Pohnpeian Bible with Apocrypha MELKAHKA KAN 89

Melkahka ni Ahnsou Apwal en Wehi v

1 Maing KAUN, I pahn kin koulki sapwellimomwi limpoak poatopoat;

I pahn kalohki sapwellimomwi loalopwoat kohkohlahte.

2 I patohwan ese me sapwellimomwi limpoak pahn kin poatopoatete,

oh sapwellimomwi loalopwoat kin duweduwehte sohte wekila, rasehng pahnlahng.

3 Komw ketin mahsanih, “I wiadahr inou ehu ong emen me I piladahr;

I inoukihong ei ladu Depit,

4 ‘Emen sang kadaudokomw kan pahn kin nanmwarki ahnsou koaros;

I pahn kin kolokol teng omw wehi kohkohlahte.’ ”

5 Maing KAUN, tohn nanleng kan kin koulkihong komwi soahng kapwuriamwei kan me komw kin ketin wiahda;

re kin koul kapikapinga sapwellimomwi loalopwoat.

6 Maing KAUN, sohte emen nanleng me rasehng komwi;

sohte tohn nanleng men me pahrekiong komwi.

7 Irail me sarawi kan kin masak komwi;

irail koaros kin lemmwikin komwi.

8 Maing KAUN, Koht Wasa Lapalap, sohte me kin ahneki manaman lapalap duwehte komwi;

Maing KAUN, komwi me ketin loalopwoat ni mehkoaros.

9 Komw kin ketin kakaun manaman laud en madau kan;

komw kin ketin kameleileidi iloak laud kan.

10 Komw ketin kalowehdi Rahap, w mahn kamasepwehko, oh ketin kemehla;

komw ketin powehkihdi sapwellimomwi roson lapalap sapwellimomwi imwintihti kan.

11 Sampah, iei sapwellimomwi, nanleng pil duwehte;

komw me ketin wiahda sampah oh audepe kan koaros.

12 Komw me ketin kapikada paliepeng oh palieir;

Nahna Tapor oh Nahna Ermon kin pereperen kokouliong komwi.

13 Ia uwen laud en sapwellimomwi manaman!

Ia uwen lapalap en sapwellimomwi roson!

14 Sapwellimomwi wehi poahsoankihda pwungen kosonned oh pwuhng pahrek;

limpoak oh loalopwoat kin sansal ni mehkoaros me komw kin ketin wia.

15 Meid pai aramas akan me kin kokoul kaudokiong komwi,

me kin momour nan marain en sapwellimomwi kadek.

16 Pwehki komwi re kin pereperen sang nimenseng lel nipwong,

oh kapikapinga sapwellimomwi kalahngan lapalap.

17 Komw ketikihong kiht manaman laud en powehdi pak ngeder;

sapwellimomwi limpoak me kin kahrehiong kiht en powehdi.

18 Maing KAUN, komwi me kin ketin pilohng kiht silepat;

komwi, me Koht Sarawien Israel, komwi me ketikihong kiht at nanmwarki.

Sapwellimen Koht Inou ong Depit

19 Nan peudiahl ehu mahsie komw ketin mahsanihong sapwellimomwi ladu loalopwoat ko,

“I sewesedahr sounpei ndand emen;

I piladahr mehmen sang nanpwungen aramas akan oh ketikihong mwoale.

20 I kasapwiladahr ei ladu Depit pwehn nanmwarkihla

ni ei keiehki leh sarawi.

21 Ei roson pahn kin ieiang ih ahnsou koaros,

oh ei manaman pahn pil kakehlahda.

22 Sapwellime imwintihti kan sohte pahn kin pweida ni ar pahn kin pelianda;

oh aramas suwed kan sohte pahn kalowehdi.

23 I pahn tiakpeseng oh kauwehla sapwellime imwintihti kan,

oh kemehla koaros me kin kailongki.

24 I pahn kin loalloale ahnsou koaros oh loalopwoatohng;

I pahn kin koasoanehdi pwe en kin powehdi sapwellime imwintihti kan ahnsou koaros.

25 I pahn kalaudehla sapwellime wehi

sang Mediderenien lel ni Pillap Iupreitis.

26 E pahn kin mahsanihong ie,

‘Komwi me semei oh ei Koht;

komwi me silepei oh sounkomourpei.’

