22
Llaquicur mañacushan y cushicur alabashan
David isquirbishan alabansa.
1 Diosnillä, Diosnillä, ¿imanirtaj cachaycamashcanqui?*Mat. 27.46; Mar. 15.34
¿Imanirtaj mana salbamanquichu?
¿Imanirtaj mana wiyamanquichu llaquicur mañacaycämushäta?
2 Tayta Diosnillä, goyay-goyay mañacamuptëpis manami yanapämanquichu.
Pagaspapis manami jamaytapis tarënachu.
3 Ichanga gam Santo Diosmi canqui.
Tiyaycashayquichöga Israelcunami alabaycäshunqui.
4 Unay papänëcunaga gammanmi yäracamuran.
Yäracamuptinmi imapitapis salbarayqui.
5 Yanapänayquipaj mañacushuptiqui salbarayqui.
Gamman yäracamoj cäga manami pengaycho cangachu.
6 Nogaga cä curunöllami.
Runacuna asipänanmi cä.
7 Ricamajcunaga asipämar manacajman churaman.
Umantapis jajtachirmi nin:*Mat. 27.39; Mar. 15.29; Luc. 23.35
8 «Payga Tayta Diosllamanmi yäracoj.
Rasunpa cuyashpanga mä Tayta Dios shamuchun ari salbananpaj»*Mat. 27.43 nir.
9 Chayno captinpis gammi mamäpa pachanpita yurichimashcanqui.
Mellgayninchöpis wiñachimashcanqui.
10 Manaräpis yuriptëmi gamga ricaycämarayqui.
Mamäpa pachancho cashäpita-pachami gamga Diosnë caycanqui.
11 Ama cachaycamaychu.
Llaquicuynami nogamanga chayaycämun.
Pipis manami canchu yanapämaj.
12 Chiquimajcunaga wishtacoj törucunano tumaparcaycäman.
Chaycunaga carcaycan Basancho tiyaj callpasapa törucunanömi.
13 Micucoj liyuncunanöraj gaparpanpis.
Jatunta äyacarcärirmi nogaman cörrimun.
14 Yacu jicharishanönami caycäpis.
Tullöcunapis pasaypa gotucäcushanami.
Shongöpis ushaycanna.
15 Shimëpis chaquicäcushami.
Gallöpis watacäcushami.
Wañushata-japuyna jitaraycajta cachaycamashcanqui.
16 Cañicoj allgucunanömi fiyucunaga intëröpa curalacaycamasha.
Maquëta chaquëtapis uchcurisha.
17 Pasaypa tullullannami caycä.
Chiquimajcunaga cushipämashpan mana cachaycuypami ricapaycäman.
18 Röpäta raquipänacusha.
Röpäta mayganpis apacunanpaj surtita jitasha.*Mat. 27.35; Mar. 15.24; Luc. 23.34; Juan 19.24
19 Tayta Dios ichanga gammi yanapämanqui.
¡Ama cachaycamaychu! ¡Yanapaycamay ari!
20 Sabliwan wañuchimänanpita salbaycamay.
Ama camacächiychu chay allgucuna wañuchimänantaga.
21 Chay liyuncunapita salbaycamay.
Chay fiyu törucunapita gueshpiycachimay.
22 Gampämi runa-masïcunata willapäshaj.
Shuntacashancunachömi alabashayqui.*Heb. 2.12
23 ¡Rispitar adurajcunaga Tayta Diosta alabay!
¡Jacobpita mirar aywajcuna Tayta Diosta alabay!
¡Israelpita mirar aywajcuna Tayta Diosta aduray!
24 Payga manami gongaycunchu pobricuna ñacashanta.
Manacajmanpis manami churanchu pobricuna ñacaycajta.
Manami pacacunpischu.
Mañacuptenga yanapanmi.
25 Adurashunayquipaj shuntacashan runacunapa ñaupanchömi alli cashayquipita alabashayqui.
Gamta rispitashojcunapa ñaupanchömi llapan aunishäta cumlishayqui.
26 Umildicunaga sacsananyajmi miconga.
Sirbiyta munaycajcunaga Tayta Diosta alabanga.
Chaura para-simrimi cawangapaj.
27 Tucuy casta carpis, may nasyunpita carpis Tayta Diosmanna yäraconga.
Cay pachacho tiyajcunaga llapan runacunami Tayta Diosta adurananpaj shamonga.
28 Tayta Diosmi Rayga.
Paymi llapan nasyuncunatapis mandan.
29 Pipis bïdantaga manami rantishachu.
Chaymi munayniyojcunaga rispitar umpur Tayta Diosllata cay pachacho aduranga.
30 Nogapita mirar aywajcunaga Tayta Diosllatami aduranga.
Payllapämi imaycamapis willaconga.
31 Guepata yurejcunatapis willapanga
Tayta Dios alli cashanta, imata rurashantapis.