1 Tjumeꞌe ndachro ndo Jesús:

―Nduaxin ntatjunta: ni tsixinꞌa nta̱chja tijexin kutuchjon, ko tixixin na̱ nango; ni meꞌe ncheꞌe na̱ xranchi naa xicheꞌe ko naa ni ndakoꞌa ncheꞌe. 2 Ko ngisen tixixin nta̱chja, sen meꞌe nduaxin sen tsjeꞌe kutuchjon. 3 Ko sen tendáa nta̱chja tantjeꞌe sen nta̱chja ixi tixinꞌin sen nduaxin tsjeꞌe ba, ko kutuchjon chúxin ba tée sen. Ko tiyeꞌe sen ngujngu kutuchjon ixi xranchi tinꞌin ba ko tantsjexin sen ba ndoꞌa ba. 4 Ko juexin tachrje kain ba, titaonꞌen sen ba chaꞌo ko ruéꞌe ba ixi chúxin ba tée sen. 5 Ko rueꞌa ba inaa ngisen chúxinꞌa ba; cháña satinga ba ixi chúxinꞌa ba tée jeꞌe na̱.

6 Jaña juako ndo Jesús chijni jiꞌi, ko jeꞌe na̱ kuienxinꞌa na̱ ngeꞌe ndachro ndo.

7 Tjumeꞌe ndachro ndo Jesús íjngo:

―Nduaxin ndachrja̱n ixi janꞌan nta̱chja meꞌe tixixin kutuchjon. 8 Kain ni kui̱i̱ ti xratiꞌa janꞌan, ni meꞌe xicheꞌe ko ni te̱e. Ko kutuchjon kuitikaonꞌa ba na̱. 9 Janꞌan nta̱chja meꞌe: siá tixinxinnta janꞌan, tsitjáñaꞌinta ko xrokjannta xranchi kutuchjonna tsachrjexin ba ti jijeꞌe̱ ba ko tixinꞌin ba ko titja ba ngeꞌe ine ba.

10 ’Ko xicheꞌe jeꞌo ti̱i̱ xa ixi tjaun xa tse̱e̱ xa, ko tsóña xa, ko nchetjáñajin xa kain ngeꞌe. Ko janꞌan juiꞌi ixi tsaricho̱nnta kain nchakon ko xroꞌan ngeꞌe tsitjáñaꞌanta. 11 Janꞌan naa ngisen jian tsjeꞌe kutuchjon, ko sen jian meꞌe tsenxin sen ixi kutuchjoen. 12 Ko ngisen jeꞌo ncheꞌe ixra̱ jeꞌo tjaun na̱ tsjacha na̱; tikon na̱ jiti̱i̱ naa kundanixra tintuꞌe na̱ kutuchjon ko satsji na̱ ixi jeꞌe na̱ jeꞌa ngisen nduaxin tsjeꞌe kutuchjon ko jeꞌa kutuchjoen na̱. Ko kundanixra xrotsé ba kutuchjon ko ikaxin kutuchjon satsinga ba, xrochjekeꞌe ba. 13 Ko ni meꞌe satsinga na̱ ixi jeꞌo tjaun na̱ tsjengeꞌe na̱ na̱ ꞌna̱ ko taꞌi na̱ juachjaon ixi kutuchjon tsjeꞌe na̱.

14-15 Mt. 11:27; Lc. 10:22.*’Ko janꞌan naa sen jian tsjeꞌe kutuchjon. Ko xranchi Ndotána chúxin na̱ ndo, kaxon janꞌan chuxin ndo. Jaña chuxin janꞌan kutuchjonna ko jeꞌe ba chúxinna ba. Ko janꞌan tsenxin ixi kutuchjonna. 16 Kaxon janꞌan chonda ikaxin kutuchjon xra jeꞌa ntiꞌi ste ba ko xrokonda tsikian ba. Ko siá jeꞌe ba tsinꞌen ba ti nichja janꞌan, tsoña̱ naakua no tsintee ba ko naakua ngisen xrotsjeꞌe ba.

17 ’Ndotána tjaunna ndo ixi maski tsenꞌén, xroxechónna íjngo. 18 Xroꞌan ngisen tsantsjena ti rícho̱n, janꞌon tajon aséenna tsenꞌen ixi jaña tjaꞌon. Chonda juachaxin tsajon aséenna ko chonda juachaxin xroxechónna íjngo. Jiꞌi kuetuanna Ndotána.

19 Hora kuinꞌen ni judío ti ndachro ndo Jesús, kuaxi na̱ chjeyeꞌe na̱ íjngo. 20 Kueya na̱ ndachro na̱:

―¿Sonda tinꞌenna ingeꞌe ndachro xa? Jeꞌe xa chónda xa espíritue Xixronꞌanxrée ko xraxaonꞌa xa jian.

