49
Yakub pu kata-kata berkat trakir untuk de pu anana smua
49:1-28
1 Habis itu, Yakub de panggil de pu anana smua baru de bilang dorang begini, “Kam smua, mari dekat sa sini! Sa mo kastau kam apa yang nanti jadi ke kam di hari-hari yang mo datang ni.
2 Anana, kam kumpul smua!
Pasang kam pu tlinga, mari dengar bapa mo bicara!
3 Ruben, ko ni sa pu anak yang tua.
Ko ni bukti pertama kalo sa ni dulu kuat.
Ko ni anak yang paling dapa hormat.
4 Tapi ko macam air,
ko tra bisa tahan diri sampe ko tidur deng budak prempuan,
yang su jadi sa pu maitua.
Ko su hina sa skali,
jadi ko su bukan yang paling dapa hormat lagi.
5 Simeon deng Lewi, dong dua ni yang biasa satu otak
untuk bikin jahat ke orang-orang.
6 Sa pu jiwa trakan perna ikut gabung deng dong dua pu urusan.
Sa pu roh juga trakan gabung deng dong pu kumpul-kumpul tu.
Habis dong dua bunu orang kalo dong emosi.
Baru cuma untuk bikin dong pu hati snang saja,
dong kas putus banteng pu urat kaki sampe de tra bisa jalan lagi.
7 Tuhan yang nanti hukum dong dua,
karna dong pu mara tu kasar skali,
dong kalo ganas tu jahat skali.
Jadi dong pu anana cucu nanti hidup tapisa-pisa,
dong trakan tinggal sama-sama satu suku.
Dong nanti tasebar di Israel pu suku-suku yang lain.
8 Yehuda, ko pu sodara-sodara nanti puji ko,
karna ko langsung injak-injak orang-orang yang brani lawan ko.
Ko pu sodara dong nanti tunduk kasi hormat sama ko.
9 Yehuda tu macam singa muda,
yang habis bunu de pu musu,
baru de kembali ke de pu ruma,
kas lurus-lurus badan baru tidur.
Trada yang brani ganggu dia.
10 Kuasa untuk pimpin bangsa-bangsa,
trakan perna lepas dari Yehuda.
De pu tanda kuasa tu, trakan perna hilang dari dia.
Sampe nanti orang yang pu hak*49:10 orang yang pu hak - Orang ini yang memang harus pegang kuasa untuk pimpin bangsa-bangsa smua.
untuk pimpin bangsa-bangsa tu, de datang.
Itu baru, bangsa-bangsa nanti tunduk
kas tunjuk dong pu hormat sama orang itu.✡49:9-10 Wahyu 5:5
11 Yehuda de nanti pu anggur yang banyak skali,
kalo mo ikat de pu kledai betina
di tanaman anggur yang paling bagus juga trapapa.
Kalo mo cuci pakean pake anggur juga bisa,
air anggur asli yang blum campur apapa ni.
12 De pu mata nanti mera-mera gara-gara minum anggur,
de pu gigi juga puti, gara-gara minum susu.
13 Zebulon de nanti tinggal di pinggir laut,
de pu tempat tu, kapal-kapal biasa singga di situ,
de pu batas tana tu baku sebla deng tana Sidon.
14 Isakar tu macam kledai yang kuat.
Kledai yang baring-baring deng sak-sak penu yang de masi pikul di sebla-sebla dia.
15 Kalo de liat tempat yang enak untuk istirahat,
trus de pu tana juga bagus skali,
baru de nanti mo kas tunduk de pu badan.
De trima saja biar de dapa paksa kerja deng tra dapa bayar.
16 Dan, biar de pu suku kecil tapi, nanti de pimpin de pu suku sendiri.
Macam Israel pu suku-suku lain yang pimpin de pu suku sendiri,
de juga nanti begitu.
17 Dan, de nanti macam ular yang di jalan-jalan.
Ular bisa di pinggir-pinggir jalan potong,
yang patok kuda pu tumit,
sampe orang yang naik kuda tu talempar ke blakang.”
18 Baru Yakub de sembayang, de bilang begini, “TUHAN! TUHAN pu waktu untuk kas slamat orang-orang tu, itu yang sa paling tunggu skali.”
19 Trus Yakub lanjut bicara ke de pu anana lagi,
“Gad, nanti de dapa srang dari rombongan orang jahat.
Tapi, de balik srang orang-orang itu lagi.