27 I pahn wiahkihla ih nei mesenih,

me pahn lapalap sang nanmwarki kan.

28 I pahn kin dadaur ei inou ong ih ahnsou koaros,

oh inou wet pahn kin poatopoat kohkohlahte.

29 Kadaudoke men pahn kin nanmwarki ahnsou koaros;

sapwellime wehi pahn poatopoat duwehte pahnlahng.

30 “Ahpw ma kadaudoke kan pahn kauwehla ei kosonned akan

oh sohte weweidki ei koasoandi kan,

31 ma re pahn mwamwahliki ei kaweid kan

oh sohte kapwaiada ei kosonned akan,

32 eri I pahn kaloke irail pwehki diparail kan;

I pahn kemehkin irail ar sapwung kan.

33 Ahpw I sohte pahn katokehdi ei limpoak ong Depit

oh I sohte pahn kasapwungehla ei inou ong ih.

34 I sohte pahn kauwehla ei inou ong ih,

de kapweiekidi ehute inou me I wiahiong.

35 “I inoukihda ni mwarei sarawi pahn pak teieu:

I sohte pahn wiahda likamw ong Depit.

36 Kadaudoke kan pahn kin poatopoat ahnsou koaros,

oh I pahn kin sinsile sapwellime wehi erein ketipin eh pahn kin dakedaker wasa.

37 E pahn poatopoat rasehng maram,

me wia mehn kadehdepen eh loalopwoato pahnlahng.”

Kedepwidepw en Lohdien Nanmwarki

38 Ahpw komw ketin engiengda pahn sapwellimomwi nanmwarki me pilipilda;

komw ketin kesehla oh soikeweisang rehmwi.

39 Komw ketin katokedier sapwellimomwi inou ong sapwellimomwi ladu

oh ketin kesehdiong nanpwel sapwellime nihn.

40 Komw ketin karengkehdi kelen sapwellime kahnimw

oh ketin kauwehla sapwellime wasahn mahwen kan.

41 Koaros me kin keid wasao kin pirapahsang sapwellime dipwisou kan;

mehn mpe kan koaros kin kouruhrki.

42 Komw ketikihong sapwellime imwintihti kan manaman en powehdi;

komw ketin kahrehiong irail koaros re en kin pereperen.

43 Komw ketin wiahiong pwe sapwellime tehtehn mahwen kan en sohla katepe

oh ketin mweidala pwe en lohdi nan mahwen.

44 Komw ketikihsang sapwellime sokon en nanmwarki

oh ketin sikendiong mwoahle nanpwel.

45 Komw ketin wiahkihla ih ohl laud emen mwohn eh ahnsou

oh ketin kadirehkihla paisuwed mehlel.

Kapakap en Peki Kamaiau

46 Maing KAUN, komw pahn karirih komwihla kohkohlahte?

Ia erein sapwellimomwi engieng eh pahn lullul rasehng kisiniei?

47 Komw ketin tamanda ia uwen mwotomwot en ei mour;

tamataman me komwi me ketin wiahda kiht aramas me pahn mehla!

48 Ihs me kak momourte oh sohte mehla?

Ia duwen aramas emen eh pahn iredihsang pein ih eh sousou?

49 Maing at Kaun, ia kasalepen sapwellimomwi limpoak en mahso?

Ia sapwellimomwi inou ko me komw ketin wiahiong Depit?

50 Komw dehr meliehla duwen aramas akan ar kin lahlahwe ie, sapwellimomwi ladu menet,

duwen ei kanengamahiong en me rotorot kan ar lahlahwe ie.

51 Maing KAUN, sapwellimomwi imwintihti kan kin lahlahwe sapwellimomwi nanmwarki pilipilda!

Re kin lahlahwe wasa koaros me e kin ketila ie.

52 Kapinga KAUN-O kohkohlahte!

Amen! Amen!

v^ TITLE NI MAHSEN EN IPRU: En Edan mehn Esra eh koul.

^ 1 Nan. 4.31.

89:4: 2 Sam. 7.12-16; 1 Kron. 17.11-14; Mel. 132.11; Wie. 2.30.

w89:10: RAHAP: Mahn kamasepwehk en kawao men me wia kilel en pingiping oh suwed.

89:20: 1 Sam. 13.14; Wie. 13.22; b 1 Sam. 16.12.

89:27: Kaud. 1.5.