23
Tayta Diosmi michimajninchi
David isquirbishan alabansa.
1 Tayta Diosmi michimajnë.*Isa. 40.11; Jer. 31.10; Eze. 34.11–16; Juan 10.11
Chaymi imapis mana pishëmangachu.
2 Tajta pampacunachömi jamachiman.
Chuya yacu aywajmanmi pushaman.*Jer. 31.9; Eze. 34.13–15; Apoc. 7.17
3 Paymi callpäta yurichin.*Isa. 40.31
Allinllanpami pushaman*Prov. 4.11–12
payta pï-maypis rispitananpaj.
4 Gam, Tayta Dios yanapaycämaptiquega
yanauyaycaj ragracunapa purirpis
manami imapitapis manchacushächu.*Isa. 9.2; 50.10
Manami imapitapis yarpachacushächu
bastunniquiwan chapämänayquipaj cashanta musyaycashpäga.
5 Chiquimajcuna ricapaycämaptinmi mas alli micuyta garamanqui.
Alli jamachimashpayquimi umämanpis asëtita wiñapämanqui.
Jicha-jichananyajrämi
bäsömanpis wiñapämashcanqui.
6 Cawashäcamaga imay-yajpis
alli cashpayqui cuyaycämanquimi.
Gam caycashayquichönami
para-simri goyäshäpaj.*Sal. 27.4

*23:1 Isa. 40.11; Jer. 31.10; Eze. 34.11–16; Juan 10.11

*23:2 Jer. 31.9; Eze. 34.13–15; Apoc. 7.17

*23:3 Isa. 40.31

*23:3 Prov. 4.11–12

*23:4 Isa. 9.2; 50.10

*23:6 Sal. 27.4

© 2011 WBT