20 Asyer, de pu tana nanti kas kluar hasil makanan yang enak-enak.
De pu makanan tu, makanan yang raja dong biasa makan.
21 Naftali, de sperti rusa hutan betina yang de lari bebas,
de pu anana tu nanti bagus-bagus skali.
22 Yusup tu macam tanaman anggur yang de pu bua banyak skali,
tanaman anggur yang pas dekat mata air,
yang de pu ranting-ranting tumbu sampe lewat de pu pagar-pagar.
23 Gara-gara tra suka skali sama dia, orang dong pana dia.
Dong srang dia, gara-gara tra snang de skali.
24 Tapi de pu tangan tetap kuat,
pana yang de pegang juga tra goyang-goyang.
Itu karna de dapat kuat
dari sa†49:24 sa - Bahasa Ibrani: Yakub. pu Allah yang paling kuat skali,
trus yang jaga de tu,
sa‡49:24 sa - Bahasa Ibrani: Israel. pu Allah yang kuat macam gunung batu.
25 Sa pu Allah, De pasti tolong kam.
Itu karna, De tu Allah Yang Pu Kuasa Paling Besar.§49:25 Allah Yang Pu Kuasa Paling Besar - Bahasa Ibrani: Shaddai.
De yang kasi berkat yang banyak
macam hujan dari langit tamba deng air dari tana lagi untuk kam.
Tamba deng berkat anana deng binatang-binatang yang banyak untuk kam.
26 Berkat-berkat yang ko pu bapa trima dari orang-orang tua dulu tu,
de lebi besar dari berkat yang datang
dari gunung-gunung yang tra perna hilang itu.
Sa minta berkat ni turun juga ke Yusup pu kepala.*49:26 Yusup pu kepala - Ini de pu arti tu Allah langsung kasi berkat tu ke Yusup saja.
Ke atas orang yang paling spesial
dari pada de pu sodara-sodara lain, ke de pu testa.
27 Benyamin, de macam anjing hutan yang paling jahat skali.
Pagi-pagi de bunu de pu musu,
pas sampe malam de bagi-bagi de pu musu dong pu barang-barang.”
28 Itu suda, Israel pu dua blas suku smua, trus kata-kata ini yang dong pu bapa de bilang dorang, untuk kasi berkat ke dorang seblum de mninggal. Berkat yang Yakub bilang dong tu memang pas deng dong masing-masing suda.
Yakub mninggal trus dong kubur dia
49:29-33
29 Habis itu, Yakub pesan sama de pu anana,
“Sebentar lagi sa su mo tutup mata gabung deng sa pu orang-orang tua dorang. Kam kubur sa di dekat sa pu bapa deng tete dorang, dalam goa yang dulu orang Het nama Efron tu, de punya. 30 Nanti kam kubur sa di goa dalam kebun di Makpela di bagian timur daera Mamre†49:30 daera Mamre - Daera ini de ada di sebla utara Hebron, di tana Kanaan. Jarak dari daera Mamre ke Hebron tu dua stenga kilometer. di tana Kanaan, tempat yang Abraham su bli dari orang Het yang nama Efron tu, untuk jadi tong pu kuburan nanti. 31 Di situ tete Abraham, nene Sara, deng bapa Isak sama mama Ribka dong dapa kubur. Di situ juga sa kubur sa pu istri Lea. 32 Tana deng goa tu, sa pu tete Abraham su bli dari orang Het, jadi kam kubur sa di situ nanti.”
33 Waktu Yakub slesai kastau itu ke de pu anana, de kembali tidur. Dari situ, Yakub de langsung mninggal, de gabung deng de pu orang-orang tua dorang.
*49:10 49:10 orang yang pu hak - Orang ini yang memang harus pegang kuasa untuk pimpin bangsa-bangsa smua.
✡49:10 49:9-10 Wahyu 5:5
†49:24 49:24 sa - Bahasa Ibrani: Yakub.
‡49:24 49:24 sa - Bahasa Ibrani: Israel.
§49:25 49:25 Allah Yang Pu Kuasa Paling Besar - Bahasa Ibrani: Shaddai.
*49:26 49:26 Yusup pu kepala - Ini de pu arti tu Allah langsung kasi berkat tu ke Yusup saja.
†49:30 49:30 daera Mamre - Daera ini de ada di sebla utara Hebron, di tana Kanaan. Jarak dari daera Mamre ke Hebron tu dua stenga kilometer.