9
Yesus utus De pu dua blas murid-murid
1 Begini Yesus panggil De pu dua blas murid, trus kasi dong hak deng kuasa untuk usir roh jahat deng kas sembu orang sakit. 2 Juga De utus dong pigi kastau bagemana Allah mo jadi Raja, deng kas sembu orang sakit. 3 Yesus bilang dong,
“Jang kam bawa apapa untuk di jalan, jang kam bawa tongkat ato tas, makanan ato uang, ato pakean ganti. 4 Kalo ruma satu su trima kam, tinggal jadi tamu di situ sampe kam kas tinggal kota itu. 5 Tapi kalo orang dong tra trima kam, kluar dari dong pu kota deng kas bersi debu dari kam pu kaki. Supaya jadi tanda nanti kota itu dapa hukum.”
6 Habis itu murid-murid dong pigi, dong pigi kliling smua tempat dari kampung ke kampung untuk kastau Brita Baik deng kas sembu orang-orang sakit.
Herodes bingung tentang Yesus
7 Waktu Herodes yang printa daera Galilea, de dengar smua hal yang Yesus su buat, de bingung skali karna ada orang yang kastau kalo Yohanes yang tukang baptis, yang dulu su mati, skarang de hidup lagi. 8 Juga ada yang kastau kalo Elia su muncul lagi, baru juga ada yang bilang nabi lain su hidup lagi.
9 Tapi Herodes bilang, “Yohanes pu kepala sa su suru orang potong, orang ini sapa ka? Sa su dengar crita banyak tentang Dia.” Jadi Herodes de usaha mo ketemu deng Yesus.
Yesus kas makan lima ribu orang
10 Waktu utusan-utusan dong kembali ke Yesus, dong crita smua yang dong su bikin. Yesus bawa dong sendiri saja pigi ke dekat kota Betsaida. 11 Tapi orang banyak su tau, trus dong ikut Dia. Yesus trima deng bicara sama dong tentang Allah jadi Raja. De juga kas sembu orang-orang yang sakit di tenga dong.
12 Pas waktu su mo malam, De pu dua blas murid datang sama Yesus baru bilang, “Bapa tempat ini sunyi, suru dong pigi ke kampung-kampung deng tempat-tempat dekat sini, supaya dong dapat makan deng tempat buat tidur.”
13 Tapi Yesus bilang dong, “Kam harus kasi dong makan!”
Dong jawab, “Yang tong punya hanya lima roti deng dua ikan, kalo tong yang kasi makan brarti tong musti pigi bli makanan untuk smua orang banyak ini.” 14 Dong bilang begitu karna laki-laki saja kira-kira 5.000 orang.
Trus Yesus bilang sama De pu murid-murid, “Suru dong duduk klompok-klompok, kira-kira satu klompok lima pulu orang.” 15 Murid-murid dong suru orang-orang bikin sperti apa yang Yesus bilang. 16 Habis itu Yesus ambil lima roti deng dua ikan itu, baru liat ke langit, doa syukur sama Allah, trus pata-pata roti baru kasi sama De pu murid-murid dorang, trus dong bagi-bagi sama orang banyak itu. 17 Dong smua makan sampe kenyang. Habis itu dong kumpul roti yang lebi, sampe dua blas loyang.
Petrus de bilang tentang Yesus
18 Satu kali waktu Yesus ada doa sendiri, De pu murid-murid dong datang ke Dia. Trus De tanya sama dong, “Orang banyak dong bilang Sa ni sapa?”
19 Dong jawab, “Ada yang bilang Yohanes tukang baptis, ada yang bilang Elia, ada juga yang bilang, kalo satu dari nabi-nabi yang skarang su hidup lagi.”
20 Yesus tanya ke dong, “Mnurut kam, Sa ni sapa?”
Petrus jawab, “Raja yang Allah pili, yang Allah su janji.” 21 Trus Yesus larang dong deng kras, supaya jang dong kastau hal itu ke sapa-sapa.
Yesus kastau tentang nanti De sengsara deng mati
22 Yesus bilang lagi sama De pu murid-murid,
“Anak Manusia yang Allah utus, harus dapa siksa banyak deng dapa tolak dari orang Yahudi pu tua-tua adat deng guru-guru agama sama imam-imam kepala, trus dapa bunu, tapi hari ketiga Allah kas hidup lagi.”
