1 Tjumeꞌe xi Pilato kuetuanꞌan xa ixi tsjaya na̱ ngajin ndo Jesús. 2 Ko ni soldado juinchéña na̱ ixi nta̱chaꞌa naa corona ko bakeꞌe na̱ ngataꞌa jaa ndo Jesús. Ko juinchekeya na̱ ndo naa manta tiie játse. 3 Ko konchjiñeꞌe na̱ ti jii ndo, ko ndachro na̱:

―Tsechón ndo rey tetuenꞌen ni judío.

Ko juanoa na̱ ndo. Ko itja na̱ kuandexin na̱ ikon ndo.

4 Ko xi Pilato íjngo kuachrjexin xa nchia tetuanxin xa, ko ndache xa ni tsixraꞌo ntiꞌa:

―Tsjeꞌenta, tsantsje xa ixi tsienxinnta ixi kuitjaꞌi ninaa ngeꞌe ndakoꞌa juincheꞌe xa.

5 Ko kuachrjexin ndo Jesús ntiꞌa jitikao ndo ngataꞌa jaa ndo corona tsikoña nta̱chaꞌa ko jitsáa ndo manta tiie játse. Ko ndachro xi Pilato:

―Tsjeꞌenta, ntiꞌi jii xa.

6 Ko nchakon bikon ni taana tetuanꞌan ko ni policía neꞌe niꞌngo juangíxin na̱ kuyako na̱:

―¡Tjankanitua xa nta̱cru! ¡Tjankanitua xa nta̱cru!

Ko ndachro xi Pilato:

―Jaꞌanta tikuꞌunta xa ko tankanitonta xa nta̱cru ixi janꞌan kuitjaꞌi ninaa ngeꞌe ndakoꞌa ngajin xa.

7 Ko juateꞌe ni judío:

―Janꞌanna chondana naa ley xrokonda tsenꞌen xa ixi ndachro xa ixi Chjenꞌen ndo Dio jeꞌe xa.

8 Ko nchakon kuinꞌen xi Pilato jiꞌi ícha xronka xa. 9 Tjumeꞌe íjngo kuixinꞌin xa nchia tetuanxin xa ko juanchangiꞌe xa ndo Jesús:

―¿No juixian?

Ko ndo Jesús xroꞌan ngeꞌe juateꞌe ndo.

10 Ko ndachro xi Pilato:

―¿Sonda tjate̱eꞌa? ¿Á noaꞌia ixi janꞌan chonda juachaxin tsetuanꞌan na̱ tankanitua na̱ nta̱cru o̱ kaxon chonda juachaxin tsajanda satsjia ko xroꞌan ngeꞌe tsonꞌan?

11 Ko juateꞌe ndo Jesús:

―Xroꞌan juachaxin chónda jaꞌa siá jeꞌa Ndotána Dio xrotjáa ndo juachaxin. Ko chujni bikaana ntiꞌi ícha ijie̱ chónda na̱ ixi jaꞌa.

12 Ko kuinꞌen xi Pilato jiꞌi, tjumeꞌe juangíxin xa juée xa xranchi xrobajanda xa ndo Jesús. Ko ni judío kuyako na̱ ndachro na̱:

―Siá tsintuꞌé satsji xa, jaꞌa jeꞌa tjentua xi tetuenꞌen tjajnai̱na. Ngisen nchéña aséen xranchi naa rey, ni meꞌe ningakonꞌen xa xi tituai̱nna. 13 Kuinꞌen xi Pilato jiꞌi, tjumeꞌe sabikao xa ndo Jesús nduja ko bakeꞌe xa nunte ti no nchéñaxin na̱ ijie̱ ko kaxon nchekinꞌin na̱ ti kueya ixro ko ngigua aremeo xrondachro Gabatá. 14 Nchakon meꞌe naa nchakon saꞌó kia Pascua, ko ó xrochjée ngusine nchakon ko xi Pilato ndache xa ni judío:

―Ntiꞌi jii xi rey tetuanꞌannta.

