1 Níi nchakon tjumeꞌe bakeꞌe naa kia kuteꞌe na̱ tjajna Caná nunte Galilea. Janée ndo Jesús jii jan ntiꞌa. 2 Ni bakeꞌe kia nichjeꞌe na̱ ndo Jesús ko sen teyuu chrikao ndo xrokui̱i̱ sen kia meꞌe kaxon. 3 Tjumeꞌe tsikanga xranvino ko janée ndo Jesús ndache jan ndo:

―Í chóndaꞌi na̱ xranvino.

4 Ko juatingíexin ndo Jesús:

―Nchri, ¿sonda ndachijiana meꞌe? Xratijiꞌa nchakon sintaꞌa naa ixra̱ ijié.*naa ixra̱ ijié milagro

5 Ko jeꞌe jan ndache jan ni stetonchjeya ngeꞌe:

―Ncheꞌenta kain ngeꞌe xrontatjunta ndo.

6 Ko ntiꞌa jii ikjaon ichi tsikoña ixro, jitjiá inda, meꞌe tundeꞌe ni judío nchakon tijma na̱, nchakon tantsje na̱ jíee na̱. Ko ngujngu ichi meꞌe titja tikia xranchi ochenta o̱ ciento litro inda. 7 Ndo Jesús ndache ndo sen jitonchjeya ngeꞌe:

―Nchechrénta inda ichi jiꞌi.

Ko juincheꞌchré na̱ ichi inda. 8 Tjumeꞌe ndachro ndo Jesús:

―Tantsjenta nchíín inda ko tikuꞌunta inda ngajin xi tetuanꞌan kia.

Ko jaña juincheꞌe na̱. 9 Ko xi tetuanꞌan kia kuiꞌi xa nchíín inda ko ó tsikjan inda xranvino ko noeꞌa xa no kui̱xi̱n xran. Jeꞌo ni tochjeya ngeꞌe noꞌe na̱ ixi jeꞌe na̱ tsikantsje na̱ inda. Méxin, xi tetuanꞌan kia kuiyeꞌe xa xi kuteꞌe. 10 Ko ndache xa xi kuteꞌe:

―Kain na̱ saꞌó tajon na̱ xran ícha jian ko hora ni kui̱i̱ kia ó kuiꞌi na̱ yee xran, meꞌe tajonni xran ngixeko. Ko jaꞌa tsikatsian xran jian hasta jai.

11 Ngeꞌe tsijincheꞌe ndo Jesús tjajna Caná nunte Galilea, ña̱ saꞌó ngeꞌe juincheꞌe ndo ixi tsjako ndo juachaxien ndo, ko sen teyuu chrikao ndo kuitikaon sen ndo.

12 Mt. 4:13.*Ko kuatsinga jiꞌi, ikjui ndo tjajna Capernaum, ko janée ndo ko xikichuu ndo ko sen teyuu chrikao ndo, ko ntiꞌa bakeꞌe sen kaxin nchakon.

13 Ó tsi̱i̱ nchakon kia Pascua neꞌe ni judío, ndo Jesús sakjui ndo tjajna Jerusalén. 14 Ko ntiꞌa ngaxinꞌin niꞌngo jié kuitja ndo ni nchekji kuxinta, kutuchjon, kuntúá, ko ni ste nunte jitasingixin na̱ tomie chujni. 15 Ko hora bikon ndo Jesús jiꞌi, juinchéña ndo naa cuarta, ko bengixin ndo na̱ ntiꞌa ko kao kutuchjoen na̱ ko kuxinteꞌe na̱. Ko kuintjí ndo ngataꞌa nche tomie ni bakasingixin ko ndáꞌa banka ndo mesé na̱. 16 Ko jeꞌe ndo ndache ndo ni nchekji kuntúá:

―¡Tantsjexinnta kain ngeꞌe ntiꞌi! Nchéñaꞌinta ndoꞌa Ndotána xranchi naa ndasin.

17 Méxin, sen teyuu chrikao ndo xraxaon sen ngeꞌe ti ndachro xroon chijnie ndo Dio: “Tsango chjána juañao ngeꞌe ndakoꞌa tonꞌen ngaxinꞌin ndointa.”

18 Méxin ni judío juanchangiꞌe na̱ ndo:

―¿Ngeꞌe tjakoxian ixi chao sincheꞌe kain jiꞌi?

19 Mt. 26:61; 27:40; Mr. 14:58; 15:29.*Ko juatingíexin ndo Jesús:

―Tonchjejinnta niꞌngo jiꞌi ko nínxin nchakon sintakonchjian niꞌngo íjngo.

20 Ko ni judío ndache na̱ ndo:

―Yuukan ko ikjaon nano konchjianxin niꞌngo jiꞌi, ko, ¿á jaꞌa nínxin nchakon sinchekonchjianxian niꞌngo íjngo?

21 Ko ti niꞌngo nichja ndo Jesús meꞌe cuerpoe ndo. 22 Méxin, nchakon xechón ndo Jesús, sen teyuu chrikao ndo xraxaon sen ti ngeꞌe tsichronga ndo, ko kuitikaon sen xroen ndo Dio ko chijni tsindache ndo sen.

23 Nchakon ndo Jesús bakeꞌe ndo tjajna Jerusalén kia Pascua, itsjé na̱ kuitikaon na̱ ndo nchakon bikon na̱ ngeꞌe jian juincheꞌe ndo. 24 Ko ndo Jesús kuachúntiaꞌi ndo na̱ ixi chúxin ndo ngeꞌe xraxaon kain na̱, 25 ko baxrokondeꞌa ndo ixi naa chujni xrobekiꞌe ndo ngeꞌe juincheꞌe inaa chujni ixi jeꞌe ndo noꞌe ndo ngeꞌe xraxaon na̱ ngaya aséen na̱.