3
Tayta Diosta Habacuc mañacushan
Cayga caycan profëta Habacuc mañacushanmi.
 
Tayta Dios, intërupa rejsisha cashayquitami musyashcä.
Tayta Dios, imata imano rurashayquitapis wiyarmi fiyupa almirä.
Unaycuna rurashayquino ruray ari
canan nogacuna caycashä wichanpis.
Chaynöpanami nogacunapis rurashayquita musyashaj.
Rabyashpayquipis cuyapäcoj cashayquita yarpaycuy ari.
 
Diosga Temán partipitami shamun.
Santo Diosga Parán jircapitami shamun.
Selah
Munayniyoj captin achicyaynenga intëru syëluchömi achicyaraycan.
Intëru munduchönami payllatana alabarcaycan.
Achicyaypa achicyaycajpa rurinchömi aywaycämun.
Maquincunapitanami achicyaypa achicyar llojshiycan.
Chay achicyashanchömi pacaraycan fiyupa munayniyoj cashanga.
Paypa ñaupantami shamonga fiyupa manchariypaj gueshya.
Paypa guepantanami chayamonga fiyupa rupay gueshya.
Pay ichiycuptenga intëru cay pachami sicsicyan.
Pay ricapäriptenga nasyuncunapis fiyupami mancharin.
Imaycamapis caycaj jircacunapis juchucäcunmi.
Imaycamapis caycaj puntacunapis gotucäcunmi.
Tayta Diospa yachachicuynincunami ichanga imaypis mana ushacanchu.
Nogaga ricashcämi Cusán runacuna fiyupa llaquicuycho carcaycajta,
Madián runacunapis manchariyllawan sicsicyarcaycajta.
 
Tayta Dios, ¿fiyupachu rabyacurcushcanqui mayucunapaj?
¿Nina ratarejnöchu rabyacurcushcanqui lamarcunapäpis?
¿Chaychu puriycanqui cawalluyqui muntashalla?
¿Chaychu carrëtayqui janancho cörriycanqui?
Lëcha jitacunayquitapis camarishallanami charaycanqui.
Lëchayquitapis illapanayquipaj jitaj jitajllanami caycanqui.
Selah
Mayucunawanmi cay pachatapis ragrargärishcanqui.
10 Ricärishushpayquega puntacunapis sicsicyanmi.
Janajpitapis löcu tamyami tamyamun.
Chaymi may-may lamarpis gaparan.
Wayra apashan pullchajyajnincunapis altuta ichirin.
11 Fiyupa manchariypaj achicyaypa achicyaycaj lëchayquita ricashpan,
achicyaypa achicyaycaj sabliquita ricashpan
intiwan quillapis yagashanpita manami yagamunnachu.
12 Fiyupa rabyashami cay munduchöga intërupa purinqui.
Rabyasha caycashpayquimi nasyuncunatapis lluchcargärinqui.
13 Gamga shamushcanqui sirbishoj runacunata yanapänayquipämi.
Shamushcanqui quiquiqui acrashayqui rayta yanapänayquipämi.
Mana allita ruraj runacunapa mandajnintaga ushashcanquimi.
Chay fiyu runa mandashan nasyuntapis pasaypami ushashcanqui.
Selah
14 Mandajnincunaga löcu tamyanömi cawalluncunawan muntädu shamuran.
Paycunaga fiyupa rabyashami shamuran nogacunata wacpa caypa machiramänanpaj.
Nogacunaga manami ima ruraytapis camäpacurächu.
Gammi ichanga quiquinpa lëchancunawan wañurachishcanqui.
15 Aypalla yacuta pullchajyachishpayquimi
lamar jananpa cawalluyquicunawan aywarayqui.
 
16 Llapan chaycunata wiyarmi mancharirä.
Shimi wirpäcunapis sicsicyacäcuran.
Chaquëcunapis mana awantashpan sicsicyacäcuran.
Intëru cuerpömi gotucäcuran.
Chayno caycaptinpis, mana yarpachacuypami shuyaräshaj
conträ yaycamojcunata Tayta Dios castiganancama.
 
17 Ïgus yöra mana waytaptinpis,
übascuna mana wayuptinpis,
olivopa wayuynin mana captinpis,
chacracunacho ima micuy mana wayuptinpis,
juc canchacho caycaj uyshacuna ushacäcuptinpis,
curralnincho wäcacuna manana captinpis,
18 jinallami nogaga Tayta Diosta alabaycäshaj.
Imapitapis salbamashanpitami cushicushpä Diosnëtaga alabashaj.* Sal. 25.5; 68.19–20; Luc. 1.47
19 Nogataga Tayta Diosmi imapitapis chapäman.
Paymi camacächin chaquë lluychupa chaquinno cörrinanpaj.* 2Sam. 22.34; Sal. 18.33
Nircurpis altu jircacunaman pushaman.
 
Cay mañacushan caycan cuerdayoj instrumentucunata tucar cantananpämi.

*3:18 Sal. 25.5; 68.19–20; Luc. 1.47

*3:19 2Sam. 22.34; Sal. 18.33