1 Juexin ndachro ndo Jesús kain jiꞌi, tjumeꞌe kuachrjenkaꞌo ndo sen chrikao ndo ko sakjui sen kuatu inda Cedrón. Ntiꞌa jii naa ijngi ko ntiꞌa ikjui ndo Jesús ko sen chrikao ndo. 2 Kaxon xi Judas, xi juinchekji ndo Jesús, chúxin xa ijngi meꞌe ixi ntiꞌa itsjé nchakon baxraka sen chrikao ndo Jesús ko kao jeꞌe ndo. 3 Méxin, xi Judas bikaꞌo xa kueya xi soldado ko kaxin xi policía ncheꞌe xra̱ niꞌngo tsixruaꞌan xitaana tetuanꞌan ko xi fariseo. Kuijikao na̱ chika ko xroꞌi tingasáñaxin. 4 Ko ndo Jesús ó noꞌe ndo kain ngeꞌe xrokonꞌen ndo, ko konchjiñeꞌe ndo ngajin na̱ ko juanchangiꞌe ndo na̱:

―¿Ngisen tjéenta?

5 Ko juateꞌe na̱:

―Tjéena xi Jesús, xi tjajna Nazaret.

Ko juateꞌe ndo Jesús:

―Janꞌanna.

Ko xi Judas, xi tsijinchekji ndo, ntiꞌa jikao xa na̱. 6 Ko hora ndachro ndo Jesús: “Janꞌanna”, jeꞌe na̱ xronka na̱ ko ngaxiton na̱ kuitsinga na̱ nunte. 7 Ko íjngo ikjan ndo Jesús juanchangiꞌe ndo na̱:

―¿Ngisen tjéenta?

Ko jeꞌe na̱ ndachro na̱:

―Tjéena xi Jesús, xi tjajna Nazaret.

8 Ko ndachro ndo Jesús:

―Ntatjunta janꞌan ngisen tjéenta. Ko siá janꞌan ngisen tjéenta, tintuꞌenta satsji sen chrjikiꞌan.

9 Jaña ndachro ndo Jesús ixi xrokonda tsonꞌen ti ngeꞌe tsindachro ndo: “Sen chjána Ndotána, xroꞌan ngisen tsitjáña.” 10 Ko ndo Simón Pedro kuantsje ndo naa chika espada konchrijinxin ndo ndatsjon naa xi, ndatsjon xa ti jian, xi meꞌe ndatinꞌin xa Malco, xinchexrée xitaana tetuanꞌan. 11 Mt. 26:39; Mr. 14:36; Lc. 22:42.*Ko ndo Jesús ndache ndo ndo Pedro:

―Xraxiꞌian chika espada ña̱. Siá Ndotána kuetuanꞌan ixi tangi tsatsinga, xrokonda tsatsinga janꞌan kain jiꞌi.

12 Tjumeꞌe xi soldado ko xi tetuenꞌen xa ko xi policía judío ncheꞌe xra̱ niꞌngo itsé xa ndo Jesús ko kuintee xa ndo. 13 Ko sabikao xa ndo ndoꞌa xi Anás, a̱ xi Anás xichée xi Caifás, ngisen nano meꞌe tituenꞌen xitaana. 14 Jn. 11:49, 50.*Ko xi Caifás, xrajeꞌo jeꞌe xa tsindache ni judío ixi ícha jian naakua naa chujni xrokuenxin ixi tjajnée na̱.

15 Ndo Simón Pedro ko inaa ndo bakajikao ndo Jesús steruéꞌe sen ndo. A̱ ndo inaa ó chúxin ndo xitaana tituanꞌan. Méxin, kaxon kuixinꞌin ndo no kuixinꞌin ndo Jesús, ngaxinꞌin ndasin ndoꞌa xitaana tituanꞌan. 16 Ko ndo Pedro kuituꞌe ndo nduja ti nta̱chja. Ko ndo chúxin xitaana tituanꞌan kuachrje ndo ko nichjeꞌe ndo nchri tendáa nta̱chja ko kuajon nchra juachaxin kuixinꞌin ndo Pedro. 17 Tjumeꞌe nchri tendáa nta̱chja juanchangiꞌe nchra ndo Pedro:

―¿Á kaxon jaꞌa chrikuꞌa xi ña̱?

Ko juateꞌe ndo Pedro ndachro ndo:

―Naꞌi, janꞌan naꞌi.

18 Ko ntiꞌa tsango ikin ko xi ncheꞌe ixra̱ ko xi policía juaaka xa naa xroꞌi ntiꞌa ko siin xa stexraxruꞌe xa. Kaxon ndo Pedro jixraxruꞌe ndo ntiꞌa.

19 Ko xitaana tetuanꞌan juangíxin xa juanchangiꞌe xa ndo Jesús ngisen sen chrikao ndo ko ngeꞌe tjako ndo. 20 Ko juateꞌe ndo Jesús:

―Janꞌan nichja ngajinxin ikon kain ni nunte xasintajni, ko bajako ngaxinꞌin nchia ko ngaxinꞌin niꞌngo ti no baxraꞌo kain ni judío. Ko xroꞌan ngeꞌe ndachrja̱n imao. 21 ¿Sonda tjanchangina̱na? Tjanchangíꞌe ni kuinꞌen xranchi tjako. Jeꞌe na̱ noꞌe na̱ ngeꞌe ndachrja̱n.

