Pwuhken SEREMAIA
Oaralap en Pwuhk wet
Soukohp Seremaia momour ahnsou reirei ehu me kaimwisekala senturi keisuh oh tapihada senturi keweneu mwohn Krais. Erein ahnsou reirei en eh doadoahk en soukohp e pangepangenki sapwellimen Koht aramas kokohp en kalokolok laud me pahn lelohng arail wehi pwehki ar kin pwongih dikedik en eni kan, oh pwehki diparail kan. E momourte e lao pein kilang pweidahn kokohp wet ni Serusalem eh lohdiong nanmwarkien Papilonia, Nepukadnesar, kamwomwmwomwlahn kahnimwo oh Tehnpas Sarawio, oh en mehn Suda tohtohie ar kalipilipalahng Papilonia iangahki ar nanmwarki. E ahpw pil kohpada sapahldohn mehn Israel ehu ahnsou sang wasa re kalipilipala ie, oh onohnsapahl en wehin Israel.
Pwuhken Seremaia kak pwalpeseng wiahda ire pwukat me pahn sansal pah: 1) Malipilip ong Seremaia. 2) Mahsen sang rehn Koht ong wehin Suda oh ong kaun akan ni mwehin Sosaia, Sehoiakim, Sehoiakin, oh Sedekaia. 3) Audepen pwuken kataman en Paruk, nein Seremaia sounnting, iangahki kokohp kei oh wiewia kesempwal kei sang ni mouren Seremaia. 4) Mahsen sang rehn Kaun-o duwen wehin liki kan. 5) Poadopoad kapatapat, me koasoia duwen ohlahn Serusalem, oh kalipilipalahng Papilon.
Seremaia ohl me kin mwadang pehm wasa, me poakohng mehlel nah aramas akan, oh kin mehn seirenki oh nsensuwedki eh kin kadeikirailda. Nan ire tohto e koasoia ni pepehm loal ehu duwen eh aleier lokolok pwehki Koht eh ketin malipe ih en wiahla soukohp men. Mahsen en Kaun-o rasehng kisiniei nan kapehde—e sohte kak tokedihsang eh lohkiseli.
Ekei mahsen me keieu kesempwal nan pwuhk wet idihada ahnsou ehu palihdo sang ahnsou apwal en Seremaia, me inou kapw ehu pahn miehla, inou ehu me sapwellimen Koht aramas akan pahn kin dadaur ni sohte sounpadahk emen mie mehn katamankin irail, pwehki eh pahn ntingdi nan mohngiongirail kan (31.31-34).
Audepe ni Oaralap
Malipilip ong Seremaia 1.1-19
Kokohp kan ni mwehin Sosaia, Sehoiakim, Sehoiakin, oh Sedekaia 2.1—25.38
Mwekid kesempwal akan nan mouren Seremaia 26.1—45.5
Kokohp me uhwong wehi kan 46.1—51.64
Pwupwulahn Serusalem 52.1-34
1
1 Pwuhk wet koasoia duwen mahsen kan en Seremaia nein Ilkaia, emen samworo sang nan kahnimw Anadod nan sapwen Pensamin. 2 KAUN-O mahseniong Seremaia nan sounpar kaeisek siluhn mwehin Sosaia nein Amon, nanmwarkien Suda.2 Nan. 22.3—23.27; 2 Kron. 34.8—35.19. 3 E pil pwurehng mahseniong Seremaia ni mwehin Nanmwarki Sehoiakim, nein Sosaia. Mwurin mwo, KAUN-O pil ketin mahseniong pak tohto lao lel sounpar kaeisek ehun mwehin Sedekaia nein Sosaia. Ni kelimaun sounpwong en nan sounparo aramas akan en Serusalem kalipilipala.2 Nan. 23.36—24.7; 2 Kron. 36.5-8; b 2 Nan. 24.18—25.21; 2 Kron. 36.11-21.
Malipilip ong Seremaia
4 KAUN-O ahpw ketin mahsanihong ie, 5 “Mwohn ei kihong uhk mour, I piluhkadahr, oh mwohn omw ipwidi, I idihiukadahr pwe ke en wiahla soukohp ong wehi kan.”
