1 Jitatsinga ndo Jesús naa chaꞌo ko bikon ndo naa xi nchakon tsijongíexón xa tikonꞌa xa. 2 Ko sen chrikao ndo juanchangiꞌe sen ndo:

―Maestro, ¿sonda tsijongíexón xa tikonꞌa xa? ¿Á kondeexin jíee ndotée o̱ janée xa o̱ á jíeó xa?

3 Ko juateꞌe ndo Jesús, ndachro ndo:

―Jiꞌi jeꞌa jíee xa ko jeꞌa jíee ndotée ko janée xa. Jaña tsikonꞌen xa ixi ndo Dio tsjako juachaxien ndo. 4 Xratáanchakon xrokonda sintaꞌa ixra̱ tjaun ngisen tsixruanꞌanna. Ko ó tsi̱i̱ tiie ko xroꞌan ngisen chao sincheꞌe ixra̱. 5 Mt. 5:14; Jn. 8:12.*Xraritjén janꞌan ntiꞌi nunte xasintajni, janꞌan meꞌe xroꞌi tingasáñaxin nunte.

6 Ko juexin ndachro ndo jiꞌi, tjumeꞌe kuintjí ndo ndatée ndo nunte ko juinchéña ndo nchíín nchitaꞌo ko bingamá ndo nchitaꞌo meꞌe ikon xi tikonꞌa. 7 Ko kuetuenꞌen ndo xa:

―Itjia tuye tjiá inda ndatinꞌin Siloé ko tontia inda ikuan. (Ko Siloé xrondachro ngigueꞌe na̱, tsixruaꞌan.)

Ko sakjui xi tikonꞌa, konti xa inda ikon xa, ko hora ikjan xa ó chao tikon xa. 8 Ko ni ndoꞌa tjenka ndoꞌa xa ko ni bakikon ixi tikonꞌa xa, ndachro na̱:

―¿Á jeꞌa xi jiꞌi batjanchiakaꞌa?

9 Ko ikaxin na̱ ndachro na̱:

―Jaán, jeꞌe xa.

Ko ikaxin na̱ ndachro na̱:

―Naꞌi, jeꞌa xa. Jeꞌo tikonni xa xranchi xi meꞌe.

Ko jeꞌe xa juatingíexin xa:

―Jaán, janꞌanna.

10 Méxin, juanchangiꞌe na̱ xa:

―¿Xranchi jai chao tikuan?

11 Ko juatingíexin xa:

―Naa ndo ndatinꞌin Jesús juinchéña ndo nchitaꞌo bingamá ndo ikon ko tjumeꞌe kuetuanna ndo itsji ti jii pila jitjiá inda nchekinꞌin na̱ Siloé ko tsonti inda ikon. Ko ikjui konti inda, ko tuinxin biko̱n.

12 Ko juanchangiꞌe na̱ xa:

―¿No jii xi meꞌe?

Ko juateꞌe xa:

―Nónaꞌi.

13 Ko jeꞌe na̱ sabikao na̱ xi batikonꞌa ngajin ni fariseo. 14 Ko nchakon tjokéꞌe na̱ tsijinchekonchjian ndo Jesús nchitaꞌo ko juinchexruenꞌen ndo xi batikonꞌa. 15 Méxin, ni fariseo juanchangiꞌe na̱ xa íjngo xranchi koxruenꞌen xa ko chao tikon xa jai. Ko jeꞌe xa ndachro xa:

―Juinchéña ndo chitaꞌo bingamá ndo ikon, ko konti inda ikon, ko jai chao tiko̱n.

16 Ko kaxin ni fariseo ndachro na̱:

―Xi juincheꞌe jiꞌi, jeꞌa chujnie ndo Dio xa ixi chóndaꞌi xa juasaya nchakon tjokéꞌeni.

Ko ikaxin na̱ ndachro na̱:

―¿Xranchi ncheꞌe xa ixra̱ ijié siá chónda xa ijie̱?

Ko jaña jeꞌa xrajeꞌo xraxaon na̱. 17 Tjumeꞌe juanchangiꞌe na̱ xi batikonꞌa íjngo:

―¿Jaꞌa ngeꞌe ndachrua ixi xi juintaxruanꞌan?

Ko jeꞌe xa ndachro xa:

―Janꞌan ndachrja̱n ixi jeꞌe ndo naa ngisen nichja chijnie ndo Dio.

18 Ko ni judío kuitikaonꞌa na̱ ixi nduaxin batikonꞌa xa ko jai chao tikon xa. Méxin, kuiyeꞌe na̱ ndotée ko janée xi tsikoxruenꞌen, 19 ko juanchangiꞌe na̱ sen:

―¿Á jiꞌi chjanꞌanta, jaꞌanta ndachronta ixi ti jongíexón xa tikonꞌa xa? ¿Ko xranchi jai chao tikon xa?