22 Juexin ndachro ndo Jesús jiꞌi, tjumeꞌe naa xi policía ncheꞌe xra̱ niꞌngo, jindaxin xa ntiꞌa, kuandeꞌe xa naa ito̱n ikon ndo Jesús ko ndachro xa:

―¿Á jaña tjateꞌé ngajin xi tituenꞌen xitaana?

23 Ko juateꞌe ndo Jesús:

―Siá ndakoꞌa ndachrja̱n naa ngeꞌe, ndachijiana ngeꞌe ndakoꞌa ndachrja̱n, ko siá ndako ngeꞌe ndachrja̱n, ¿sonda konꞌiana?

24 Tjumeꞌe xi Anás xruanꞌan xa ndo Jesús jixriteꞌe ndo ngajin xi Caifás, xitaana tetuanꞌan.

25 Ko ndo Pedro xrasiin ndo ntiꞌa jixraxruꞌe ndo, ndache na̱ ndo:

―¿Á kaxon jaꞌa chrikuꞌa xi ña̱?

Ko ndo Pedro ndachro ndo chúxinꞌa ndo ndo Jesús, méxin, jaꞌin juateꞌe ndo:

―Naꞌi, janꞌan naꞌi.

26 Tjumeꞌe naa xi ncheꞌe xrée xitaana tetuanꞌan, xi meꞌe xrakichuu xa xi tsikonchrijin ndo Pedro ndatsjon, juanchangi xa:

―¿Á jeꞌa jaꞌa bikon rikuꞌa xa ti jii ijngi chónda lahuerta?

27 Ko ndo Pedro ndachro ndo íjngo jeꞌa ndo. Ko tuinxin itsje̱ naa kuntaxichíká.

28 Kuachrjexin na̱ ndoꞌa xi Caifás, sabikao na̱ ndo Jesús ti nchia ijié tetuanxin xi gobernador. Ko ó kuaxi jitingasáña ko ni judío kuixinꞌa na̱ nchia meꞌe ixi jaña xrokuamaꞌi na̱ ijie̱, ne̱ juaꞌi sine na̱ kia Pascua. 29 Tjumeꞌe xi Pilato kuachrjexin xa nchia tetuanꞌan na̱, juanchangiꞌe xa na̱:

―¿Ngeꞌe ijie̱ chónda xi jiꞌi?

30 Ko jeꞌe na̱ juateꞌe na̱:

―Siá jeꞌa ndakoꞌa juincheꞌe xa, xrobikianꞌina xi ntiꞌi.

31 Ko ndache xi Pilato na̱:

―Satikuꞌunta xa, nchéñeꞌenta xa ijie̱ xranchi jitaxin ley naꞌanta.

Ko juateꞌe ni judío:

―Janꞌanna judíona chondaꞌina juachaxin naatsóñaxónna naa ngisen.

32 Jn. 3:14; 12:32.*Jaña konꞌen xranchi tsindachro ndo Jesús xranchi tsenꞌen ndo. 33 Tjumeꞌe xi Pilato íjngo kuixinꞌin xa nchia tetuanxin xa ko kuiyeꞌe xa ndo Jesús ko juanchangiꞌe xa ndo:

―¿Á jaꞌa xi Rey tetuenꞌen ni judío?

34 Ko ndachro ndo Jesús:

―Ti ngeꞌe tjanchangina̱na, ¿á jaꞌua xraxaoan jaña?, o̱, ¿á ixi inaa na̱ jaña ndachro na̱?

35 Ko juateꞌe xi Pilato:

―¿Á janꞌan judíona? Ni tjajnáa ko xitaana tetuanꞌan bikaan na̱ ngajin. ¿Ngeꞌe juincheꞌe?

36 Ko juateꞌe ndo Jesús:

―Juachaxin chónda janꞌan jeꞌa kui̱xi̱n nunte xasintajni. Siá xrokui̱ꞌxi̱n nunte xasintajni, sen chrjikiꞌan xrojuincheꞌe sen ngeꞌe ixi xrotséꞌana ni judío ko juachaxin chónda janꞌan, jeꞌa juachaxin nunte xasintajni.

37 Ko ndachro xi Pilato:

―Jaꞌa, ¿á nduaxin naa xi rey?

Ko juateꞌe ndo Jesús:

―Jaán, janꞌan rey xranchi jaꞌa ndachrua. Janꞌan juiꞌi nunte xasintajni ixi xronichja ti nduaxin. Kain sen titikaon ngeꞌe nduaxin, sen meꞌe tinꞌen ngeꞌe tjako.

38 Ko ndachro xi Pilato:

―¿Ngeꞌe nduaxin ndako, ndachrua?

Ko juexin juanchangi xi Pilato jiꞌi, tjumeꞌe kuachrje xa ko ikjui xa ti ste ni judío, ko ndache xa na̱:

―Kuitjaꞌi ninaa ijie̱ ngajin xi jiꞌi. 39 Ko jaꞌanta ó xrakuanꞌanta ixi kia pascua tajanda naa chujni jijeꞌe̱. ¿Á tjaunnta tsajanda xi Rey tetuenꞌen ni judío?

40 Ko kain na̱ kuyako na̱ ndachro na̱:

―Xi ña̱ naꞌi. Tajanda xi Barrabás.

Ko xi Barrabás naa xicheꞌe meꞌe.