2
Guwà pitêrewà
1 Ê wâro kàwà naa goo Kériso, âna é pagòowà. Â ê pimeaari kêe, âna é patàmarù ê pwâranümawà. Â ê Nyuâaê Pwicîri, âna é naanaimariwà ma wàé. Â guwà pimeaariwà, gée na âji pwâranümawà. 2 Â wiàna wàrapwiri, â go tacoo goowà pâ, na guwà pitêrewà. Wâdé na caapwi pimeaari kàwà, ma caapwi pwâranümawà, ma caapwi auniimiri kàwà. Â, na guwà wàrapwiri, â o dau maina ipwàdée kôo.
3 Galatia 5.26 Guwà cibwaa wakè ma guwà pipaariwà. Â guwà ipakîriwà, ma ipwamaina pàra tàpé. Â guwà cibwaa niimiri pâ, dau pwamuru naa goowà jiirà. 4 1 Korénito 10.24Guwà cibwaa piniimiriwà co, â guwà mudàra cè pwina wâdé, ba kà pàra tàpé.
Guwà ipwacèwii Iésu na é ipakîriê
5 Wâdé na guwà ipwacèwii wà Kériso Iésu, naa na aunünüma kàwà, ma càrawà. Ba:
6 Ioane 1.1–2, 17.5 Ru caapwi wàilu ma Pwiduée,
naa na diri ê pâ ére.
 câé caa picipa
ma wéaari pai maina kêe.
7 Ioane 1.14; 2 Korénito 8.9 É panuâ autâa kêe.
É panuâ diri kaa.
É pâ nau pwi âboro kîri.
É pa naiiri âboro.
8 Hébéru 5.8, 12.2 É ipakîriê.
É pitêre dà Pwiduée,
tiagoro pai bà,
pai bà naa goro *satauro,
[pwacèwii teepâ,
kà tèpa âboro diri].
9 Ésaïe 45.23; Apostolo 2.33; Éféso 1.20–21; Hébéru 1.3–4 Â wà Pwiduée,
âna é pinaaê too.
É naa têe neere âboro,
na dau maina awé.
10 Roma 14.11 Ba na, naa na nee Iésu,
âna rà tùu jùrurà, na araé
diri pâ pwina
wânidò *napwéretòotù,
ma wâni gòropuu,
tianiboo na autâa kà tèpa bà*Autâa kà tèpa bà—Rà niimiri, wà tèpa Juif pâ, pwa autâa kà tèpa bà, na aranara ê gòropuu..
11 Roma 10.9 Â rà o cau tomara too pâ:
Wà Iésu Kériso,
âna é Pwi Ukai!
Ba na, pai pwamaina
Pwiduée Caa.
Nabwé!
Guwà îricò naa na bàutê
12 Ûna go bwaa tâa jaawà, co tèpa âji béeò, â guwà pitêre dòo.  wâdé na guwà nye tà ciburà pitêre dòo, nabàni na tiàuo jaawà. Guwà dau papwicîri Pwiduée, â guwà piênawéna kêe na diri pâ muru, na guwà piwakè naima, ba na tâbawêe ê wâro kàwà†Wâro kàwà—Grec: Pai pa-udòwà. Pai ina wèe ni pâ, ê wâro naima kà tèpa cèikî naa na picaatâa. naa gooé. 13 Ba wà Pwiduée, âna é tàgére wakè goowà, â ée mwa pwa ma wâdé tàwà, ê câbawâdé kêe.  ée mwa naa cè nii kàwà, ma guwà pitêre dèe.
14 [Na, ê wâro ma wakè kàwà, âna] guwà cibwaa nama oratàwà‡Nama oratàwà—Rà ina mwara wà tèpa ijiao pâ: Tamaki..  guwà cibwaa pikûuriwà, 15 Daniel 12.3; Filipi 1.10; 1 Tésalonika 2.19ba na o ticè èpà jaawà, â na o ticè na pâri ma pitèiwà goo.  guwà o tèpa naî Pwiduée, na guwà tâbawêe, naa nabibiu kâra pâ âboro gòropuu, na rà tèpa pwâ, ma tèpa âboro èpà. Ba guwà o pwacèwii pâ îricò, na té na bàutê§Îricò, na té na bàutê—Grec: Uèù., 16 na guwà pa pâdarirà ê popai târa *âji wâro*1re phrase—é, Guwà tà mwü goro ê popai târa wâro..
