8
Prempuan-prempuan yang sama-sama deng Yesus dalam playanan
1 Habis itu Yesus pigi jalan kliling dari kota ke kota deng dari kampung ke kampung kastau Brita Baik tentang Allah jadi Raja. De sama-sama deng De pu dua blas murid-murid. 2 Juga ada prempuan-prempuan yang ikut, dong ni su dapa kas sembu dari sakit deng ada juga yang su dapa kas lepas dari roh-roh jahat. Dong ni: Maria yang dong panggil Magdalena,* 8:2 Magdalena - Ini dari kampung Magdala. de ni su dapa kas lepas dari tuju roh jahat; 3 trus Yohana, de pu paitua Khuza, Herodes pu pegawai; juga Susana deng banyak prempuan lain. Prempuan-prempuan ini dong ikut bantu Yesus dong pake dong pu uang sendiri.
Crita tentang orang yang hambur bibit tanaman
4 Waktu banyak orang dong rame-rame datang dari smua kota, dong kumpul baru Yesus bicara deng satu crita begini,
5 “Ada satu orang de kluar pigi hambur de pu bibit tanaman. Waktu de hambur bibit tanaman, ada bibit yang jatu di jalan trus orang dong injak trus burung-burung di udara dong makan sampe habis. 6 Trus ada bibit yang jatu di tana yang banyak batu-batu, bibit tumbu trus de jadi kring karna tra dapat air. 7 Bibit lain lagi jatu di rumput duri trus rumput duri itu tumbu baku dempet sampe tanaman itu mati. 8 Trus ada juga yang jatu di tana yang subur, de tumbu deng bua banyak skali, dari satu bibit bisa bua sampe sratus kali lipat.”
Habis crita itu trus Yesus bicara deng suara kras, “Sapa pu tlinga untuk dengar, de harus dengar baik-baik!”
9 Baru De pu murid-murid dong tanya sama De crita itu pu arti.
10 Trus Yesus De jawab,
“Kam su dapa kastau rahasia bagemana Allah printa jadi Raja, tapi sama orang-orang lain itu Sa pake crita, supaya
‘biar dong liat tapi dong tra liat,
juga dong dengar tapi dong tra mngerti.’✡ 8:10 Yesaya 6:9-10
11 Begini crita itu pu arti: Bibit itu Allah pu kata-kata. 12 Bibit yang jatu di jalan tu orang-orang yang su dengar trus Iblis datang ambil Allah pu kata-kata itu dari dalam dong pu hati, supaya dong jang percaya trus dapa kas slamat. 13 Yang jatu di tana yang batu-batu itu orang-orang yang su dengar Allah pu kata-kata itu, dong trima deng gembira. Tapi kata-kata itu tra masuk baik-baik dalam dong pu hati, dong percaya sebentar tapi waktu dapa uji dong langsung tra percaya. 14 Trus yang jatu di rumput duri tu, orang-orang yang su dengar Allah pu kata-kata itu, tapi dong slalu rasa kuatir tentang dong pu hidup, juga dong mo hidup kaya saja, sampe dong tra bisa bikin yang baik di dong pu hidup. 15 Yang jatu di tana yang subur itu orang-orang yang dengar Allah pu kata-kata, baru simpan di hati deng baik trus dong slalu bikin yang baik di dong pu hidup.”
Conto plita yang trang
16 “Trada orang yang pasang plita trus mo tutup deng loyang, ato mo taru di bawa tempat tidur. Tapi de pasti taru plita di tempat yang tinggi, supaya smua orang yang masuk dalam ruma bisa liat trang itu. 17 Karna trada yang tasembunyi yang nanti tra dapa liat, trus trada rahasia yang nanti tra jlas untuk smua orang tau. 18 Karna itu, dengar baik-baik apa yang kam dengar. Karna sapa yang trima Sa pu ajaran nanti Tuhan bantu dong mngerti lebi banyak lagi, tapi sapa yang tra mo trima Sa pu ajaran nanti Tuhan ambil dari dia juga.”
Yesus pu mama deng ade
19 Yesus pu mama deng ade-ade datang sama Dia, tapi dong tra bisa dekat De karna banyak orang kliling Dia. 20 Trus ada satu orang datang kastau Yesus, “Bapa pu mama deng ade-ade ada di luar, dong mo ketemu deng Bapa.”
