1 Tjumeꞌe nchakon xrangíxin semana xra naxixeꞌe jan María Magdalena ikjui jan ti no tsixrabaa ndo Jesús, ko bikon jan ixi ixro tsijijee̱xin na̱ itjao̱*Itjao̱ cueva ti no tsixrabaa ndo tsijinchetengi na̱ ixro. 2 Méxin sabinga jan ikjui jan ti no jii ndo Simón Pedro ko ti jii inaa ndo tsikincheꞌe ndo Jesús, ndo meꞌe tsango tjueꞌe ndo ndo Jesús, ko ndachro jan:

―Ó tsikantsje na̱ cuerpoe Ncháina satsikikao na̱ ndo ko nónaꞌina ti no tsikakeꞌe na̱ ndo.

3 Ndo Pedro ko ndo meꞌe kuinꞌen sen jaña, méxin, sakjui sen ti tsixrabaa ndo Jesús. 4 Yui sen binga sen. Ko ndo naa ícha nteeto binga ndo ixi ndo Pedro, ko jeꞌe ndo saꞌó kuiji ndo tinó tsixrabaa ndo Jesús. 5 Kuisée ndo tsjeꞌe ndo ngaxinꞌin ti no tsixrabaa ndo Jesús ko bikon ndo manta tsikitsía na̱ ndo ko kuixinꞌa ndo ntiꞌa. 6 Ko tjumeꞌe kuiji ndo Simón Pedro ko kuixinꞌin ndo ti no tsixrabaa ndo Jesús ko kaxon bikon ndo manta tsikitsía ndo, 7 ko bikon ndo ixi manta tsikitsía jaa ndo Jesús nango tsixratuꞌu manta, jiꞌa manta tjenka ti no ste manta kaxin. 8 Ko ndo bajikao ndo Jesús, ndo kuiji saꞌó ti no tsixrabaa ndo, kaxon kuixinꞌin ndo ko bikon ndo ngeꞌe tsikonꞌen ko kuitikaon ndo. 9 Ko xrakuienxinꞌa sen ngeꞌe ndachro xroon chijnie ndo Dio, ti xrokonda xroxechón ndo Jesús. 10 Tjumeꞌe sen tsikji tsikitsjexin ti no tsixrabaa ndo Jesús ikjan sen ndoꞌa sen.

11 Ko jan María kuituꞌe jan ngandangi nduja ti no juabaa na̱ ndo Jesús jitsjanga jan. Ko jaña jitsjanga jan, kuisée jan tsjeꞌe jan ngaxinꞌin ti no tsixrabaa ndo, 12 ko bikon jan yuu sen ángel jiá sen manta tjúá ste sen nunte tinó tsikakeꞌe na̱ cuerpoe ndo Jesús ko naa ndo ángel jii ndo ti no bakeꞌe jaa ndo Jesús ko inaa ndo jii ndo ti bakeꞌe tutée ndo. 13 Tjumeꞌe sen ángel juanchangi sen:

―Nchri, ¿sonda tsja̱nga?

Ko juateꞌe jan:

―Satsikikao na̱ cuerpoe Nchána̱na, ko nónaꞌina no tsikakeꞌe na̱ ndo.

14 Juexin ndachro jan jiꞌi ko konkjan jan tsjeꞌe jan ko bikon jan ixi ntiꞌa jii ndo Jesús, ko juatsuanꞌi jan ndo. 15 Ko ndo Jesús juanchangiꞌe ndo jan:

―Nchri, ¿sonda tsja̱nga? ¿Ngisen tjée?

Ko jeꞌe jan xraxaon jan ixi ndo nichjeꞌe jan naa sen tayakonꞌen huerto ntiꞌa, ko ndachro jan:

―Siá jaꞌa sabikoꞌa ndo, ndachijiana no bakée ndo ixi janꞌan satsikiꞌan ndo.

16 Ko ndo Jesús nichjeꞌe ndo jan ndachro ndo:

―¡María!

Ko tsjeꞌe jan ndo, ko nichjaxin jan ngigua arameo, ndachro jan:

―¡Raboni!

(Jiꞌi xrondachro Maestro.)

