3
Âjimuru âna na jè tâmogòori Kériso
1-2 Go tubanabwé ê auniimiri kôo bèeni, co tèpa cèikî béeò: Wâdé na guwà ipwàdée, goo pai tâa kàwà, ma wà Pwi Ukai.
Ipwacôoco tèpa wakè ba èpà
Guwà ipwacôoco tèpa wakè ba èpà. Câgo caa piwâ, na go ciburà ina tàwà pwiri, ba na guwà tàcî, ma pipwabwàtiwà. Ba rà ina pàra tàpé pâ, wâdé na pwa *kamaî tâjè diri, [wàijè na jè cèikî naa goo Iésu]. Rà tèpa akàna! [Nümarà na tapàgà jè ére gée goo naiijè, êco na] ê pwiibà, âna piticèmuru naa goo!
3 Roma 2.29Ba ê âji pwa kamaî, âna [wâna pwâranümajè. Â] wàijè, [âna jè âji Ba kà Pwiduée]. Ba jè piênawéna kêe, goro ê Nyuâaê Pwicîri. Â câjè caa pi-ina kâjè, goro ê pwina jè pwa, naa na naiijè! Jè ina ê pwina é pwa wà Kériso Iésu, ba kâjè.
4 2 Korénito 11.18Wiàna pwa pwi jèpwi, na pâri ma é pi-ina kêe, âna o wâgo. Â wiàna rà niimiri wà pàra tàpé pâ, pwamuru naa goo ê pâ tûâ kàra, â wâgo, âna go dau wénarirà awé. 5 Luka 1.59; Apostolo 23.6; 2 Korénito 11.22Ba wâgo, âna go pwi âji *Juif, pwi *Isaraéla gée na wâao kà *Benjamin. Â pwa kamaî tôo, na bé 8 kâra tòotù gée na càùru ê pai pitèpao, [wiâra nyamanya kà tèpa Juif]. Â go pwi jè bée tèpa *Farasaio [pwi ditàra pwapwicîri kâbà tèpa Juif] na bà nye dau tâa goo ê *Naèà kà Moosé. Â go nye dau pwi a pitêre dàra kaa ê Naèà, 6 Apostolo 8.3tiagoo na, câgo mu caa tâjii*Tiagoo na, câgo mu caa tâjii… Grec: Â jèe nye ticè cè jè muru cèna pitòtio goo (irréprochable). ê ji autûâri na kîri naa na.
 go nye panuâô bamwara [târa pwapwicîri kôo] tiagoro pai tubaèpà kôo tà tèpa cèikî naa goo Iésu. [Ba go nye tà niimiri pâ, go pwa ê câbawâdé kà Pwiduée].
Ticèmuru naa goo wakè kôo béaa
7 Mataio 13.44,46Na pàara bèepwiri, âna nye dau âjimuru tôo diri ê pwiibà. Â ni, âna go jèe tâmogòori pâ, po dau ticèmuru naa goo, majoroé [ê pwina é pwa wà] Kériso. 8-9 Roma 3.21–22Ê pwina é dau âjimuru, âna pai tâmogòori kôo Kériso Iésu, Pwi Ukai kôo. Diri ê pàra muru, âna nye piticèmuru naa goo, jii pwiri. Üu, êdiri pâ pwiibà, âna nye pwacèwii ê pâ teepâ. Â go jèe cau naaco diri, ba na go wâro goo Kériso. Â wà Pwiduée, âna [é tòpò pinaanapô naa nabibiu kâbu ma wàé, â] é nama go pwi âboro na go *tàrù na araé, majoroé ê cèikî kôo, naa goo Kériso. Â càcaa gée goro ê pai pitêre dàra kôo, ê Naèà, [ba po dau piticèmuru naa goo pwiri].
10 Roma 6.3–5, 8.17Nye nümoo na go dau tâmogòori wà Kériso, bau ê pàtàmee, na é nama é wâro côwâ, gée na aubà. Â go pa cè napâraô gée goo pai tâa na aré ma tòina, ma pai bà kêe. 11 Ba wiàna wàrapwiri, â go cèikî pâ, [wà Pwiduée, âna ée] mwa pawâroò côwâ, gée na aubà, pwacèwii Kériso.
Jè tà paé na pai itàtà kâjè!
