Pwuhk Kapahiou
90
(Melkahka 90—106)
Duwen Koht oh Aramas xTITLE NI MAHSEN EN IPRU: En Moses, ohlen Kohto, eh kapakap.
1 Maing ei Kaun, komwi me dewat ahnsou koaros.
2 Mwohn nahna kan ar wiawihda,
mwohn omwi ketin kapikada sampah,
komwi Koht poatopoat emen,
oh pahn wia Koht kohkohlahte.
3 Komw ketin kilelehiong aramas akan pwe re en pwurehng wiepwella;
komw ketin kapwureiraillahng nan pwehl.
4 Pwe mwohn silangmwi pahr 1000 rasehng rahn teieu,
duwehte aio, me samwalahr,
rasehng ahnsou mwotomwot kis nipwong.2 Pit. 3.8.
5 Komw kin ketin koakoaikit sang nin sampah, rasehng lapake ieu;
oh se rasehng ouraman ehu.
Se rasehng reh me wosada nimenseng,
6 kekeirda oh masalpeseng,
a nin soutik e kin mengila.
7 Omwi engieng me kin kamwomwkitala;
se kin masepwehngkihda omwi engieng mwuledek.
8 Komw kin ketin kasalehda mwohmwi dipat akan,
oh dipat rir kan wasa me pahn kak sansalohng komwi.
9 At mour kin mwotomwotkihla omwi engieng;
at mour kin mwadang sohrala, rasehng mwenginingin ehu.
10 Sounpar 70, ihte werein at mour—
a ma se kehlail, e pahn lel 80;
ahpw pahr pwukat kin kahrehiong kiht pwunodte oh apwal;
mour kin mwadang imwisekla, oh se solahr mie.Sir. 18.8-9.
11 Ihs me pehmehr ia uwen mwuledek en omwi engieng?
Ihs me kak ese kamasepwehk en omwi engieng?
12 Komw ketin padahkihong kiht duwen mwotomwot en at mour,
pwe se en loalokongkihla.
13 Maing KAUN, ia erein omwi pahn wie engieng?
Komw ketin kupwurei kiht, sapwellimomwi ladu pwukat!
14 Komw ketin kadirehkinkitala sapwellimomwi limpoak poatopoat nimenseng koaros,
pwe se en kin kokouliong komwi oh pereperen erein at mour.
15 A met komw ketin kansenamwahwihkitala nin duwen omwi ketin kansensuwedihkitehr
erein ahnsou me se mihmi nan apwal ahnsou reirei.
16 Komw ketin mweidohng kiht, sapwellimomwi ladu pwukat, se en kilang wiepen nin limomwi manaman akan;
oh kadaudokat kan re en iang udiahl sapwellimomwi roson lingan.
17 Maing KAUN, at Koht, sapwellimomwi kupwuramwahu en ieiang kiht,
oh ketin mweidohng kiht se en pweida mwahu ni mehkoaros me se kin patohwan wia!