15 Ko jeꞌe na̱ kuyako na̱ ndachro na̱:

―Tsachrje xa, tsachrje xa. Tankanitua xa nta̱cru.

Ko xi Pilato ndachro xa:

―¿Á tjaunnta tsjankanito xa nta̱cru xi rey tituanꞌannta?

Ko jeꞌe na̱ juateꞌe na̱:

―Xroꞌan xi rey chondana, jeꞌo xi César tituanꞌan.

16 Méxin, xi Pilato kuajon xa ndo Jesús ngajin ni judío ko sabikao na̱ ndo tsjankanito na̱ ndo nta̱cru.

17 Jaña ndo Jesús kuachrjexin ndo ntiꞌa yama ndo nta̱cru ti no tsjankanito na̱ ndo, noxon chaꞌo itji ti no tinꞌin ntajaa chujni ko ngigua arameo xrondachro Gólgota. 18 Ntiꞌa juankanito na̱ ndo nta̱cru, ko kaxon íjngo yuu xi, naa xi bakeꞌe xa ndatsjonxin jian ko inaa xa ndatsjonxin kjon ko ngusine bakeꞌe na̱ ndo Jesús. 19 Ko kuetuanꞌan xi Pilato xrokjin na̱ ngataꞌa naa nta̱a̱ ko tsakeꞌe na̱ ti noi nta̱cru ko xrondachro nta̱a̱:

―Kjinꞌa jaꞌa jeꞌe xa “xi Rey tetuenꞌen ni judío”; cháña ikjian “Jeꞌe xa ndachro xa ixi jeꞌe xa xi Rey tetuenꞌen ni judío.”

22 Ko juateꞌe xi Pilato:

―Ti kuetuanꞌan xrokjin na̱ ó juexin kóña, ko jaña tsituꞌe.

23 Tjumeꞌe ni soldado, hora juexin bakeꞌe na̱ ndo Jesús nganito nta̱cru, kua na̱ mantée ndo Jesús, konchjeya na̱ manta ko noó juinchéña na̱ manta nanaá mantée na̱. Ko kaxon kua na̱ manta jine̱ jiá ndo. Manta meꞌe tsixraunꞌa manta, naakua manta tsikoña meꞌe. 24 Ko ni soldado juao kichuu na̱ ndachro na̱:

―Xrochjeyaꞌina manta jiꞌi. Ícha jian xrosondaoxinna ixro ixi jaña tsonoi̱na ngisen tsjacha manta.

Jaña konꞌen xranchi ndachro xroon chijnie ndo Dio tsikjin sen saꞌó: “Sondaonxin na̱ ixro ko jaña chjeyeꞌe na̱ mantána.” Jaña juincheꞌe ni soldado.

25 Ko tjenka nta̱cru ti no jinito ndo Jesús bakeꞌe janée ndo ko jan kichuu jan, jan María, janchriꞌe ndo Cleofas ko jan María Magdalena. 26 Ko nchakon bikon ndo Jesús janée ndo ko tjenka jan jii ndo chrikao ndo, ndo ícha tjueꞌe ndo, ndache ndo janée ndo:

―Tsjeꞌé ntiꞌi jii chjanꞌan.

27 Ko tjumeꞌe nichjeꞌe ndo Jesús ndo bajikao ndo, ndo jii tjenka jan, ko ndachro ndo:

―Ntiꞌi jii janáa.

Ko ndo meꞌe kuayéꞌe ndo jan, sabikao ndo jan ndoꞌa ndo ko jeꞌe jan ikjan jan xranchi janée ndo.

28 Ó noꞌe ndo Jesús ixi kain ixra̱ ó juexin juincheꞌe ndo ko xrokonda tsonꞌen ngeꞌe jitaxin xroon ko ndachro ndo:

―Kuenꞌenna inda.