23 Habis itu Yesus bilang sama dong smua,
“Orang yang mo ikut Saya, de tra bole ikut de pu mau, trus harus pikul de pu salib stiap hari deng ikut Saya. 24 Karna sapa saja yang mo kas slamat de pu hidup, de tra dapat hidup yang trada akir. Tapi orang yang kasi de pu hidup untuk Saya,*9:24 kasi de pu hidup untuk Saya - Itu pu arti siap mati untuk ikut Yesus. de yang nanti slamat.✡9:24 Matius 10:39; Lukas 17:33; Yohanes 12:25 25 Ada untung ka kalo satu orang de dapat smua harta di dunia ini, tapi de sendiri rugi karna de mati deng tra bisa hidup yang trada akir. 26 Karna sapa saja yang malu akui Sa deng Sa pu ajaran, Sa Anak Manusia yang Allah utus juga nanti malu karna orang itu, waktu Sa datang nanti ke bumi dalam trang deng kuasa yang besar yang Allah Bapa De kasi, juga deng malaikat-malaikat suci! 27 Dengar ini baik-baik: Dari tenga-tenga kam yang hadir di sini ada yang trakan mati sampe kam liat Allah printa jadi Raja di bumi.”
Yesus bicara sama Musa deng Elia
28 Kira-kira habis dlapan hari Yesus kas ajar tentang smua itu, Yesus bawa Petrus, Yohanes, sama Yakobus, naik ke gunung satu untuk pigi doa. 29 Waktu Yesus De doa di situ, De pu muka bruba kliatan jadi lain trus De pu pakean puti trang skali. 30 Tiba-tiba dong liat ada dua orang muncul dong bicara deng Yesus, dong tu nabi Musa deng Elia. 31 Dong kliatan ada cahaya trang dari surga. Dong dua bicara sama Yesus tentang De su mo mati di Yerusalem sperti yang Allah pu utusan dong bilang dulu.
32 Waktu itu, Petrus deng de pu teman-teman dong su tidur sono. Begitu dong bangun, dong kaget liat Yesus De trang skali trus De ada bediri deng dua orang. 33 Habis itu pas dua orang itu mo pigi kas tinggal Yesus, Petrus de bilang sama Yesus begini, “Bapa Guru! Snang skali tong ada di sini. Lebi baik tong kas bediri tiga tempat: satu untuk Bapa Guru, satu untuk Musa baru satu untuk Elia.” Tapi Petrus de tra tau apa yang de bicara itu.
34 Waktu Petrus masi bicara begitu, awan puti datang tutup dong. Waktu dong masuk awan itu, dong takut skali. 35 Trus ada suara dari awan itu bilang, “Ini Sa pu Anak yang Sa pili, kam harus dengar Dia.” 36 Habis dong dengar suara itu, dong liat Yesus sendiri saja yang bediri di situ. Yesus pu murid-murid dong kas diam smua itu, trus waktu itu dong tra kastau sama sapa-sapa apa yang dong liat.
Yesus De bentak roh jahat kluar dari anak satu
37 De pu besok begini, Yesus deng murid-murid tiga turun dari gunung itu, banyak orang datang rame-rame ketemu Yesus. 38 Begini satu orang dari orang banyak itu bicara deng suara kuat,
“Bapa Guru, sa minta tolong liat sa pu anak, karna sa pu anak satu ini saja. 39 Roh jahat biasa kalo srang, de batariak-batariak badan gemetar goyang-goyang baru mulut kluar busa. Roh jahat itu siksa kas rusak de pu badan trus tra mau kas tinggal dia. 40 Sa su minta Bapa pu murid-murid supaya dong usir roh jahat itu, tapi dong tra bisa.”
41 Jadi Yesus bilang, “Kam memang orang-orang yang tra percaya deng tra ikut yang benar, mo sampe kapan Sa harus tinggal di tenga kam deng sabar? Bawa ko pu anak kemari!”
42 Waktu anak itu mo dekat Yesus, roh jahat banting de ke tana deng gemetar trus de pu badan kejang-kejang. Tapi Yesus bentak roh jahat kluar trus kas sembu anak itu, trus kasi anak itu kembali sama de pu bapa. 43 Smua orang heran liat Allah De pu kuasa yang besar.
