44
Yusup tes-tes de pu sodara dorang
44:1-17
1 Habis Yusup makan deng de pu sodara-sodara, de suru orang yang urus de pu ruma tu begini,
“Ko isi gandum ke orang-orang ini pu karung. Takar banyak-banyak yang dong bisa bawa pulang. Trus taru dong pu uang di atas gandum di ujung karung. 2 Taru sa pu cangkir perak tu dalam dong pu ade bungsu pu karung, sama-sama deng de pu uang yang de pake bayar.”
Jadi, Yusup pu orang kerja ni de bikin sperti yang Yusup de suru.
3 Pas besok begini, subu-subu ni, Yusup pu sodara-sodara dong dapa kas ijin untuk pulang. Dong pulang deng dong pu kledai. 4 Pas dong baru kluar dari kota ni, blum jau juga tapi, Yusup bilang de pu orang yang urus ruma,
“Siap-siap! Pi kejar orang-orang yang tadi tu. Kalo ko su dapat dorang, bilang dong begini, ‘Knapa kam balas tong pu baik deng bikin jahat begini? 5 Knapa kam curi bapa wakil raja pu cangkir perak itu? Itu cangkir yang de biasa pake minum trus de juga pake liat-liat apa yang nanti mo jadi! Kam su bikin sala besar skali.’ ”
6 Waktu Yusup pu orang kerja ni baku dapat deng Yusup pu sodara-sodara dorang, de bilang dong sama sperti yang Yusup kastau de tadi. 7 Yusup pu sodara-sodara dong langsung bilang,
“Bapa, knapa bapa bilang begitu? Tong tra mungkin skali bikin begitu, bapa. 8 Dulu saja, uang yang tong dapat dalam tong pu karung tu, tong bawa balik lagi ke sini dari Kanaan sana. Jadi, tra mungkin skali tong mo ambil perak ka emas ka dari bapa wakil pu ruma! 9 Begini saja suda, kalo bapa dapat cangkir tu di sapa saja dari tong ini pu karung, biar de dapa hukum mati saja, trus tong ini nanti jadi bapa pu budak.”
10 Jadi Yusup pu orang kerja ni de jawab, “Iyo, apa yang kam bilang itu bagus juga, tapi hanya orang yang pegang cangkir saja yang nanti jadi sa pu budak. Kam yang lain su bebas, trada sala.”
11 Jadi dong cepat-cepat kas turun dong pu karung smua ke tana baru buka dong pu karung-karung. 12 Trus Yusup pu orang kerja ni de mulai priksa baik-baik dong pu karung satu-satu. De mulai pertama dari anak yang paling tua sampe ke anak yang paling bungsu. Trus begini, de dapat cangkir tu dalam Benyamin pu karung. 13 Begitu tu, Benyamin pu kaka-kaka hati su paling susa skali, sampe dong robek dong pu baju. Suda, dong langsung kas naik dong pu karung tu ke kledai, baru dong kembali ke kota.
14 Waktu Yehuda deng de pu sodara-sodara dong su sampe di Yusup pu ruma, Yusup masi ada di de pu ruma. Jadi dong datang langsung tunduk hormat Yusup sampe ke tana lagi. 15 Yusup langsung bilang dorang, “Barang apa yang kam bikin ini? Kam tra tau ka kalo orang sperti sa ini bisa tau apa yang kam bikin deng ilmu-ilmu?”
16 Yehuda de jawab, “Bapa, tong tra tau mo bilang apa sama bapa. Tong juga tra tau mo bikin benar diri deng apa? Allah su kas tunjuk tong ni sala. Jadi suda! Tong ini bapa pu budak suda, kitong sama-sama deng orang yang pegang cangkir tu juga.”
17 Yusup bilang, “Sa trakan bikin begitu! Kam yang lain bisa pulang baik-baik ke kam pu bapa. Tapi orang yang bawa sa pu cangkir itu, de saja yang tetap di sini jadi sa pu budak.”
Yehuda bicara deng Yusup untuk kas slamat Benyamin
44:18-34
18 Jadi Yehuda de pigi ke dekat Yusup baru bicara,
“Bapa, sa permisi bicara dulu, sa minta ijin mo bilang barang satu sama bapa tapi sa minta bapa jang mara. Karna bapa ni su macam raja Mesir. 19 Bapa wakil raja perna tanya kitong, ‘Kam masi punya bapa deng sodara lain lagi ka?’
20 Trus tong jawab, ‘Tong masi ada bapa yang su tua sama ade yang masi muda yang lahir pas waktu bapa su tua, de pu kaka su mninggal jadi tinggal de sendiri yang masi hidup dari dong dua yang satu mama. Itu yang, tong pu bapa paling sayang de skali.’
21 Trus bapa wakil raja bilang, ‘Bawa de ke sini, supaya sa bisa liat dia.’
22 Trus tong jawab, ‘Anak itu tra bisa kas tinggal tong pu bapa, karna kalo de kas tinggal bapa, nanti bapa de bisa mninggal gara-gara de pu hati rasa susa skali.’
23 Trus bapa wakil raja bilang, ‘Kam tra bole datang liat sa lagi kalo kam tra bawa kam pu ade itu.’
24 Jadi waktu tong kembali ke tong pu bapa dulu, tong kastau yang bapa wakil raja bilang sama kitong itu. 25 Trus pas tong pu bapa bilang tong kembali bli makan lagi, 26 tong jawab, ‘Tong tra bisa pigi ke sana lagi kalo tra bawa tong pu ade bungsu sama-sama deng kitong. Tong cuma bisa ketemu bapa wakil ni kalo sama-sama deng ade Benyamin ni bole.’
27 Trus tong pu bapa jawab, ‘Kam tau kalo sa pu maitua Rahel cuma lahir anak dua itu saja untuk sa to? 28 Yang pertama su pigi dari saya, pasti binatang liar su bunu dia jadi skarang ni sa su tra perna liat de lagi. 29 Kalo kam ambil anak ini juga dari saya, trus de kena apapa lagi, kam cuma bikin sa pu hati rasa susa skali, sampe sa yang su tua ini mninggal nanti.’ ”
30-31 Yehuda de lanjut bicara,
“Jadi, bapa wakil, kalo sa kembali ke sa pu bapa tra sama-sama deng tong pu ade bungsu ini, tong pu bapa pasti hati susa skali. De hidup tu cuma untuk anak ini saja. Tong pu bapa ni juga su tua skali, jadi kalo tong bikin de pu hati susa lagi, de pasti bisa mninggal. 32 Tapi sa su bilang sa pu bapa kalo nanti sa yang tanggung sa pu ade Benyamin ini. Sa su bilang sa pu bapa begini, ‘Bapa bisa bilang sa yang tanggung jawab kalo nanti sa tra bawa de pulang. Sampe sa mninggal, nanti sa yang tanggung itu.’
33 Jadi bapa wakil raja, biar sa yang tinggal di sini ganti sa pu ade suda. Sa yang jadi bapa pu budak saja suda. Bapa bisa kas biar de pulang saja sama-sama deng sa pu sodara-sodara yang lain ka. 34 Sa tra mungkin bisa pulang ke sa pu bapa, kalo de pu anak satu ini tra kembali! Sa tra sampe hati mo liat apa yang nanti jadi deng tong pu bapa.”