21 Tapi Yesus bilang dong, “Sa pu mama deng ade-ade tu, dong yang dengar trus buat Allah pu kata-kata.”
Yesus kas tenang angin kencang
22 Satu hari Yesus deng De pu murid-murid dong naik prahu, baru Yesus bilang ke dong, “Mari tong pigi ke sebla danau.” Trus dong tolak prahu pigi. 23 Waktu dong di tenga danau, Yesus De tidur. Begini tiba-tiba angin kencang skali di danau, sampe air masuk dalam prahu itu baru dong su mo tenggelam.
24 Trus murid-murid datang kas bangun Dia, dong bilang “Guru, guru, tong mo mati tenggelam!”
De langsung bangun, trus bentak angin deng ombak. Angin deng air itu langsung brenti trus danau itu jadi tenang. 25 Trus De bilang sama dong, “Kam knapa tra percaya Saya?”
Dong smua takut deng heran, trus dong baku tanya, “Orang ini De sapa ka, sampe De bisa kas printa angin deng air trus dong ikut sama Dia?”
Yesus usir roh jahat dari orang Gerasa
26 Trus Yesus deng murid-murid dong sampe di orang Gerasa pu tana, yang ada di sebla timur danau Galilea. 27 Waktu Yesus turun dari prahu, orang satu datang dari tempat itu ke Yesus. Orang itu krasukan roh-roh jahat, trus de su lama tra pake pakean deng tra tinggal di ruma. De tinggal di goa-goa kubur.
28 Waktu de liat Yesus, de batariak trus tunduk depan Yesus deng bicara kras-kras, “Ko mo bikin apa deng saya, eh Yesus, Allah yang paling tinggi pu Anak? Sa mohon, jang Ko siksa saya.” 29 Orang itu bilang begitu karna Yesus kas printa roh jahat kluar dari dia. Su biasa roh jahat tu masuk ke dia. Baru de pu tangan su dapa rante deng kaki su dapa ikat kuat trus dong jaga de, tapi de masi bisa kas putus rante itu. Trus roh jahat biasa bawa de ke tempat sepi yang kring.
30 Begini Yesus tanya sama orang itu, “Sapa ko pu nama?”
De jawab, “Legion,”† 8:30 Legion pu arti satu batalyon tentara ato sama deng 4.000-6.000 orang. karna banyak roh jahat yang su masuk.
31 Roh-roh jahat tu dong mohon supaya Yesus jang usir dong ke jurang mati.‡ 8:31 jurang mati - Orang Yahudi percaya tempat orang mati ada di bawa dalam tana. Itu juga tempat untuk roh jahat dapa tahan tunggu Tuhan pu hari hukum dong. 32 Tra jau dari situ ada babi-babi banyak yang cari makan dekat jurang gunung, trus roh-roh jahat itu mohon sama Yesus, supaya De kas ijin dong masuk ke babi-babi itu. Yesus kas ijin dorang. 33 Trus roh-roh jahat itu kluar dari orang itu baru masuk dalam babi-babi. Trus rombongan babi itu lari ke jurang masuk ke dalam danau trus mati tenggelam.
34 Habis orang-orang yang jaga babi-babi itu liat smua yang jadi tu, dong lari deng crita smua itu di kota deng kampung-kampung yang dekat situ. 35 Karna tu, orang-orang datang dari kota deng kampung untuk liat apa yang su jadi. Dong datang ke Yesus, trus liat orang yang krasukan su dapa kas tinggal dari roh-roh jahat itu de duduk dekat Yesus pu kaki. De su pake pakean juga de su sadar. Jadi dong smua takut. 36 Orang-orang yang liat smua itu sendiri, kastau ke dong, bagemana orang yang krasukan itu bisa sembu. 37 Karna begitu orang-orang Gerasa smua minta Yesus supaya De kas tinggal dorang, karna dong takut skali. Jadi Yesus De naik prahu mo pigi. 38 Orang yang su bebas dari roh-roh jahat tu, de mohon supaya de mo ikut Yesus.