6 I ahpw sapeng patohwan, “Maing KAUN, Wasa Lapalahpie, ia duwe, pwe I sohte kin ese pato; I me nohn pwulopwul.”
7 A KAUN-O ahpw mahsanihong ie, “Ke dehr nda me ke me nohn pwulopwul, ahpw kohweite rehn aramas akan me I kadarowohng uhk rehrail, oh kasalehiong irail mehkoaros me I pahn padahkihong uhk. 8 Ke dehr masak irail, pwe I pahn kin ieiang uhk oh sinsileiuk. Ngehi, KAUN-O, me mahmahsen!”
9 KAUN-O eri ketin kapahdo limeo, oh ketin sair kilin ewei kat, oh mahsanihong ie, “Rong, I kihong uhk mahsen kan me ke pahn nda. 10 Rahnwet I kihong uhk manaman pohn nanmwarki kan oh wehi kan, pwe ke en usada oh kupwelidi, ke en kauwehla oh kamwomwala, ke en kauwada oh padokedi.”
Kaudiahl Riau
11 KAUN-O ahpw ketin keinemwe rehi, “Seremaia, dahme ke kilikilang?”
I ahpw sapeng, patohwan, “Maing, I patopatohwan rahntuhke almon pwoat.”
12 KAUN-O eri ketin mahsanih, “Me pwung! Pwe ngehi I kin mwasamwasahnaMWASAMWASAHN: Sisen lepin mahsen en Ipru me wehwehki “almwon” kereniong sisen lepin mahsen me wehwehki “mwasamwasahn.” pwe ei mahsen kan en pweida.”
13 KAUN-O ahpw pil pwurehng keinemwe rehi, mahsanih, “Dahme ke pil kilikilang?”
I ahpw sapeng, patohwan, “Maing, I patopatohwan einpwoat ehu me pwoapwoail ni paliepeng, oh kanenge nektehn wudekdohng wasaht.”
14 E ahpw ketin mahsanihong ie, “Mehn kamwomwala pahn pwoailda sang ni paliepeng, wudekdohng pohn irail koaros me kin kousoan nan sahpwet, 15 pwe I pahn malipehdo wehi koaros en paliepeng. Ar nanmwarki kan pahn ketido oh ketikihdiong mwoalarail kan ni ewen kelen Serusalem oh kapilpene kahnimwo; re ahpw pahn pil kapilpene kahnimw teikan en Suda. 16 I pahn kaloke nei aramas akan pwehki ar wiadahr dihp, re keseielahr oh wia ar meirong kan ong koht teikan, re pwongih dikedik en eni kan me re wiadahr. 17 Eri, onopada Seremaia, kohwei oh kasalehiong irail mehkoaros me I padahkihong uhk ke en kasalehda. Eri, met ke dehpa masak irail; pwe ma soh, ni omw pahn mi rehrail I pahn kamasakuhkada laudsang met. 18-19 Rong, Seremaia! Koaros tohn sahpwet—nanmwarki kan en Suda, lapalap akan, samworo kan, oh aramas akan—pahn uhwong uhk. Ahpw rahnwet I pahn kakehleiukada pwe ke en pelian irail. Ke pahn rasehng kahnimw me kehl kehlail ehu, apwoat uhr mete, oh dihd prons ehu. Re sohte pahn kaloweiukedi, pwe I pahn kin ieiang uhk oh sinsileiuk. Ngehi, KAUN-O, me mahmahsen.”
1:2: 2 Nan. 22.3—23.27; 2 Kron. 34.8—35.19.
1:3: 2 Nan. 23.36—24.7; 2 Kron. 36.5-8; b 2 Nan. 24.18—25.21; 2 Kron. 36.11-21.
a1:12: MWASAMWASAHN: Sisen lepin mahsen en Ipru me wehwehki “almwon” kereniong sisen lepin mahsen me wehwehki “mwasamwasahn.”