17 Ko ndachro ndo Jesús:

―Tajandana ixi xrasatjiꞌa ti jii Ndotána. Itjia titsjeꞌé sen kichuuna ko ndache sen ixi sajiin ti jii Ndotána, ndo kaxon Ndotánta, ndo Dio naꞌna ko kaxon ndo Dio naꞌanta.

18 Tjumeꞌe jan María Magdalena sakjuichronga jan ngajin sen kuajikao ndo Jesús, ko ndachro jan ixi tsikikon jan Ncháina ko kaxon chronga jan ixi jaña tsindachro ndo.

19 Tjumeꞌe kóndo nchakon xrangíxin semana, sen kuajikao ndo Jesús tsixraꞌo sen ngaxinꞌin nchia ko jian tsikijeꞌe̱ sen nchia ixi xrakonꞌen sen ni judío. Ko ndo Jesús kuixinꞌin ndo ko ngusine jeꞌe sen bakeꞌe ndo, ko nichjeꞌe ndo sen, ndachro ndo:

―¿Á jian stenta?

20 Ko juexin ndachro ndo jiꞌi, juako ndo itja ndo ko chjiyée ndo. Ko jeꞌe sen bakeꞌe sen juaxruxin ixi bikon sen Ncháina. 21 Tjumeꞌe ndachro ndo Jesús:

―Juaxruxin stenta. Xranchi Ndotána xruanꞌanna ndo juiꞌi ntiꞌi, jaña janꞌan xruanꞌannta.

22 Ko kuanotée ndo ngataꞌa sen ko ndachro ndo:

―Tayeꞌénta Espíritue ndo Dio. 23 Mt. 16:19; 18:18.*Siá xrotjáñaꞌanta ijie̱ juincheꞌe xrojan ngisen, jaña kaxon tsoméꞌe jíee na̱. Ko siá xrotjáñaꞌinta ijie̱ juincheꞌe xrojan ngisen, tsoméꞌa ijie̱ chónda na̱.

24 Tjumeꞌe ndo Tomás, naa sen teyuu sen chrikao ndo Jesús, kaxon nchekinꞌin sen ndo xjan Kuatsi, ndo meꞌe koꞌa ndo nchakon konoxin ndo Jesús. 25 Méxin sen ikaxin chrikao ndo Jesús ndache sen ndo:

―Ó bikona Ncháina.

Ko ndachro ndo Tomás:

―Siá tsikonꞌa janꞌan tinó tsikituꞌu na̱ clavo itja ndo ko xroxraxinꞌa dedo tjáana ntiꞌa ko ti chjiyée ndo, tsitikaonꞌa.

26 Tjumeꞌe kuatsinga ijní nchakon ko xraꞌo kain sen íjngo ngaxinꞌin nchia ko kaxon ndo Tomás jikao sen ndo ntiꞌa. Tsikijeꞌe̱ sen jian nchia ko tuinxin bikon sen ndo Jesús ngusine ti ste sen ko nichja ndo ngajin sen ko ndachro ndo:

―¿Á juaxruxin stenta?

27 Ko ndache ndo ndo Tomás:

―Xraxinꞌia dedo tjáa ti no tsixranduꞌu na̱ chika clavo tjáana ko xraxinꞌia tjáa chiyéna. Ko jaña jeꞌa xrokuitikaonꞌa ixi nduaxin janꞌan.

28 Ko juateꞌe ndo Tomás:

―¡Jaꞌa Ncháina ko ndo Dio naꞌna!

29 Ko ndache ndo Jesús ndo Tomás:

―Tomás bikonjana, kuitikaoan. Ko ikaxin sen juaxruxin ste sen, maski bikonꞌana sen ko jaña titikaon sen.

30 Ndo Jesús juincheꞌe ndo itsjé ixra̱ ijié bikon sen chrikao ndo ko jitaxinꞌa kain ngeꞌe meꞌe xroon jiꞌi. 31 Ko ngeꞌe jitaxin xroon jiꞌi, tsikixintaxin ixi tsitikaonnta ixi ndo Jesús meꞌe ndo Cristo, Chjenꞌen ndo Dio, ixi siá tsitikaonnta ndo, xrochondanta juachaxin tsaricho̱nnta kain nchakon.