Yesus De bicara lagi tentang De pu kematian
Orang-orang dong masi heran liat smua yang De buat, Yesus bilang sama De pu murid-murid, 44 “Kam dengar baik, jang kam lupa yang Sa bilang ini: Anak Manusia nanti dapa kasi ke dalam tangan manusia. ” 45 Dong tra mngerti kata-kata itu, karna Allah tutup arti kata itu. Jadi dong tra tau, trus dong tra brani tanya kata itu pu arti sama Yesus.
Sapa yang paling besar
46 Trus ada baku ribut di tenga Yesus pu murid-murid dong tentang sapa yang paling besar dari dong. 47 Tapi Yesus su tau yang dong pikir, karna itu De pegang anak kecil satu trus kas bediri di samping Dia. 48 Trus bilang sama dorang,
“Sapa saja yang trima anak ini karna Saya, de trima Saya. Trus sapa yang su trima Saya, de trima Dia yang su utus Saya. Karna sapa yang paling kecil dari kam, de yang paling besar.”
Kalo orang tra mlawan kitong, de tu tong pu teman
49 Begini Yohanes de bilang sama Yesus, “Guru, tong liat satu orang de usir roh jahat pake Guru pu nama. Karna de tra ikut tong jadi tong larang de bikin begitu pake Guru pu nama!”
50 Trus Yesus bilang, “Jang kam larang dia, karna sapa saja yang tra mlawan kitong, de tu sama deng kitong.”
Satu kampung di Samaria tolak Yesus
51 Satu hari, waktu mo dekat Yesus trangkat ke surga, Yesus nekat deng jalan pigi ke kota Yerusalem. 52 Jadi De suru orang pigi duluan. Dong pigi, trus masuk ke kampung satu di daera Samaria buat kas siap smua yang Yesus perlu. 53 Tapi orang-orang di kampung tu tra mau trima Yesus, karna dong tau kalo Yesus mo pigi ke Yerusalem.†9:53 tra mau trima Yesus, karna dong tau kalo Yesus mo pigi ke Yerusalem - Orang Samaria tra suka orang Yahudi karna orang Yahudi bilang harus semba Allah di Yerusalem bukan di tempat lain, sperti di gunung Gerazim tempat orang Samaria dong semba. Jadi karna Yesus mo ke Yerusalem jadi dong tra trima Dia. 54 Pas waktu Yesus pu murid Yakobus deng Yohanes dong tau itu, dong bilang, “Tuhan, bagemana Tuhan mau ka, tong minta api turun dari surga supaya kas hilang orang-orang ini?” 55 Yesus balik trus mara dong. 56 Habis itu dong pigi ke kampung yang lain.
Bagemana mo jadi Yesus pu pengikut
57 Waktu Yesus deng De pu murid-murid dong masi lanjut jalan, ada satu orang de bilang sama Yesus, “Sa mo ikut Bapa ke mana saja Bapa mo pigi.”
58 Yesus bilang ke dia, “Anjing hutan ada tempat untuk tinggal, burung juga ada sarang, tapi Sa, Anak Manusia yang Allah utus, trada tempat untuk taru kepala.”
59 Trus Yesus bilang satu orang yang lain, “Mari ko ikut Saya!”
Tapi orang itu de bilang, “Tuhan, kas ijin sa pulang dulu kubur sa pu bapa.”
60 Tapi Yesus bilang sama dia, “Kas biar orang mati kubur orang mati. Tapi ko, pigi kastau brita tentang Allah su printa jadi Raja di dunia ini.”
61 Trus satu orang lain lagi bilang, “Bapa, sa mo ikut Bapa tapi sa mo ijin pigi kastau sa pu kluarga dong dulu.”
62 Tapi Yesus bilang sama orang itu, “Orang yang su siap mo cangkul tana tapi de balik liat ke blakang, de tra pantas jadi anggota dari Allah pu krajaan.”
*9:24 9:24 kasi de pu hidup untuk Saya - Itu pu arti siap mati untuk ikut Yesus.
✡9:24 9:24 Matius 10:39; Lukas 17:33; Yohanes 12:25
†9:53 9:53 tra mau trima Yesus, karna dong tau kalo Yesus mo pigi ke Yerusalem - Orang Samaria tra suka orang Yahudi karna orang Yahudi bilang harus semba Allah di Yerusalem bukan di tempat lain, sperti di gunung Gerazim tempat orang Samaria dong semba. Jadi karna Yesus mo ke Yerusalem jadi dong tra trima Dia.