88
Likwerin Peki Sawas uTITLE NI MAHSEN EN IPRU: En peneinei en Kora ar melkahka; koul pwoat. melkahka pwoat sang Eman mehn Esra.
1 Maing KAUN ei Koht, ei sounkomour, I kin likilikwer sang nimenseng lel nipwong,
oh nipwong I kin patohdo mwohmwi.
2 Komw ketin karonge ei kapakap;
komw ketin karonge ei likwer en pek sawas!
3 Apwal ngeder lelohngieier
I kereniongehr mehla.
4 I rasehngehr aramas teikan koaros me nektehn mehla;
ei kehl koaros sohrasangieier.
5 I lekdeklahr rehn me melahr akan;
I rasehngehr me kamakamalahr akan me wonohnehr nan arail sousou,
irail kan me komw ketin melielahr douluhl,
me solahr kak ale sawasaparail sang rehmwi.
6 Komw ketin sikeniedilahng nan kepin ei sousou,
nan pwoahr ehu me loal oh rotorot douluhl.
7 Omwi engieng pahi me inenen toutou,
oh I milahr pahn iloak en engieng wet.
8 Komwi me ketin kadohwan sang ie kompoakepahi kan;
komw ketin wiahkiniehla mehkot saut mwohn masarail kan.
I seldier oh solahr kak pitla;
9 pwoaren mesei kat luwetkilahr ei lokolok.
Maing KAUN, I patohwan likilikweriong komwi rahn koaros
oh kin kapahda pehi kat nan ei kapakap.
10 Ia duwe, komw kin ketin wiahda manaman ong me melahr akan?
Re kak mourda oh kapikapinga komwi?
11 Mie me kin koasoia sapwellimomwi limpoak poatopoat nan sousou
de sapwellimomwi loalopwoat nan wasahn kamwomwomwala kan?
12 Ia duwe, sapwellimomwi manaman akan kin sansal nan wasa rotoroto
de sapwellimomwi kalahngan nan sapwen me manokonoklahr akan?
13 Maing KAUN, I patohwan likweriong komwi pwe komwi en ketin sewese ie;
nimenseng koaros I kin patohwan kapakapohng komwi.
14 Maing KAUN, dahme komw ketin soingkiniehla?
Dahme komw ketin sohpeikihwei sang ie?
15 Sang ni ei tikitik, I kin alehdi lokolok laud oh kin kerenieng mehkihla;
I patohwan weikengkilahr toutou en sapwellimomwi kalokolok kan.
16 Sapwellimomwi engieng mwuledek kauweielahr;
sapwellimomwi kalokolok kan nektehn kemeiehla.
17 Erein rahn ehu pwon re kin kapikapil ie rasehng ahden lapake;
re kin kapiliepene sang wasa koaros.
18 Komw pil ketin kadohwanewei sang ie kompoakepahi mehlel kan,
eri rotorotte me kin ieiang ie.
u^ TITLE NI MAHSEN EN IPRU: En peneinei en Kora ar melkahka; koul pwoat. melkahka pwoat sang Eman mehn Esra.