9
Ñacajcunatapis Tayta Dios ricashan
David isquirbishan alabansa.
Álef
1 Tayta Dios, llapan shongöpami alabayta munä.
Allita rurashayquitaga llapantami willacushaj.
2 Munayniyoj Tayta Diosnë gampaj cushicurmi gamta alabä.
¡Alabansacunatami cantashaj!
Bet
3 Chiquimajcuna gampitaga gueshpinmi.
Tunerga jinanchömi wañun.
4 Gamga alli juez carmi dimandöta alli arriglanqui.
Jamaränayquiman jamaycushcanqui llapanta jusganayquipaj.
Guímel
5 Mana rispitashojcunataga piñacushcanquimi.
Mana wiyacojcunataga illgächishcanquimi.
Paycunataga para-simrina gongaycärinanpämi camacächishcanqui.
6 Chiquimajcunaga wañushanami.
Quiquinwan iwalmi illgasha siudänincunapis.
Gammi illgächishcanqui.
Paycunapaga manami imallanpis quëdashachu yarpänanpaj.
He
7 Tayta Diosmi ichanga imaycamapis ray canga.
Jusgananpaj jamacunantapis camacächisha.
8 Cada ünuntami jusganga imano cashantapis.
Llapantapis iwalmi jusgangapaj.
Vav
9 Tayta Diosga imapita ñacaycajcunatapis chapanmi.
Payga llaquicuycajcunata washanmi.*Sal. 37.39
10 Tayta Dios, gamta rejsishoj cäga gammanmi yäracun.
Gamman yäracamojtaga manami cachaycunquichu.
Zayin
11 Sioncho mandaj caycaj Tayta Diospaj alabansata cantay.
Imata rurashantapis intëru marcacunacho willacuy.
12 Wañuchicojcunata castigäga manami gongangachu llaquicuycajcunata.
Jet
13 Tayta Dios, chiquimajcunaga fiyupami llaquicaycächiman.
¡Cuyapaycamay ari!
¡Wañuchimänantaga ama camacächiychu!
14 Chaynöpami Jerusalenman yaycunacho willacushaj alabashunayquipaj.
Salbamashayquipitapis cushicushämi.
Tet
15 Mana rispitashojcunaga yaganga quiquincuna uchcuta rurashallanmanmi.
Togllata churashanpis quiquincunatami charenga.
16 Tayta Dios gamga musyachimashcanqui allita ruraj cashayquitami.
Fiyucunaga watacäcusha quiquincuna churashan togllachömi.
Selah
Yod
17 Fiyucunawan Tayta Diosta mana rispitajcunaga
wañojcuna cashanmanmi chayanga.
Caf
18 Pobricunatami ichanga imaypis mana gonganquichu.
Gamman yäracamojcunataga yarparaycanquimi.
19 Tayta Dios apuray ari.
Ama camacächiychu fiyu runacuna alli-tucunantaga.
¡Mana rispitashojcunataga jusgay ari!
20 Tayta Dios chay runacunataga fiyupa mancharachiy.
¡Mana rispitashojcunaga tantiyacuchun quiquin manacajlla cashanta!
Selah