Salmos
¿Maygantaj casha Israelcunapa himnaryun? ¿Imatataj ninchi Diosninchïta mañacur?
¿Imataj caycan cay librucho? Tayta Diosta mañacorga paywanmi parlaycanchi. Tayta Diosta mañacorga alabansacunatapis cantaycanchïmi. Israelcunaga Salmo libruta charaj cantananpämi y Tayta Diosta mañacunanpämi. Unay ermänucunapis chaynömi üsaran. Y noganchïpis chayno rurashwan. Chaycho caycan Tayta Diosta alabananchïpaj camarishallana. Tayta Dioswan imano parlananchïpäpis tantiyaycächimanchi: llaquisha caycar imanöpis mañacunapaj, cushisha caycar imanöpis mañacunapaj, allilla goyar imanöpis mañacunapaj, imapitapis yarpachacur imanöpis mañacunapaj. Salmos libruchöga achcatami tarinchi imano Tayta Diosta alabana cashanta, imano paywan parlanapäpis. Pachac pichga chuncan (150) salmucunami caycan yachachimänanchïpaj.
Salmos libro raquisha caycan pichga partimanmi: Libro 1 (1–41); Libro 2 (42–72); Libro 3 (73–89); Libro 4 (90–106); Libro 5 (107–150). Cada parti ushan Tayta Diosta alabashpan (41.13; 72.18,19; 89.52; 106.48; 150.1–6). Salmos libruchöga manami juc castallachu isquirbisha caycan. Chaytaga achcaj runacunami isquirbiran. Ichanga llapanpis rimaycan Tayta Diospitami. Chay isquirbejcunaga rimaycan imanöpis Tayta Dios yanapashantami. Y ima ñacaycunaman chayarpis Tayta Diostami mañacun yanapänanpaj.
LIBRO 1
1
(SALMOS 1–41)
Juchaynajcunapaj juchayojcunapaj rimashan
1 Cushishami goyanga fiyu runacuna willapashanta mana rurajcunaga,
juchasapacunata mana gatirajcunaga,
Tayta Diosta mana rispitajcunawan mana goturajcunaga.
2 Cushishami goyanga Tayta Diospa laynincunata cushisha cumlejcunaga,
chacaypa junajpapis cumlinallanpaj yarparajcunaga.
3 Chay runaga caycan juc yöra mayu cantuncho alli caycajnömi,*Job 29.19; Jer. 17.8
wayunan timpu chayamuptin alli wayojnömi,
öjancunapis mana garwashtajnömi.
¡Chay runataga llapanpis allimi llojshipan!
4 Fiyu runacunapäga manami chaynöchu.
Paycunaga carcaycan wayra apashan chaqui panganömi.*Job 21.18; Jer. 13.24; Ose. 13.3; Sof. 2.2
5 Chaymi juchasapacunataga Tayta Dios castiganga.
Juchaynajcunawan iwalga mana goturangachu.
6 Juchaynajcunataga alli nänipa pushar Tayta Diosmi alli cawayman chayachin.
Fiyu runacunatami ichanga quiquin purishan nänicho usharenga.*Prov. 4.18–19; Mat. 7.13–14