Tapi Yesus suru de, 39 “Pulang ke ko pu ruma trus crita smua yang Allah su buat sama ko.”
Orang itu de pigi ke smua tempat di kota itu baru kastau smua yang Yesus su buat sama dia.
Anak yang mati deng prempuan yang sakit pendarahan
40 Waktu Yesus kembali, orang banyak trima deng gembira, karna dong smua su tunggu-tunggu Dia. 41 Begini ada satu orang de pu nama Yairus, de ni kepala tempat ibada orang Yahudi. De datang tunduk depan Yesus pu kaki baru minta supaya Yesus mo ke de pu ruma, 42 karna de pu anak sakit para, de su mo mati. De pu anak ni satu itu saja, prempuan umur dua blas taun.
Waktu Yesus dong jalan ke Yairus pu ruma, orang banyak dempet-dempet Yesus dari smua ara. 43 Di tenga situ, ada prempuan satu yang su dua blas taun sakit pendarahan. Trus trada yang bisa kas sembu biar su kas habis de pu harta untuk brobat ke dokter tapi trada hasil apapa. 44 Prempuan itu de pigi dekat Yesus dari blakang, baru kore Yesus pu ujung baju panjang. Waktu itu juga de pu pendarahan langsung stop. 45 Trus Yesus tanya, “Sapa yang kore Saya?”
Karna dong smua tra mngaku, jadi Petrus de bilang, “Bapa tra liat ka? Orang banyak dempet-dempet dekat Bapa.”
46 Tapi Yesus bilang, “Ada orang yang kore Saya, karna Sa rasa ada kuasa yang kluar dari Saya.”
47 Prempuan itu sadar kalo yang de bikin tadi, Yesus su tau, jadi de datang deng gemetar§ 8:47 datang deng gemetar - Aturan hukum Musa kalo prempuan yang lagi datang bulan ato dara mngalir tra stop: de tra bersi. Juga de tra bole di tenga smua orang karna de kotor begitu, jadi de takut mngaku. depan Yesus, tunduk muka ke tana trus de crita sama smua orang yang ada knapa de kore Yesus pu baju juga de bisa langsung sembu.
48 Trus Yesus bilang sama prempuan itu, “Anak, karna ko percaya Saya, ko sembu. Pigi deng hati tenang.”
49 Waktu Yesus masi bicara, datang satu orang dari kluarga kepala tempat ibada itu deng bilang, “Bapa pu anak su mati. Bapa tra usa bikin sibuk Guru lagi.”
50 Tapi Yesus dengar begitu deng bilang ke Yairus, “Jang takut, percaya saja, pasti ko pu anak sembu.”
51 Habis sampe di Yairus pu ruma, Yesus tra kas ijin orang ikut masuk deng De, hanya Petrus, Yohanes, Yakobus deng anak itu pu bapa mama saja. 52 Smua orang mnangis anak itu deng suara besar. Trus Yesus bilang, “Jang mnangis, de tra mati de cuma tidur saja.”
53 Karna dong smua tau kalo anak itu su mati jadi smua orang baku bicara kas jelek-jelek Yesus. 54 Trus Yesus masuk pegang anak itu pu tangan baru bilang deng suara kras, “Mari anak, bangun!” 55 Anak itu de pu nyawa kembali, waktu itu juga de bangun. Trus Yesus suru dong kas makan anak itu. 56 Anak itu pu bapa mama heran skali. Tapi Yesus larang dong jang kastau apa yang su jadi tu, sama sapa saja.
*8:2 8:2 Magdalena - Ini dari kampung Magdala.
✡8:10 8:10 Yesaya 6:9-10
†8:30 8:30 Legion pu arti satu batalyon tentara ato sama deng 4.000-6.000 orang.
‡8:31 8:31 jurang mati - Orang Yahudi percaya tempat orang mati ada di bawa dalam tana. Itu juga tempat untuk roh jahat dapa tahan tunggu Tuhan pu hari hukum dong.
§8:47 8:47 datang deng gemetar - Aturan hukum Musa kalo prempuan yang lagi datang bulan ato dara mngalir tra stop: de tra bersi. Juga de tra bole di tenga smua orang karna de kotor begitu, jadi de takut mngaku.