Wiàna guwà wàrapwiri, â go dau ipwàdée goowà, na tòotù na é mwa wâjué côwâ na wà Kériso. Ba go jèe po dau pipanuâô, ba kàwà, pwacèwii pwi a-itàa, wâna pi-itàa. Â go o dau ipwàdée, wiàna ê wakè kôo, ba kàwà, âna pwa pwêe. 17 Â wiàna pâri ma go bà, ba kàwà, â go o naa ê wâro kôo, pwacèwii ê *ârapwaailò tà Pwiduée. Â jè o mwa tòpò naa jaa i ârapwaailò na guwà naa têe, gée goro ê cèikî kàwà naa gooé. Â go dau ipwàdée, goo pwiri. 18 Filipi 3.1, 4.4Üu, â jè o ipwàdée naima.
Wà Paulo âna é cùru pâ Timotéo ma Épafrodite
19 Go niimiri pâ, wiàna wâdé tà Pwi Ukai Iésu, â go cùru paé dariwà wà Timotéo, ba na go têre cè popai goowà, târa ma pagòo-o. 20 Nye wàco wà Timotéo, na ipaiwà pwina tâa na pwâranümabu. Â nye ticè pwi jèpwi, cèna é niimiriwà, â nye wàé co.
21 2 Timotéo 4.10 Ba wà pàra tàpé, âna rà nye jèpa mudàra jèpa wâdé kàra. Â càra caa mudàra, ma rà pwa ê pwina wâdé tà Kériso Iésu.
22 Êco na guwà tâmogòori pâ, é dau pitu tôo wà Timotéo. Ba bu pwacèwii tupédu aénaî, na bu wakè naima, goro ê picémara ê Picémara Wâdé. 23 Â êkaa, na go niimiri pâ, go o mwa panuâê paé dariwà, wiàna go tâmogòori cè tûâ gooò, naani. 24 Â napwa naa gooò, âna go tâmogòori pâ, go o jèe tàpo paé mariwà. Ba go dau cèikî naa goo Pwi Ukai.
Tòpi bwàti Épafrodite
25 Filipi 4.18 Nabàni, âna go jèe niimiri pâ, na go panuâ paé côwâ, wà pwi a cèikî béejè, wà pwini Épafrodite—wà pwi ia guwà panuâê medario, ba na é pitu tôo. Â bu dau wakè naima ba gòo, pwacèwii tupédu a-ipaa, [na bu inapàpari ê *Picémara Wâdé]. 26 Dau nümee na é côowà diri. Â dau tòina pwâranümee, ba guwà têre ê pai maagé kêe. 27 Âjupâra pâ, é po dau maagé béaa, [â é jèe pwa na é bà]. Êco na é meaarié wà Pwiduée, â é jèe piêgòtùru côwâ. Ûna wàrapwiri, â wâgo mwara, âna upao, jii ê tòina na maina.
28 Â, na go panuâê paé dariwà, â guwà o ipwàdée. Â câgo mwa caa dau pidumapiê goowà. 29 Guwà tòpié bwàti naa na ipwàdée, wàra pai tòpi kâjè ê pwi a cèikî béejè, naa na nee Kériso. Â wâdé na guwà ipwamaina tèpa âboro na pwacèwiié. 30 Ba pwa na é bà, na é wakè ba kà Kériso. Â é wàrapwiri, ba na é pitu tôo, na pàara na càcaa pâri naa goowà, gée goro ê pai pitâiti kâjè.
2:3 Galatia 5.26
2:4 1 Korénito 10.24
2:6 Ioane 1.1–2, 17.5
2:7 Ioane 1.14; 2 Korénito 8.9
2:8 Hébéru 5.8, 12.2
2:9 Ésaïe 45.23; Apostolo 2.33; Éféso 1.20–21; Hébéru 1.3–4
2:10 Roma 14.11
*2:10 Autâa kà tèpa bà—Rà niimiri, wà tèpa Juif pâ, pwa autâa kà tèpa bà, na aranara ê gòropuu.
2:11 Roma 10.9
†2:12 Wâro kàwà—Grec: Pai pa-udòwà. Pai ina wèe ni pâ, ê wâro naima kà tèpa cèikî naa na picaatâa.
‡2:14 Nama oratàwà—Rà ina mwara wà tèpa ijiao pâ: Tamaki.
2:15 Daniel 12.3; Filipi 1.10; 1 Tésalonika 2.19
§2:15 Îricò, na té na bàutê—Grec: Uèù.
*2:16 1re phrase—é, Guwà tà mwü goro ê popai târa wâro.
2:18 Filipi 3.1, 4.4
2:21 2 Timotéo 4.10
2:25 Filipi 4.18