20 Ko juatingíexin ndotée ko janée xa:

―Nónana ixi xi jiꞌi chjanꞌna̱na ko nónana ixi nchakon jongíꞌe xa tikonꞌa xa. 21 Ko nónaꞌi na̱ xranchi tikon xa jai ko nónaꞌi na̱ ngisen juinchexruenꞌen xa. Tjanchangíꞌenta xa, ó jié xa ko jeꞌe xa xrochronga xa xranchi koxruenꞌen xa.

22 Jaña juatingíexin ndotée ko janée xa ixi xrakonꞌen na̱ ni judío, ixi jeꞌe na̱ tsindachro na̱ ixi tsantsjexin na̱ niꞌngo chujni titikaon ndo Jesús ndo Cristo. 23 Méxin, ndachro ndotée ko janée xa: “Tjanchangíꞌenta xa ixi ó ijié xa.”

24 Ko ni judío íjngo kuiyeꞌe na̱ xi batikonꞌa ko ndache na̱ xa:

―Ndako chronga ngajinxin*ngajinxin delante de ikon ndo Dio ixi ó nónana ixi xi meꞌe ndakoꞌa ncheꞌe xa.

25 Ko xi batikonꞌa juatingíexin xa:

―Nónaꞌi á chónda ndo ijie̱ o̱ naꞌi. Naakua ngeꞌe nóna ixi saꞌó batikonꞌa ko jai ó tiko̱n.

26 Ko juanchangiꞌe na̱ xa íjngo:

―¿Xranchi juincheꞌe xa ixi juinchexruanꞌan xa?

27 Ko juatingíexin xa:

―Juexin ntatjunta ko titikaonꞌanta. ¿Sonda tjaunnta íjngo xrondachrja̱n? ¿Á kaxonnta tjaunnta xroruéꞌenta ndo?

28 Ko koyakuꞌe na̱ xa ko ndachro na̱:

―Jaꞌa rueꞌé xi meꞌe. Ko janꞌanna titikaꞌonna ngeꞌe kuetuanꞌan ndo Moisés. 29 Janꞌanna nónana ixi ndo Dio nichjeꞌe ndo ndo Moisés. A̱ xi meꞌe, nónaꞌina no tsiki̱ꞌxi̱n xa.

30 Ko juateꞌe xa ko ndachro xa:

―Tsango jée jiꞌi. Ndo meꞌe juinchexruanna ndo ko chao tiko̱n ko jaꞌanta noaꞌinta no tsiki̱ꞌxi̱n ndo. 31 Nónana ixi ndo Dio tienꞌa ndo ngeꞌe tjanchia chujni chónda ijie̱. Jeꞌo tinꞌen ndo ngeꞌe tjanchia sen titikaon ndo, ko sen titikaon ngeꞌe tjaun ndo. 32 Ko naiꞌa kuinꞌanna ixi naa ngisen nchexruenꞌen naa chujni xratsijongíexión tikonꞌa. 33 Ko ndo meꞌe, siá xrokui̱xi̱nꞌa ndo ti jii ndo Dio, xroꞌan ngeꞌe jian xrojuincheꞌe ndo.

34 Ko juateꞌe ni fariseo ko ndachro na̱:

―Jaꞌa kueya ijie̱ chonda nchakon jongíꞌa. Ko jai, ¿á tjauan ixi jaꞌa tsjakoꞌna̱na?

Ko bengixin na̱ xa niꞌngo.

35 Ndo Jesús konoꞌe ndo ixi jaña juinchekao ni judío xi batikonꞌa ti bantsjexinna xa niꞌngo. Ko kuetan ndo Jesús xi meꞌe ko juanchangiꞌe ndo xa:

―¿Á chuntia Chjenꞌen ndo Dio, xjan jongíꞌe xranchi chujni?

36 Ko ndachro xa:

―Ncháina, ndachijiana ngisen meꞌe ixi xrochu̱ntia ndo.

37 Ko juateꞌe ndo Jesús:

―Ó bikuan ndo. Meꞌe ndo ritjáoa.

38 Ko xi meꞌe bakeꞌexin ntatuchiꞌin xa tutée ndo Jesús, ko ndachro xa:

―Jai chuntia, Ncháina.

39 Ko ndachro ndo Jesús:

―Janꞌan juiꞌi nunte xasintajni ixi sintaꞌa ijie̱ ngajin chujni, ixi ni tikonꞌa, tsikon na̱, ko ni tikon, tsikonꞌa na̱.

40 Ko kaxin ni fariseo ste ntiꞌa kuinꞌen na̱ jaña ndachro ndo Jesús ko juanchangiꞌe na̱ ndo:

―¿Á kaxon janꞌanna tikonꞌana?

41 Ko juatingíexin ndo Jesús:

―Jaꞌanta siá nduaxin xrobikonꞌanta, xrochondaꞌinta ijie̱. Ko na̱ ndachronta tikonnta, meꞌe chondanta ijie̱.