29 Ko ntiꞌa jii naa chikute jitjiá xran tsjá ko jeꞌe na̱ juinchetjao na̱ naa tuꞌo manta kuintsiá na̱ naa nta̱a̱ ko bakeꞌe na̱ tjenka roꞌa ndo. 30 Ko ndo Jesús kuiꞌi ndo xran tsjá ko ndachro ndo:

―Ó juexin juintaꞌa kain ngeꞌe kuituanna.

Tjumeꞌe kuisée jaa ndo ko kuajon ndo espíritue ndo ko ndakuenꞌen ndo. 31 Nchakon meꞌe naa nchakon saꞌó kia Pascua, méxin, ni judío tjaunꞌa na̱ xrokuituꞌe cuerpoe ni tsikenꞌen nganito nta̱cru nchakon tjokéꞌe na̱, ixi nchakon meꞌe naa nchakon ijié. Méxin, juancheꞌe na̱ xi Pilato tsondaki na̱ tutée ni kuenꞌen nganito nta̱cru ko satsikaoxin na̱ ntiꞌa cuerpoe ni meꞌe. 32 Ko ni soldado ikjui na̱ ko kondaki na̱ tutée naa xi ko kao tutée xi yuxin juankanito na̱ nta̱cru tjenka ndo Jesús. 33 Ko hora kuiji na̱ tjenka ndo Jesús ko bikon na̱ ó tsikenꞌen ndo, kondakiꞌa na̱ tutée ndo. 34 Ko naa xi soldado kuantjeꞌe xa ndatsjonxin ntakuin ndo Jesús ixi naa chika ko tuinxin chrinka ijni̱ ko inda. 35 Méxin, janꞌan rikjin xroon ixi bakeꞌé ntiꞌa, bikon ixi jaña konꞌen ko ndachrja̱n ti nduaxin ixi jaꞌanta kaxon tsitikaonnta. 36 Jaña konꞌen jiꞌi ixi tsonꞌen ngeꞌe ndachro xroon chijnie ndo Dio tsikjin sen: “Tsondakiꞌa na̱ ninaa nteꞌe ndo.” 37 Ap. 1:7.*Kaxon íjngo nichja xroon chijnie ndo Dio tsikjin na̱ saꞌó ndachro: “Xrotsjeꞌe na̱ ndo juinchekatsingatoꞌe na̱ chika ndatsjonxin ntakuin ndo.”

38 Tjumeꞌe ó juexin konꞌen kain jiꞌi, ko ndo José, naa ndo tjajna Arimatea, juanchia ndo ngajin xi Pilato juachaxin ixi tsakinjinxin ndo nta̱cru cuerpoe ndo Jesús ko satsikao ndo ndo xroxrabaa ndo. Jeꞌe ndo José imao ruéꞌe ndo ndo Jesús ixi xrakonꞌen ndo ni judío. Tjumeꞌe xi Pilato kuajon xa juachaxin ko sabikao ndo José cuerpoe ndo Jesús. 39 Jn. 3:1, 2.*Kaxon ndo Nicodemo, ndo meꞌe bikitsjeꞌe ndo Jesús naa tiie, a̱ nchakon xroxrabaa ndo Jesús bikaꞌo ndo níite kilo xro̱a̱n xraxe tsintekjan xro̱a̱n mirra ko xro̱a̱n áloe. 40 Jaña ndo José ko ndo Nicodemo kuayéꞌe sen cuerpoe ndo Jesús, juinchekitsa sen ndo naa manta jine̱ tsikaa xro̱a̱n xraxe ixi jaña bakitikaon ni judío nchakon tsixrabaa chujni tsikenꞌen. 41 Ti no juankanito na̱ ndo Jesús nta̱cru tjenka ntiꞌa jii naa huerto ko ntiꞌa jii naa itjao̱ natjúá xraxroꞌan chujni tsixrabaa ntiꞌa. 42 Ntiꞌa juabaa sen ndo Jesús ixi kjínꞌa jii itjao̱*itjao̱ cueva ko íseꞌa hora xroxrangíxin nchakon tjokéꞌe ni judío.