132
Kapingpen Tehnpas Sarawi
1 Maing KAUN, komw dehr ketin meliehla Depit
oh soangen apwal akan koaros me lelohng ih.
2 Maing KAUN, komw ketin tamanda dahme e patohwan inoukihong komwi,
inowo me e patohwan wiahiong komwi, Wasa Lapalap, Koht en Seikop:
3 “I sohte pahn pedolong nan imweio oh wendi nan kieio;
4 I sohte pahn kommoal de meirla,
5 I lao pahn diar wasa kis ong KAUN-O,
tehnpas ehu ong Wasa Lapalap, Koht en Seikop.”
6 Se rongehr duwen Kohpwahn Inowo, nan Pedleem,
se ahpw diarada nan mohs en Searim.2 Kron. 6.41-42.
7 Se ahpw patohwan, “Kitail patolahng nan tehnpas en KAUN-O;
kitail eri wia atail kaudok mwohn mwoale.”
8 Maing KAUN, komw ketidohng nan Tehnpas Sarawio iangahki sapwellimomwi Kohpwahn Inowo,
kilel en sapwellimomwi manaman,
oh ketikette wasaht kohkohlahte.
9 Sapwellimomwi samworo kan en wia dahme pwung ahnsou koaros;
sapwellimomwi aramas koaros en ngisingiski ar peren!
10 Komw ketin inouwohngehr sapwellimomwi ladu Depit;
Maing KAUN, komw dehr soikeweisang rehmwi nanmwarki me komw ketin piladahr.
11 Komw ketin wiahiong Depit inou mehlel ehu—
inou ehu me komw sohte pahn ketin wekidala:
“I pahn kasapwilada emen noumw pwutak kan en nanmwarki,
oh e pahn kakaun mwurimw.2 Sam. 7.12-16; 1 Kron. 17.11-14; Mel. 89.3-4; Wie. 2.30.
12 Ma noumw pwutak kan pahn loalopwoatohng ei inou
oh kosonned akan me I pahn kihong irail,
eri, neirail seri kan pil pahn iang mwohd nan mwoahl wet kohkohlahte.”
13 KAUN-O ketin piladahr Saion;
e ketin kupwurki wiahki wasao tehnpese:
14 “Iei wasaht me I pahn kin kousoan ie kohkohlahte;
iei wasaht me I pahn kin kakaun wasa.
15 I pahn kapaiahkihda Saion soangen kamwahu koaros me e kin anahne;
I pahn kammedehkihla me semwehmwe kan kisin mwenge.
16 I pahn kupwuramwahwih eh samworo kan ni arail wiewia kan koaros,
oh aramas koaros en kokoul oh ngisngiski ar peren.
17 Iei wasaht me I pahn kasapwilada emen kadaudok en Depit pwe en wiahla nanmwarki lapalap;
oh I pahn kadakadaur manaman en nanmwrkio me I piladahr.1 Nan. 11.36.
18 I pahn kihong eh imwintihti kan nan kanamenek mwuledek,
a eh wehi pahn paiamwahu oh pweida.”