21 Ko ikaxin na̱ ndachro na̱:

―Ninaa chujni chónda espíritu ñaꞌi nichja jaña. ¿Á chao naa espíritue Xixronꞌanxrée xrokuajon juachaxin ixi naa ngisen tikonꞌa, chao tsikon?

22 Ko ó nchakuen ikin, tjajna Jerusalén stencheꞌe na̱ kia xraxaonxin na̱ nchakon juexin tsikoña niꞌngo. 23 Ko ndo Jesús jitji ndo ti ndasin ndatinꞌin Salomón, naa ndasin niꞌngo. 24 Ko ni judío kondentájin na̱ ndo Jesús ko juanchangiꞌe na̱ ndo:

―Stechonꞌanna tsonónana ngisen jaꞌa. Jai chronga nduaxin á jaꞌa ndo Cristo.

25 Ko juatingíexin ndo Jesús:

―Ó ntatjunta ko titikaonꞌanta. Kain ixra̱ ntaꞌa, juachaxien Ndotána ntaꞌaxin ixra̱; ko jiꞌi tjakoxin ngisen janꞌan. 26 Ko titikaonꞌanta ixi jeꞌa kutuchjonna jaꞌanta xranchi ntatjunta saꞌó. 27 Kutuchjonna chúxin ba taana ko kaxon janꞌan chuxin ba ko jeꞌe ba ruaꞌna ba. 28 Janꞌan tjáꞌa ba juachaxin tsechón ba kain nchakon ko naiꞌa tsitjáña ba ko xroꞌan ngisen tsantsjexin ba ngaya tjáana. 29 Ndotána chjána ndo ba, ndo ícha tetuanꞌan ngajin kainna, ko xroꞌan ngisen tsantsjexin ba itja ndo. 30 Janꞌan ko Ndotána naakua ngisenna.

31 Ko ni judío íjngo itsé na̱ ixro xrojuangeꞌe na̱ ndo. 32 Ko ndachro ndo Jesús:

―Kueya ngeꞌe jian bikonta juintaꞌa ixi juachaxien Ndotána. ¿Sonda tjaunnta tsóñaxinntana ixro ixi juintaꞌa kain meꞌe?

33 Ko juateꞌe ni judío:

―Jeꞌa ixi kain ngeꞌe jian juincheꞌe tsaaxianna ixro. Naꞌi. Ixi ngeꞌe ndakoꞌa ndachrua, jaꞌa xrajeꞌo xranchi inaa chujni, ko jaꞌa ndachrua xixian ndo Dio.

34 Ko ndachro ndo Jesús:

―Ndachro xroon chijnie ndo Dio tsikjin sen saꞌó: “Kaxon xranchi ndo Dio jaꞌanta.” 35 Ko noi̱na ixi ngeꞌe ndachro xroon chijnie ndo Dio, juaꞌi tsitikaonꞌana. Ndachro ndo Dio ixi xranchi ndo Dio ngujngu chujni kuayéꞌe chijnie ndo. 36 Ko ndo Dio kuincheꞌena ko xruanꞌanna ndo nunte xasintajni, ¿sonda ndachronta ixi janꞌan nichjangíꞌa ndo Dio ixi ndachrja̱n janꞌan Chjenꞌen ndo? 37 Siá janꞌan xrojuintaꞌi ixra̱ ncheꞌe Ndotána, titikaonꞌantana. 38 Ko siá nduaxin ntaꞌa ixra̱ ncheꞌe Ndotána, maski titikaonꞌantana janꞌan, titikaonnta ixra̱ ntaꞌa ixi ña̱ tsitikaonxinnta ixi Ndotána ko janꞌan naakuana ko jeꞌe ndo jii ndo ngajin ko janꞌan ritjén ngajin ndo.

39 Ko íjngo xrotsé na̱ ndo Jesús xrobijeꞌe̱ na̱ ndo ko jeꞌe ndo sakjui ndo.

40 Jn. 1:28.*Ko ndo Jesús ikjan ndo íjngo tuenxin ndarío Jordán ti no bakeꞌe ndo Juan batikitéxin ndo chujni saꞌó. 41 Ko kueya na̱ ruéꞌe na̱ ndo ko ndachro na̱:

―Nduaxin ndo Juan maski juincheꞌa ndo itsjé ixra̱ ijié, nduaxin chronga ndo ixi xi jiꞌi.

42 Ko kueya na̱ jii ntiꞌa kuitikaon na̱ ndo Jesús.