2
Tayta Dios acracushan
1 ¿Imanirtaj Tayta Diosta mana rispitajcunaga contran jatarircaycan?
¿Imanirtaj manacajcunataga yarparcaycan?
2 Cay pachacho caj raycuna, mandajcuna fiyupa rabyacarcärin.
Nircur llapanna parlacun Tayta Diospa contran y acrashanpa contran.* Hech. 4.25–26
3 Chaymi gaparpan cayno nir: «Paycunapa maquinpita llojshicushunna.
Munayninpita gueshpicushunna.»
4 Janaj pachacho caycaj Tayta Diosmi paycunapäga asicun.
Quiquin Tayta Diosmi mana cäsupanchu.* Sal. 59.8
5 Rabyarna mancharachin.
Fiyupa rabyacurcurna piñacur nin:
6 «Rispitädu Sión lömächo raynë cananpäga maynami acrashcä» nir.
7 Cananmi willacushaj Tayta Dios imano yarpaycashantapis.
Paymi nimasha: «Gamga wamrämi canqui.
Canan junajpitaga taytayquinami cä.* 2Sam. 7.14; Hech. 13.33; Heb. 1.5; 5.5
8 Nasyuncunata goycunäpäpis mañacamay.
Cay pachatapis gampa cananpämi juc cuchupita jucaj cuchuncama goycushayqui.
9 Fyërru bastunniquiwan magarmi llapan raycunata binsinquipaj.* Apoc. 2.26–27; 12.5; 19.15
¡Allpa mancata shallurejnömi usharinquipaj!»
10 Chaymi raycuna, mandajcuna sumaj tantiyacuy.
¡Cay willapashäta sumaj yachacuy!
11 Fiyupa rispitashpayqui aduray Tayta Diosta.
12 Paypa ñaupanmanga sicsicyar gongurpacuy.
Mana rispitaptiquega jinan örami rabyacurcunman.
Chaura wañunquimanmi.
Cushishami cawanga Tayta Diosman yäracojcunaga.