12-13 1 Timotéo 6.12,19Wà Kériso Iésu, âna é jèe pwa ma go udò, ba na go pwi âboro, na go pâra nau tâbawêe, ma wâdé tà Pwiduée, ma mwü ê pai cèikî kôo. Câgo caa ina tàwà pâ, go jèe tâbawêe kaa, é, na go jèe tèepaa naa gòro otàpwe kâra pi-itàa. Ba bwaa dau gòri ê naigé, co tèpa cèikî béeò.  go tà côo co ê naigé, na wâbéaa kôo, â câgo caa niâri côwâ ê naigé, na wâcàùo†Grec: 12Câgo caa pâji tâbawêe.  go pipwadàrapwa, ba na o tâa tôo ê câmaô, ba wâgo, âna go tâa goo Kériso. 13Câgo caa niimiri, co tèpa aéjii, pâ, jèe tâa tôo pwi bèepwiri.  go naaco pâ muru na càùo, â go itàa dàra ê pwina wâbéaa kôo.. 14 1 Korénito 9.24Go itàa, goro diri ê nii kôo, ba na go tòpi ê pwina é todòo naa goo‡Ê pwina é todòo naa goo—é, Ê wâro na bwaa âmuê naanidò. wà Pwiduée, gée goo ê pwina é pwa wà Kériso Iésu ba kâjè§Gée goo ê pwina é pwa wà Kériso… é, Na é todàjè na é naigé mee Kériso Iésu..
15 1 Korénito 2.6Wàijè diri, na jèe mwü ê cèikî kâjè, âna wâdé na wàrapwiri, cè pai niimiri kâjè. Â wiàna pi-ité ê auniimiri kà pàra tàpé, naa goro cè jè muru, â ée mwa paari tàra wà Pwiduée ê âjupâra, goro ê pwiibà. 16 Â wâdé na jè nye tà picaapâra, wiâra ê pitûâ, na jè jèe pâra wiâra, tiagoro nabàni.
Guwà ipwacèwiio
17 1 Korénito 4.16Tèpa cèikî béeò, wâdé na guwà ipwacèwiio. Â guwà ipwacèwii mwara, tàpé na rà ipwacèwiibà.
18 [Ipwacôowà goro pâ tûâ kàwà.] Go jèe ina tàwà béaa pâ, dau wâru [tèpa cèikî] na rà pâ nau tèpa cicara ê *satauro, goro pâ tûâ kàra. Â go po dau pikîri, goro ê pwiibà, â go i goo.
19 Roma 16.18Wàilà, âna rà ipanuârà bamwara, târa câbawâdé kâra naiiri âboro. Â rà pi-ina kàra, goro ê pwina rà pwa, na jè miiri goo. Â guwà pwacôoco, ba rà pâra dàra pai tiàurà [wâiti jii Pwiduée, dàra gòiri awé].
20 Éféso 2.6,19Â napwa naa goojè, âna jè tèpa âboro *napwéretòotù, wâna é tâa wê, wà Pwi Ukai Iésu Kériso. Â jè pidàpwicâarijè, ma tapacîri, ê pai wâjué me côwâ kêe, ba na ée mwa bàra pa-udòjè. 21 1 Korénito 15.28,43–53Â ée mwa pitòotéri ê naiijè na ticè nii kêe, goro ê pàtàmee, ba na o pwacèwii ê naiié na pwényuâa. Â goro ê pàtàmee bèepwiri, âna ée mwa piétò jii diri ê pâ muru, â ée mwa pitûâ kàra.
3:3 Roma 2.29
3:4 2 Korénito 11.18
3:5 Luka 1.59; Apostolo 23.6; 2 Korénito 11.22
3:6 Apostolo 8.3
*3:6 Tiagoo na, câgo mu caa tâjii… Grec: Â jèe nye ticè cè jè muru cèna pitòtio goo (irréprochable).
3:7 Mataio 13.44,46
3:8-9 Roma 3.21–22
3:10 Roma 6.3–5, 8.17
3:12-13 1 Timotéo 6.12,19
†3:12-13 Grec: 12Câgo caa pâji tâbawêe. Â go pipwadàrapwa, ba na o tâa tôo ê câmaô, ba wâgo, âna go tâa goo Kériso. 13Câgo caa niimiri, co tèpa aéjii, pâ, jèe tâa tôo pwi bèepwiri. Â go naaco pâ muru na càùo, â go itàa dàra ê pwina wâbéaa kôo.
3:14 1 Korénito 9.24
‡3:14 Ê pwina é todòo naa goo—é, Ê wâro na bwaa âmuê naanidò.
§3:14 Gée goo ê pwina é pwa wà Kériso… é, Na é todàjè na é naigé mee Kériso Iésu.
3:15 1 Korénito 2.6
3:17 1 Korénito 4.16
3:19 Roma 16.18
3:20 Éféso 2.6,19
3:21 1 Korénito 15.28,43–53