esau de ambil prempuan Kanaan untuk jadi de pu maitua. De kawin deng Adah, bapa Elon yang orang Het ni pu anak prempuan. De juga kawin deng Oholibama. Oholibama ni bapa Anah pu anak prempuan, bapa Zibeon yang orang Hewi tu pu cucu prempuan. 3 Trus Esau de kawin deng Basmat juga, ini Ismael pu anak prempuan, Nebayot pu ade prempuan.

4 Ini Esau pu anana: Adah pu anak tu Elifas. Basmat pu anak tu Rehuel. 5 Trus Oholibama pu anana tu Yeus, Yaelam deng Korah. Ini suda, Esau pu anana yang lahir di tana Kanaan.

6 Esau de pisa deng de pu ade Yakub di Kanaan situ baru de brangkat ke daera lain. Esau de bawa de pu maitua-maitua, de pu anana smua, mo laki-laki ka prempuan ka, lapis deng de pu orang-orang smua. Trus de bawa binatang-binatang piara deng de pu harta smua yang de dapat di tana Kanaan. 7 Karna tana tempat dong dua tinggal ni, su tra sanggup tampung dong dua lagi, dong pu binatang-binatang piara su terlalu banyak jadi. 8 Itu yang, Esau yang orang knal deng nama Edom juga ni, de pi tinggal di daera gunung-gunung Seir.

9 Ini Esau, moyang orang Edom, pu daftar anana cucu, orang-orang yang tinggal di daera gunung-gunung Seir.

10 Esau pu anana tu: Elifas, yang dari maitua Adah, deng Rehuel, yang dari maitua Basmat.

11-12 Esau deng Adah pu cucu-cucu dari dong pu anak Elifas tu: Teman, Omar, Zefo, Gaetam deng Kenas. Elifas de juga ambil budak prempuan jadi de pu maitua, de pu nama Timna. Elifas deng Timna pu anak yang nama Amalek.

13 Esau deng Basmat pu cucu-cucu yang dari dong pu anak Rehuel tu: Nahat, Zerah, Syama deng Miza.

14 Esau pu maitua Oholibama ni, de juga lahir anak untuk Esau. Dong pu anana tu Yeus, Yaelam, deng Korah. Oholibama tu Anah pu anak prempuan trus Anah tu orang Hewi yang nama Zibeon pu anak laki-laki.

15 Ini daftar kepala-kepala suku dari Esau pu orang-orang yang lahir dari de pu anak yang tua, Elifas ini: Teman, Omar, Zefo, Kenas, 16 Korah, Gaetam, deng Amalek. Dong ini yang jadi moyang dari dong pu suku masing-masing. Itu smua Esau deng Adah pu anak Elifas pu anana yang lahir di tana Edom.

17 Ini daftar kepala-kepala suku dari Esau pu anak Rehuel: Nahat, Zerah, Syama, deng Miza. Dong ini yang jadi moyang dari dong pu suku masing-masing. Itu smua Esau deng Basmat pu anak Rehuel pu anana yang lahir di tana Edom.

18 Ini daftar kepala-kepala suku dari Esau deng Oholibama pu anana: Yeus, Yaelam, deng Korah. Dong ini yang jadi moyang dari dong pu suku masing-masing. Itu smua Esau pu anana yang lahir dari de pu maitua Oholibama, bapa Anah pu anak prempuan itu.

19 Jadi, dong ini smua anana cucu yang lahir dari Esau yang orang kenal deng nama Edom. Dong ini yang jadi moyang dari dong pu suku masing-masing.

20 Orang asli yang tinggal di tana Edom tu orang Hori. Dong pu moyang nama Seir*36:20 Seir - Ini nama orang. Tapi nanti jadi nama tempat yang dong tinggal itu, tempat yang nanti Esau deng de pu bangsa dong tinggal. yang de pu anana tu: Lotan, Syobal, Zibeon, Anah, 21 Disyon, Ezer, deng Disyan. Seir pu anana ini suda yang jadi moyang dari suku-suku orang Hori di tana Edom.

22 Lotan pu anana tu Hori deng Heman. Lotan pu sodara prempuan yang nama Timna.

23 Syobal pu anana tu Alwan, Manahat, Ebal, Syefo, deng Onam.

24 Zibeon pu anana tu Aya deng Anah. Anah ni, de yang ketemu mata air panas di tempat sepi yang kring itu. De ketemu tu waktu de ada jaga liat de pu bapa Zibeon pu kledai-kledai.

25 Anah pu anana tu Disyon deng anak prempuan satu yang nama Oholibama.

26 Disyon pu anana tu Hemdan, Esban, Yitran, deng Keran.

27 Ezer pu anana tu Bilhan, Zaawan, deng Akan.

28 Disyan pu anana tu Us deng Aran.

29 Dong ini suda yang jadi moyang dari bangsa orang Hori dorang. Moyang orang Lotan, moyang orang Syobal, moyang orang Zibeon, moyang orang Anah, 30 moyang orang Disyon, moyang orang Ezer, deng moyang orang Disyan. Smua ini moyang-moyang dari suku orang Hori di tana Seir.

31 Waktu Israel blum ada raja, Edom dong su ada raja-raja yang pimpin dorang.

32 Raja-raja yang pimpin di Edom tu: Yang pertama tu raja Bela. De yang printa dari de pu kota Dinhaba. De pu bapa nama Beor.

33 Waktu Bela mninggal, Yobab ganti jadi raja. Yobab pu bapa nama Zera, dong ni dari kota Bozra.

34 Waktu Yobab mninggal, Husyam ganti jadi raja. Husyam ini dari daera Teman.

35 Waktu Husyam mninggal, Hadad ganti jadi raja. Hadad pu bapa nama Bedad. Hadad ini yang kas kala orang Midian di daera Moab. Raja Hadad de yang printa dari de pu kota Awit.

36 Waktu Hadad mninggal, Samla ganti jadi raja. Samla ni de dari Masreka.

37 Waktu Samla mninggal, Saul ganti jadi raja. Saul de asal dari Rehobot, kota yang di pinggir kali.

38 Waktu Saul mninggal, Baal-Hanan ganti jadi raja. Baal-Hanan pu bapa nama Akbor.

39 Waktu Akbor pu anak Baal-Hanan ni de mninggal, Hadar ganti jadi raja. Raja Hadar de yang printa dari de pu kota Pahu. De pu maitua nama Mahetabeel. Mahetabeel itu mama Matred pu anak prempuan, nene Mezahab pu cucu prempuan.

40 Ini Esau pu anana cucu pu nama-nama. Dong pu nama ini yang pake jadi dong pu nama kluarga deng nama kampung. Dong itu: Timna, Alwa, Yetet, 41 Oholibama, Ela, Pinon, 42 Kenas, Teman, Mibzar, 43 Magdiel, deng Iram. Dong pu nama-nama ini suda, yang pake jadi nama-nama kluarga di bangsa Edom, yang dong pake kas nama tana tempat dong tinggal juga. Jadi begitu, Edom itu Esau suda, de yang jadi moyang orang Edom dorang.